ਅਹਿਮਦਾਬਾਦ: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਮਦਿਨ ਮੌਕੇ ’ਤੇ ਗੁਜਰਾਤ ਵਿੱਚ ਵੱਡੇ ਪੱਧਰ ’ਤੇ ਸਮਾਗਮ ਕਰਵਾਏ ਜਾ ਰਹੇ ਹਨ। 17 ਸਤੰਬਰ ਨੂੰ ਸੂਬੇ ਦੇ 18,500 ਤੋਂ ਵੱਧ ਸਥਾਨਾਂ ’ਤੇ 88 ਲੱਖ ਤੋਂ ਜ਼ਿਆਦਾ ਮਿੱਟੀ ਦੇ ਦੀਵੇ ਜਗਾਉਣ ਦੀ ਤਿਆਰੀ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਧਾਰਮਿਕ ਸਮਾਗਮ, ਆਰਤੀਆਂ, ਭਜਨ ਸੰਧਿਆ, ਸੱਭਿਆਚਾਰਕ ਪ੍ਰੋਗਰਾਮ ਅਤੇ ਵਡਨਗਰ ਤੋਂ ਵਾਰਾਣਸੀ ਤੱਕ ਵਿਸ਼ੇਸ਼ ਬਾਈਕ ਰੈਲੀ ਵੀ ਕੱਢੀ ਜਾਵੇਗੀ।
ਗੁਜਰਾਤ ਸਰਕਾਰ ਅਤੇ ਭਾਜਪਾ ਵੱਲੋਂ ਦਿੱਤੀ ਜਾਣਕਾਰੀ ਦੇ ਅਨੁਸਾਰ ਸ਼ਾਮ 7 ਵਜੇ ‘ਆਸ਼ੀਰਵਾਦ ਨੋ ਦਿਵਡੋ’ ਪ੍ਰੋਗਰਾਮ ਤਹਿਤ ਸੂਬੇ ਭਰ ਵਿੱਚ ਦੀਪ ਜਗਾਏ ਜਾਣਗੇ। ਇਸ ਤੋਂ ਪਹਿਲਾਂ ਸ਼ਾਮ 6 ਵਜੇ ਤੋਂ ਭਗਤੀ ਸੰਗੀਤ, ਸਤਸੰਗ ਅਤੇ ਸੱਭਿਆਚਾਰਕ ਪ੍ਰੋਗਰਾਮ ਸ਼ੁਰੂ ਹੋਣਗੇ। ਇਸ ਦੌਰਾਨ ਪ੍ਰਧਾਨ ਮੰਤਰੀ ਦੀ ਲੰਬੀ ਉਮਰ ਅਤੇ ਦੇਸ਼ ਦੀ ਸੇਵਾ ਲਈ ਪ੍ਰਾਰਥਨਾਵਾਂ ਕੀਤੀਆਂ ਜਾਣਗੀਆਂ।
ਗੁਜਰਾਤ ਸਰਕਾਰ ਦੇ ਕੈਬਨਿਟ ਮੰਤਰੀ ਜੀਤੂ ਵਾਘਾਣੀ ਮੁਤਾਬਕ, ਸੂਬੇ ਦੇ ਵੱਖ-ਵੱਖ ਜ਼ਿਲ੍ਹਿਆਂ, ਨਗਰ ਨਿਗਮਾਂ, ਨਗਰ ਪਾਲਿਕਾਵਾਂ ਅਤੇ ਸਥਾਨਕ ਇਕਾਈਆਂ ਵਿੱਚ ਇਹ ਦੀਪ ਉਤਸਵ ਕਰਵਾਇਆ ਜਾਵੇਗਾ। ਮੰਦਰਾਂ, ਝੀਲਾਂ, ਦਰਿਆਵਾਂ, ਜਨਤਕ ਚੌਕਾਂ, ਪ੍ਰਵੇਸ਼ ਦੁਆਰਾਂ, ਮੂਰਤੀਆਂ, ਟ੍ਰੈਫਿਕ ਚੌਰਾਹਿਆਂ, ਬਾਗਾਂ ਅਤੇ ਹੋਰ ਜਨਤਕ ਸਥਾਨਾਂ ’ਤੇ ਵੀ ਦੀਵੇ ਜਗਾਏ ਜਾਣਗੇ।
