ਨਵੀਂ ਦਿੱਲੀ : ਪੈਰਿਸ ਓਲੰਪਿਕ ‘ਚ ਕਾਂਸੀ ਦਾ ਤਗਮਾ ਜਿੱਤਣ ਤੋਂ ਬਾਅਦ ਮੰਗਲਵਾਰ ਯਾਨੀ ਅੱਜ ਦਿੱਲੀ ਹਵਾਈ ਅੱਡੇ ‘ਤੇ ਭਾਰਤੀ ਹਾਕੀ ਟੀਮ ਦਾ ਨਿੱਘਾ ਸਵਾਗਤ ਕੀਤਾ ਗਿਆ। ਪੈਰਿਸ ਓਲੰਪਿਕ ‘ਚ ਕਾਂਸੀ ਦਾ ਤਗਮਾ ਜਿੱਤਣ ਵਾਲੇ ਖਿਡਾਰੀਆਂ ਦੀ ਝਲਕ ਪਾਉਣ ਲਈ ਦਿੱਲੀ ਹਵਾਈ ਅੱਡੇ ‘ਤੇ ਵੱਡੀ ਗਿਣਤੀ ‘ਚ ਲੋਕ ਇਕੱਠੇ ਹੋਏ। ਪ੍ਰਸ਼ੰਸਕਾਂ ਨੇ ਭਾਰਤੀ ਹਾਕੀ ਖਿਡਾਰੀਆਂ ਦਾ ਢੋਲ ਦੀ ਗੂੰਜ ਨਾਲ ਸਵਾਗਤ ਕੀਤਾ। ਇਸ ਤੋਂ ਪਹਿਲਾਂ ਸ਼ਨੀਵਾਰ ਨੂੰ ਭਾਰਤੀ ਪੁਰਸ਼ ਹਾਕੀ ਟੀਮ ਦਾ ਪਹਿਲਾ ਸੈੱਟ ਨਵੀਂ ਦਿੱਲੀ ਹਵਾਈ ਅੱਡੇ ‘ਤੇ ਪਹੁੰਚਿਆ। ਬਾਕੀ ਖਿਡਾਰੀ, ਜੋ ਕਿ ਸਮਰ ਗੇਮਜ਼ 2024 ਦੇ ਸਮਾਪਤੀ ਸਮਾਰੋਹ ਲਈ ਰੁਕੇ ਹੋਏ ਸਨ, ਮੰਗਲਵਾਰ ਯਾਨੀ ਅੱਜ ਪਹੁੰਚੇ। ਪੀ.ਆਰ ਸ਼੍ਰੀਜੇਸ਼, ਅਭਿਸ਼ੇਕ ਨੈਨ, ਅਮਿਤ ਰੋਹੀਦਾਸ ਅਤੇ ਸੰਜੇ ਅੱਜ ਰਾਸ਼ਟਰੀ ਰਾਜਧਾਨੀ ਪਹੁੰਚਣ ਵਾਲੇ ਖਿਡਾਰੀਆਂ ਵਿੱਚ ਸ਼ਾਮਲ ਸਨ।
ਟੀਮ ਦੇ ਮੈਂਬਰ ਸੁਮਿਤ ਵਾਲਮੀਕੀ ਨੇ ਕਿਹਾ, “ਬਹੁਤ ਵਧੀਆ ਮਹਿਸੂਸ ਹੋ ਰਿਹਾ ਹੈ। ਪੂਰਾ ਭਾਰਤ ਸਾਨੂੰ ਆਪਣਾ ਪਿਆਰ ਭੇਜ ਰਿਹਾ ਹੈ…ਤੁਸੀਂ ਦੇਸ਼ ਭਰ ਦਾ ਮਾਹੌਲ ਦੇਖ ਸਕਦੇ ਹੋ…ਸਾਨੂੰ ਹੋਰ ਪਿਆਰ ਕਰੋ, ਅਸੀਂ ਬਿਹਤਰ ਪ੍ਰਦਰਸ਼ਨ ਕਰਾਂਗੇ। ਸ੍ਰੀਜੇਸ਼ ਨੇ ਪੂਰੇ ਟੂਰਨਾਮੈਂਟ ਵਿੱਚ ਆਪਣਾ ਸਰਵੋਤਮ ਪ੍ਰਦਰਸ਼ਨ ਦਿੱਤਾ। ਉਨ੍ਹਾਂ ਦੀ ਬਦੌਲਤ ਅਸੀਂ ਕਾਂਸੀ ਦਾ ਤਗਮਾ ਜਿੱਤਿਆ…” ਪੈਰਿਸ ਓਲੰਪਿਕ ਦਾ ਸਮਾਪਤੀ ਸਮਾਰੋਹ ਐਤਵਾਰ ਰਾਤ ਨੂੰ ਹੋਇਆ ਸੀ। ਜਿਸ ‘ਚ ਪੈਰਿਸ ਓਲੰਪਿਕ ਦੇ ਤਗਮੇ ਟੇਬਲ ‘ਚ ਭਾਰਤ 71ਵੇਂ ਸਥਾਨ ‘ਤੇ ਰਿਹਾ, ਜਦਕਿ ਅਮਰੀਕਾ ਕੁੱਲ 126 ਤਮਗਿਆਂ ਨਾਲ ਚੋਟੀ ‘ਤੇ ਰਿਹਾ।
ਇਸ ਤੋਂ ਪਹਿਲਾਂ ਵੀਰਵਾਰ ਨੂੰ, ਕਪਤਾਨ ਹਰਮਨਪ੍ਰੀਤ ਸਿੰਘ ਦੇ ਦੋ ਗੋਲ ਅਤੇ ਪੀ.ਆਰ ਸ਼੍ਰੀਜੇਸ਼ ਦੇ ਬਚਾਅ ਦੀ ਮਦਦ ਨਾਲ ਭਾਰਤ ਨੇ ਫਰਾਂਸ ਦੇ ਯਵੇਸ ਡੂ ਮਨੋਇਰ ਸਟੇਡੀਅਮ ਵਿੱਚ ਸਪੇਨ ਨੂੰ 2-1 ਨਾਲ ਹਰਾ ਕੇ ਪੈਰਿਸ ਓਲੰਪਿਕ ਵਿੱਚ ਕਾਂਸੀ ਦਾ ਤਗਮਾ ਪੱਕਾ ਕੀਤਾ। ਕੋਚ ਕ੍ਰੇਗ ਫੁਲਟਨ ਦੀ ਅਗਵਾਈ ‘ਚ ਭਾਰਤ ਨੇ ਓਲੰਪਿਕ ‘ਚ ਲਗਾਤਾਰ ਦੋ ਕਾਂਸੀ ਦੇ ਤਗਮੇ ਜਿੱਤ ਕੇ ਇਤਿਹਾਸ ਰਚ ਦਿੱਤਾ। ਹਰਮਨਪ੍ਰੀਤ ਸਿੰਘ (30′, 33′) ਦੇ ਗੋਲ ਜਿੱਤ ਨੂੰ ਯਕੀਨੀ ਬਣਾਉਣ ਲਈ ਕਾਫ਼ੀ ਸਨ। ਸਪੇਨ ਲਈ ਸਿਰਫ ਮਾਰਕ ਮਿਰਾਲੇਸ (18′) ਹੀ ਗੋਲ ਕਰਨ ਵਾਲਾ ਸੀ। ਪਹਿਲੇ ਕੁਆਰਟਰ ਤੋਂ ਬਾਅਦ 0-1 ਨਾਲ ਪਛੜਨ ਦੇ ਬਾਵਜੂਦ ਭਾਰਤੀ ਟੀਮ ਨੇ ਰੋਮਾਂਚਕ ਮਾਹੌਲ ਵਿੱਚ ਜਿੱਤ ਦਰਜ ਕੀਤੀ।
ਭਾਰਤ ਲਈ ਆਪਣਾ ਆਖਰੀ ਮੈਚ ਖੇਡ ਰਹੇ ਸ਼੍ਰੀਜੇਸ਼ ਭਾਵੁਕ ਹੋ ਗਏ ਕਿਉਂਕਿ ਬਾਕੀ ਟੀਮ ਭਾਰਤ ਦੇ ਹਾਕੀ ਇਤਿਹਾਸ ਦੇ ਇਸ ਮਹੱਤਵਪੂਰਨ ਮੌਕੇ ਦਾ ਜਸ਼ਨ ਮਨਾਉਣ ਲਈ ਮੈਦਾਨ ‘ਤੇ ਉਨ੍ਹਾਂ ਨਾਲ ਸ਼ਾਮਲ ਹੋਈ। ਭਾਰਤ ਨੇ 1972 ਮਿਊਨਿਖ ਖੇਡਾਂ ਤੋਂ ਬਾਅਦ 52 ਸਾਲਾਂ ਵਿੱਚ ਪਹਿਲੀ ਵਾਰ ਲਗਾਤਾਰ ਕਾਂਸੀ ਦਾ ਤਮਗਾ ਜਿੱਤਿਆ।
