ਨਵੀਂ ਦਿੱਲੀ: ਸੁਜ਼ੂਕੀ ਮੋਟਰ ਕਾਰਪੋਰੇਸ਼ਨ ਦੇ ਸਾਬਕਾ ਚੇਅਰਮੈਨ ਓਸਾਮੁ ਸੁਜ਼ੂਕੀ (Osamu Suzuki, The Former Chairman Of Suzuki Motor Corporation) ਦਾ 94 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ ਹੈ । ਓਸਾਮੂ ਸੁਜ਼ੂਕੀ ਨੇ 2021 ਵਿੱਚ 91 ਸਾਲ ਦੀ ਉਮਰ ਵਿੱਚ ਆਪਣੀ ਸੇਵਾਮੁਕਤੀ ਦਾ ਐਲਾਨ ਕੀਤਾ ਸੀ। ਆਪਣੇ ਕਰੀਅਰ ਦੌਰਾਨ, ਉਨ੍ਹਾਂ ਨੇ 40 ਸਾਲਾਂ ਤੋਂ ਵੱਧ ਸਮੇਂ ਤੱਕ ਸੁਜ਼ੂਕੀ ਮੋਟਰ ਕਾਰਪੋਰੇਸ਼ਨ ਦੀ ਅਗਵਾਈ ਕੀਤੀ ਅਤੇ ਕੰਪਨੀ ਨੂੰ ਦੁਨੀਆ ਭਰ ਵਿੱਚ ਇੱਕ ਪ੍ਰਮੁੱਖ ਨਾਮ ਬਣਾਇਆ।
ਮਾਰੂਤੀ 800 ਦਾ ਲਾਂਚ ਸਭ ਤੋਂ ਵੱਡੀ ਪ੍ਰਾਪਤੀ ਹੈ
ਉਨ੍ਹਾਂ ਦੀ ਸਭ ਤੋਂ ਵੱਡੀ ਪ੍ਰਾਪਤੀ ਭਾਰਤ ਵਿੱਚ ਮਾਰੂਤੀ 800 ਦੀ ਸ਼ੁਰੂਆਤ ਸੀ, ਜੋ ਕਿ ਭਾਰਤੀ ਮੱਧ ਵਰਗ ਦੇ ਪਰਿਵਾਰਾਂ ਲਈ ਇੱਕ ਕਿਫਾਇਤੀ ਅਤੇ ਭਰੋਸੇਮੰਦ ਕਾਰ ਬਣ ਗਈ ਸੀ। ਮਾਰੂਤੀ 800, 1983 ਵਿੱਚ ਲਾਂਚ ਹੋਈ, ਨੇ ਭਾਰਤੀ ਆਟੋਮੋਬਾਈਲ ਉਦਯੋਗ ਵਿੱਚ ਕ੍ਰਾਂਤੀ ਲਿਆ ਦਿੱਤੀ। ਉਸ ਸਮੇਂ ਇਸ ਦੀ ਕੀਮਤ 47,500 ਰੁਪਏ ਸੀ, ਜੋ ਉਸ ਵਰਗ ਲਈ ਬਹੁਤ ਕਿਫਾਇਤੀ ਸੀ। ਓਸਾਮੂ ਸੁਜ਼ੂਕੀ ਨਿੱਜੀ ਤੌਰ ‘ਤੇ ਇਸ ਪ੍ਰੋਜੈਕਟ ਵਿੱਚ ਸ਼ਾਮਲ ਸੀ ਅਤੇ ਇਸਦੀ ਸਫਲਤਾ ਵਿੱਚ ਮੁੱਖ ਭੂਮਿਕਾ ਨਿਭਾਈ।
ਉਨ੍ਹਾਂ ਨੇ ਸੁਜ਼ੂਕੀ ਮੋਟਰ ਨੂੰ ਨਾ ਸਿਰਫ਼ ਜਾਪਾਨ ਵਿੱਚ, ਸਗੋਂ ਗਲੋਬਲ ਬਾਜ਼ਾਰਾਂ ਵਿੱਚ ਵੀ ਸਫਲਤਾ ਵੱਲ ਅਗਵਾਈ ਕੀਤੀ। ਉਨ੍ਹਾਂ ਦੀ ਅਗਵਾਈ ਵਿੱਚ, ਸੁਜ਼ੂਕੀ ਮੋਟਰ ਨੇ ਵੱਖ-ਵੱਖ ਦੇਸ਼ਾਂ ਵਿੱਚ ਆਪਣੀ ਮੌਜੂਦਗੀ ਨੂੰ ਮਜ਼ਬੂਤ ਕੀਤਾ ਅਤੇ ਭਾਰਤ ਵਿੱਚ ਮਾਰੂਤੀ ਸੁਜ਼ੂਕੀ ਦੇ ਨਾਮ ਹੇਠ ਆਪਣੇ ਆਪ ਨੂੰ ਇੱਕ ਮਸ਼ਹੂਰ ਬ੍ਰਾਂਡ ਵਜੋਂ ਸਥਾਪਿਤ ਕੀਤਾ। ਉਨ੍ਹਾਂ ਦਾ ਯੋਗਦਾਨ ਨਾ ਸਿਰਫ਼ ਸੁਜ਼ੂਕੀ ਮੋਟਰ ਕਾਰਪੋਰੇਸ਼ਨ ਲਈ, ਸਗੋਂ ਪੂਰੇ ਆਟੋਮੋਬਾਈਲ ਉਦਯੋਗ ਲਈ ਬੇਮਿਸਾਲ ਰਹੇਗਾ।
