ਮਹਾਰਾਸ਼ਟਰ ‘ਚ FDA ਨੇ ਕੀਤੀ ਵੱਡੀ ਕਾਰਵਾਈ

ਮੁੰਬਈ : ਮਹਾਰਾਸ਼ਟਰ ਫੂਡ ਐਂਡ ਡਰੱਗ ਐਡਮਿਨਿਸਟ੍ਰੇਸ਼ਨ (FDA) ਵੱਲੋਂ ਸੂਬੇ ਭਰ ਵਿੱਚ ਚਲਾਈ ਗਈ ਤਿੰਨ ਮਹੀਨੇ ਦੀ ਐਨਫੋਰਸਮੈਂਟ ਡਰਾਈਵ ਦੌਰਾਨ ਵੱਡੀ ਕਾਰਵਾਈ ਕੀਤੀ ਗਈ ਹੈ। FDA ਨੇ ਇਸ ਮੁਹਿੰਮ ਦੌਰਾਨ ਕੁੱਲ 67.20 ਕਰੋੜ ਰੁਪਏ ਦਾ ਖਾਣ-ਪੀਣ ਦਾ ਸਟਾਕ ਜ਼ਬਤ ਕੀਤਾ ਹੈ। ਇਸ ਤੋਂ ਇਲਾਵਾ 404 ਲਾਇਸੈਂਸ ਸਸਪੈਂਡ ਕੀਤੇ ਗਏ ਹਨ ਅਤੇ ਵੱਖ-ਵੱਖ ਮਾਮਲਿਆਂ ਵਿੱਚ 867 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।

FDA  ਦੇ ਮੁਤਾਬਕ ਜੂਨ ਤੋਂ ਅਗਸਤ ਦਰਮਿਆਨ ਦੁੱਧ, ਡੇਅਰੀ ਉਤਪਾਦ ਅਤੇ ਹੋਰ ਖਾਣ-ਪੀਣ ਵਾਲੀਆਂ ਵਸਤਾਂ ਦਾ ਕਾਰੋਬਾਰ ਕਰਨ ਵਾਲੇ 9,485 ਅਦਾਰਿਆਂ ਦੀ ਜਾਂਚ ਕੀਤੀ ਗਈ। ਇਸ ਦੌਰਾਨ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੇ ਅਦਾਰਿਆਂ ਨੂੰ 4,321 ਸੁਧਾਰ ਨੋਟਿਸ ਜਾਰੀ ਕੀਤੇ ਗਏ।

ਵਿਭਾਗ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਸਭ ਤੋਂ ਵੱਧ 4,261 ਜਾਂਚਾਂ ਪੁਣੇ ਡਿਵੀਜ਼ਨ ਵਿੱਚ ਕੀਤੀਆਂ ਗਈਆਂ। ਇਸ ਤੋਂ ਬਾਅਦ ਕੋਂਕਣ ਵਿੱਚ 3,142, ਗ੍ਰੇਟਰ ਮੁੰਬਈ ਵਿੱਚ 1,451, ਨਾਸਿਕ ਵਿੱਚ 1,356, ਛਤਰਪਤੀ ਸੰਭਾਜੀਨਗਰ ਵਿੱਚ 1,173, ਅਮਰਾਵਤੀ ਵਿੱਚ 989 ਅਤੇ ਨਾਗਪੁਰ ਵਿੱਚ 711 ਜਾਂਚਾਂ ਹੋਈਆਂ।

ਮਹਾਰਾਸ਼ਟਰ ਵਿੱਚ 13 ਜੁਲਾਈ ਤੋਂ ਪਾਨ ਮਸਾਲਾ, ਗੁਟਖਾ, ਸੁਗੰਧਿਤ ਤੰਬਾਕੂ ਅਤੇ ਇਸ ਤਰ੍ਹਾਂ ਦੇ ਪਾਬੰਦੀਸ਼ੁਦਾ ਉਤਪਾਦਾਂ ਦੀ ਆਵਾਜਾਈ ‘ਤੇ ਰੋਕ ਲਗਾਈ ਗਈ ਹੈ। ਇਸ ਦੇ ਬਾਵਜੂਦ ਇਨ੍ਹਾਂ ਉਤਪਾਦਾਂ ਦੀ ਗੈਰ-ਕਾਨੂੰਨੀ ਤੌਰ ‘ਤੇ ਆਵਾਜਾਈ ਅਤੇ ਵਿਕਰੀ ਕਰਨ ਵਾਲਿਆਂ ਖ਼ਿਲਾਫ਼ FDA ਨੇ ਸਖ਼ਤ ਕਾਰਵਾਈ ਕੀਤੀ।

ਐਨਫੋਰਸਮੈਂਟ ਡਰਾਈਵ ਦੌਰਾਨ 795 ਅਦਾਰਿਆਂ ਤੋਂ 19.62 ਕਰੋੜ ਰੁਪਏ ਦੇ ਪਾਬੰਦੀਸ਼ੁਦਾ ਉਤਪਾਦ ਜ਼ਬਤ ਕੀਤੇ ਗਏ। ਇਸ ਸਬੰਧੀ 644 FIR ਦਰਜ ਕੀਤੀਆਂ ਗਈਆਂ, ਜਦਕਿ 867 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਇਸ ਤੋਂ ਇਲਾਵਾ 483 ਅਦਾਰਿਆਂ ਨੂੰ ਸੀਲ ਕੀਤਾ ਗਿਆ ਅਤੇ 110 ਵਾਹਨ ਵੀ ਜ਼ਬਤ ਕੀਤੇ ਗਏ।

FDA ਅਨੁਸਾਰ ਜ਼ਬਤ ਕੀਤੇ ਗਏ ਕੁੱਲ 67.20 ਕਰੋੜ ਰੁਪਏ ਦੇ ਸਟਾਕ ਵਿੱਚ 5.40 ਕਰੋੜ ਰੁਪਏ ਦੇ ਦੁੱਧ ਅਤੇ ਡੇਅਰੀ ਉਤਪਾਦ, 42.17 ਕਰੋੜ ਰੁਪਏ ਦੀਆਂ ਹੋਰ ਖਾਣ-ਪੀਣ ਵਾਲੀਆਂ ਵਸਤਾਂ ਅਤੇ 19.62 ਕਰੋੜ ਰੁਪਏ ਦੇ ਪਾਬੰਦੀਸ਼ੁਦਾ ਉਤਪਾਦ ਸ਼ਾਮਲ ਹਨ।

ਇਸ ਮੁਹਿੰਮ ਦੌਰਾਨ ਦੁੱਧ ਅਤੇ ਡੇਅਰੀ ਉਤਪਾਦਾਂ ਤੋਂ ਇਲਾਵਾ ਖਾਣ ਵਾਲਾ ਤੇਲ, ਅੰਬ, ਮਿਠਾਈਆਂ, ਖੋਆ, ਬੇਕਰੀ ਉਤਪਾਦ, ਕੈਂਡੀ, ਗੁੜ, ਘਿਓ, ਖਜੂਰ, ਆਈਸਕ੍ਰੀਮ ਤੇ ਕੁਲਫ਼ੀ, ਫਰੋਜ਼ਨ ਡੈਜ਼ਰਟ, ਮਸਾਲੇ, ਸੁਪਾਰੀ ਅਤੇ ਤਾੜੀ ਸਮੇਤ ਕਈ ਹੋਰ ਖਾਣ-ਪੀਣ ਵਾਲੀਆਂ ਵਸਤਾਂ ਦੀ ਵੀ ਜਾਂਚ ਕੀਤੀ ਗਈ।