ਸਿੱਕਮ: ਭੋਲੇਨਾਥ ਦੇ ਸ਼ਰਧਾਲੂਆਂ ਲਈ ਇੱਕ ਬਹੁਤ ਹੀ ਸੁਖਦ ਅਤੇ ਵੱਡੀ ਖ਼ਬਰ ਹੈ। ਪਵਿੱਤਰ ਕੈਲਾਸ਼ ਮਾਨਸਰੋਵਰ ਯਾਤਰਾ ‘ਤੇ ਜਾਣ ਵਾਲੇ ਸ਼ਰਧਾਲੂਆਂ ਦਾ ਪਹਿਲਾ ਅਧਿਕਾਰਤ ਜੱਥਾ ਸਿੱਕਮ ਦੀ ਰਾਜਧਾਨੀ ਗੰਗਟੋਕ ਪਹੁੰਚ ਗਿਆ ਹੈ। ਇਹ ਸਮੂਹ ਭਾਰਤ ਅਤੇ ਚੀਨ ਦੀ ਸਰਹੱਦ ‘ਤੇ ਸਥਿਤ ਇ ਤਿਹਾਸਕ ਨਾਥੂ ਲਾ ਪਾਸ ਰਾਹੀਂ ਆਪਣੀ ਅਗਲੀ ਪਵਿੱਤਰ ਅਤੇ ਮੁਸ਼ਕਲ ਯਾਤਰਾ ਕਰੇਗਾ।
ਗੰਗਟੋਕ ਪਹੁੰਚਣ ‘ਤੇ ਸਥਾਨਕ ਪ੍ਰਸ਼ਾਸਨ ਅਤੇ ਸੈਰ ਸਪਾਟਾ ਵਿਭਾਗ ਵੱਲੋਂ ਸਮੂਹ ਸ਼ਰਧਾਲੂਆਂ ਦਾ ਰਵਾਇਤੀ ਅਤੇ ਨਿੱਘਾ ਸਵਾਗਤ ਕੀਤਾ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਬੀਤੀ ਸ਼ਾਮ ਇੱਥੇ ਪਹੁੰਚੇ ਪਹਿਲੇ ਜਥੇ ਵਿੱਚ ਦੋ ਕੋਆਰਡੀਨੇਟਿੰਗ ਅਫ਼ਸਰ ਅਤੇ ਇੱਕ ਮੈਡੀਕਲ ਅਫ਼ਸਰ ਸਮੇਤ ਕੁੱਲ 44 ਲੋਕ ਸ਼ਾਮਲ ਹਨ। ਇਨ੍ਹਾਂ ਵਿੱਚੋਂ 32 ਪੁਰਸ਼ ਅਤੇ 12 ਔਰਤਾਂ ਹਨ।
ਸੈਰ ਸਪਾਟਾ ਵਿਭਾਗ ਨੇ ਇਕ ਬਿਆਨ ਵਿਚ ਕਿਹਾ ਕਿ ਸਿੱਕਮ ਸੈਰ-ਸਪਾਟਾ ਵਿਕਾਸ ਨਿਗਮ ਦੇ ਚੇਅਰਮੈਨ ਲੁਕੇਂਦਰ ਰਸੇਲੀ ਅਤੇ ਡਿਪਟੀ ਜਨਰਲ ਮੈਨੇਜਰ ਅਮਿਤ ਕਪਿਲ ਛੇਤਰੀ ਨੇ ਸਥਾਨਕ ਹੋਟਲ ਵਿਚ ਸ਼ਰਧਾਲੂਆਂ ਦਾ ਸਵਾਗਤ ਕੀਤਾ।
ਤੀਰਥ ਯਾਤਰੀ ਉਚਾਈ ਅਤੇ ਮੌਸਮ ਦੇ ਹਾਲਾਤਾਂ ਦੇ ਅਨੁਕੂਲ ਹੋਣ ਲਈ ਇੱਥੇ ਚਾਰ ਦਿਨਾਂ ਦੇ ਅਨੁਕੂਲਨ ਪ੍ਰੋਗਰਾਮ ਵਿੱਚੋਂ ਗੁਜ਼ਰਨਗੇ। ਫਿਰ ਉਹ 20 ਜੂਨ ਨੂੰ ਗਿਆਨਤਸੇ ਸ਼ਹਿਰ ਲਈ ਰਵਾਨਾ ਹੋਣਗੇ, ਜੋ ਕਿ ਨਾਥੂ ਲਾ ਦੱਰੇ ਰਾਹੀਂ ਕੈਲਾਸ਼ ਮਾਨਸਰੋਵਰ ਯਾਤਰਾ ਕਰਨ ਵਾਲੇ ਸ਼ਰਧਾਲੂਆਂ ਲਈ ਇੱਕ ਵੱਡਾ ਪੜਾਅ ਹੈ।