ਜਾਪਾਨ ਵਿੱਚ ਹੋਇਆ ਸੀ ਓਸਾਮੁ ਸੁਜ਼ੂਕੀ ਦਾ ਜਨਮ
ਓਸਾਮੂ ਸੁਜ਼ੂਕੀ ਦਾ ਜਨਮ 30 ਜਨਵਰੀ 1930 ਨੂੰ ਜਾਪਾਨ ਦੇ ਗਿਫੂ ਸ਼ਹਿਰ ਵਿੱਚ ਹੋਇਆ ਸੀ। ਉਨ੍ਹਾਂ ਨੇ ਆਪਣੀ ਸ਼ੁਰੂਆਤੀ ਸਿੱਖਿਆ ਸਾਧਾਰਨ ਤਰੀਕੇ ਨਾਲ ਪ੍ਰਾਪਤ ਕੀਤੀ, ਪਰ ਬਾਅਦ ਵਿੱਚ ਸੋਫੀਆ ਯੂਨੀਵਰਸਿਟੀ, ਜਾਪਾਨ ਵਿੱਚ ਆਪਣੀ ਪੜ੍ਹਾਈ ਪੂਰੀ ਕੀਤੀ। ਉਨ੍ਹਾਂ ਦੀ ਪੜ੍ਹਾਈ ਅਤੇ ਸ਼ਖਸੀਅਤ ਵਿਚ ਹਮੇਸ਼ਾ ਕੁਝ ਖਾਸ ਰਿਹਾ, ਜਿਸ ਨੇ ਉਨ੍ਹਾਂ ਨੂੰ ਸਫਲਤਾ ਦੇ ਰਾਹ ‘ਤੇ ਲਿਆਂਦਾ।
ਓਸਾਮੂ ਸੁਜ਼ੂਕੀ ਦਾ ਕਰੀਅਰ
ਓਸਾਮੂ ਸੁਜ਼ੂਕੀ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ 1958 ਵਿੱਚ ਸੁਜ਼ੂਕੀ ਕੰਪਨੀ ਨਾਲ ਕੀਤੀ ਸੀ। ਕੰਪਨੀ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ, ਉਨ੍ਹਾਂਨੇ ਆਪਣੀ ਮਿਹਨਤ ਅਤੇ ਪ੍ਰਤਿਭਾ ਨਾਲ ਰਣਨੀਤੀ ਅਤੇ ਪ੍ਰਬੰਧਨ ਦੇ ਕਈ ਮਹੱਤਵਪੂਰਨ ਪਹਿਲੂਆਂ ਵਿੱਚ ਯੋਗਦਾਨ ਪਾਇਆ। ਕੰਪਨੀ ਲਈ 20 ਸਾਲ ਕੰਮ ਕਰਨ ਤੋਂ ਬਾਅਦ, ਉਹ 1978 ਵਿੱਚ ਸੁਜ਼ੂਕੀ ਮੋਟਰ ਕਾਰਪੋਰੇਸ਼ਨ ਦੇ ਪ੍ਰਧਾਨ ਨਿਯੁਕਤ ਹੋਏ। ਇਸ ਤੋਂ ਬਾਅਦ 2000 ਵਿੱਚ ਉਹ ਕੰਪਨੀ ਦੇ ਚੇਅਰਮੈਨ ਬਣੇ ਅਤੇ ਕੰਪਨੀ ਦੀ ਦਿਸ਼ਾ ਨੂੰ ਨਵੀਆਂ ਉਚਾਈਆਂ ਤੱਕ ਲੈ ਗਏ। ਓਸਾਮੂ ਸੁਜ਼ੂਕੀ ਦੀ ਅਗਵਾਈ ਵਿੱਚ, ਸੁਜ਼ੂਕੀ ਮੋਟਰ ਨੇ ਭਾਰਤ, ਜਾਪਾਨ, ਅਮਰੀਕਾ, ਆਸਟ੍ਰੀਆ ਅਤੇ ਯੂਰਪ ਵਰਗੇ ਦੇਸ਼ਾਂ ਵਿੱਚ ਆਪਣੇ ਉਤਪਾਦਨ ਦਾ ਵਿਸਤਾਰ ਕੀਤਾ।