ਇਸ ਦੇ ਨਾਲ ਭਾਜਪਾ ਵੱਲੋਂ 17 ਸਤੰਬਰ ਤੋਂ 7 ਅਕਤੂਬਰ ਤੱਕ ‘ਸੇਵਾ ਸੰਕਲਪ ਅਭਿਆਨ’ ਚਲਾਇਆ ਜਾਵੇਗਾ। ਇਸ ਅਭਿਆਨ ਤਹਿਤ ਪ੍ਰਧਾਨ ਮੰਤਰੀ ਮੋਦੀ ਦੇ ਜਨਤਕ ਜੀਵਨ ਦੇ 25 ਸਾਲ ਪੂਰੇ ਹੋਣ ਨਾਲ ਜੁੜੇ ਪ੍ਰੋਗਰਾਮ ਕਰਵਾਏ ਜਾਣਗੇ।
ਵਡਨਗਰ ਤੋਂ ਵਾਰਾਣਸੀ ਤੱਕ ਬਾਈਕ ਰੈਲੀ
ਪ੍ਰਧਾਨ ਮੰਤਰੀ ਦੇ ਜਨਮਸਥਾਨ ਵਡਨਗਰ ਤੋਂ ਵਾਰਾਣਸੀ ਅਤੇ ਵਾਰਾਣਸੀ ਤੋਂ ਵਡਨਗਰ ਤੱਕ ਦੋ ਬਾਈਕ ਰੈਲੀਆਂ ਕੱਢੀਆਂ ਜਾਣਗੀਆਂ। ਇਹ ਰੈਲੀਆਂ 17 ਸਤੰਬਰ ਨੂੰ ਦੋਵੇਂ ਪਾਸਿਆਂ ਤੋਂ ਇਕੱਠੀਆਂ ਰਵਾਨਾ ਹੋਣਗੀਆਂ ਅਤੇ 7 ਅਕਤੂਬਰ ਨੂੰ ਸਮਾਪਤ ਹੋਣਗੀਆਂ।
ਭਾਜਪਾ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਦੋਵੇਂ ਰੈਲੀਆਂ 10 ਸੂਬਿਆਂ ਦੇ 193 ਜ਼ਿਲ੍ਹਿਆਂ ਅਤੇ ਕਰੀਬ 1,159 ਪਿੰਡਾਂ ਵਿੱਚੋਂ ਲੰਘਣਗੀਆਂ। ਇਸ ਦੌਰਾਨ ਲਗਭਗ 40 ਹਜ਼ਾਰ ਕਿਲੋਮੀਟਰ ਦੀ ਯਾਤਰਾ ਤੈਅ ਕੀਤੀ ਜਾਵੇਗੀ। ਕਰੀਬ 1,000 ਨੌਜਵਾਨ ਇਸ ਵਿੱਚ ਹਿੱਸਾ ਲੈਣਗੇ। 250 ਬਾਈਕਾਂ ’ਤੇ 500 ਨੌਜਵਾਨ ਵਡਨਗਰ ਤੋਂ ਵਾਰਾਣਸੀ ਜਾਣਗੇ, ਜਦਕਿ 500 ਹੋਰ ਨੌਜਵਾਨ 250 ਬਾਈਕਾਂ ਰਾਹੀਂ ਵਾਰਾਣਸੀ ਤੋਂ ਵਡਨਗਰ ਵੱਲ ਯਾਤਰਾ ਕਰਨਗੇ।
ਅਹਿਮਦਾਬਾਦ ਵਿੱਚ ਵੀ ਵੱਡੇ ਪੱਧਰ ’ਤੇ ਪ੍ਰੋਗਰਾਮ
ਅਹਿਮਦਾਬਾਦ ਵਿੱਚ ਵੀ ਜਨਮਦਿਨ ਮੌਕੇ ਕਈ ਵੱਡੇ ਸਮਾਗਮ ਕਰਵਾਏ ਜਾਣਗੇ। ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅਤੇ ਗੁਜਰਾਤ ਦੇ ਮੁੱਖ ਮੰਤਰੀ ਭੂਪੇਂਦਰ ਪਟੇਲ ਸ਼ਾਮ ਕਰੀਬ ਸਾਢੇ 5 ਵਜੇ ਜਮਾਲਪੁਰ ਸਥਿਤ ਜਗਨਨਾਥ ਮੰਦਰ ਵਿੱਚ ਪੂਜਾ-ਅਰਚਨਾ ਕਰਨਗੇ। ਇਸ ਤੋਂ ਬਾਅਦ ਉਹ ਕਾਂਕਰੀਆ ਝੀਲ ਵਿਖੇ ਹੋਣ ਵਾਲੇ ਪ੍ਰੋਗਰਾਮ ਵਿੱਚ ਸ਼ਾਮਲ ਹੋਣਗੇ, ਜਿੱਥੇ 1.25 ਲੱਖ ਦੀਵੇ ਜਗਾਏ ਜਾਣਗੇ।
ਅਹਿਮਦਾਬਾਦ ਨਗਰ ਨਿਗਮ ਮੁਤਾਬਕ ਜਗਨਨਾਥ ਮੰਦਰ ਵਿੱਚ ਅਮਿਤ ਸ਼ਾਹ, ਮੁੱਖ ਮੰਤਰੀ ਭੂਪੇਂਦਰ ਪਟੇਲ ਅਤੇ ਮੇਅਰ ਹਿਤੇਸ਼ ਬਾਰੋਟ 1,000 ਸਫਾਈ ਕਰਮਚਾਰੀਆਂ ਨਾਲ ਸ਼ਾਮ ਦੀ ਆਰਤੀ ਵਿੱਚ ਸ਼ਾਮਲ ਹੋਣਗੇ।
ਇਸ ਮੌਕੇ ਅਹਿਮਦਾਬਾਦ ਵਿੱਚ 10 ਥਾਵਾਂ ’ਤੇ ਖੂਨਦਾਨ ਕੈਂਪ ਅਤੇ 14 ਥਾਵਾਂ ’ਤੇ ਮੁਫ਼ਤ ਮੈਡੀਕਲ ਕੈਂਪ ਵੀ ਲਗਾਏ ਜਾਣਗੇ। ਖੋਖਰਾ ਇਲਾਕੇ ਦੇ ਮਦਰਾਸੀ ਮੰਦਰ ਵਿੱਚ ਰਾਤ ਸਾਢੇ 8 ਵਜੇ 5,000 ਦੀਵਿਆਂ ਨਾਲ ਵਿਸ਼ੇਸ਼ ਮਹਾਆਰਤੀ ਕਰਵਾਈ ਜਾਵੇਗੀ।
ਗੁਜਰਾਤ ਦੇ ਹੋਰ ਸ਼ਹਿਰਾਂ ਅਤੇ ਇਲਾਕਿਆਂ ਵਿੱਚ ਵੀ ਭਾਜਪਾ ਆਗੂ ਅਤੇ ਮੰਤਰੀ ਵੱਖ-ਵੱਖ ਪ੍ਰੋਗਰਾਮਾਂ ਵਿੱਚ ਸ਼ਾਮਲ ਹੋਣਗੇ। ਭਾਜਪਾ ਦੇ ਸੂਬਾ ਪ੍ਰਧਾਨ ਜਗਦੀਸ਼ ਵਿਸ਼ਵਕਰਮਾ ਬਨਾਸਕਾਂਠਾ ਸਥਿਤ ਅੰਬਾਜੀ ਮਾਤਾ ਮੰਦਰ ਵਿੱਚ ਹੋਣ ਵਾਲੇ ਦੀਪ ਉਤਸਵ ਵਿੱਚ ਸ਼ਿਰਕਤ ਕਰਨਗੇ।
