ਭਾਰਤੀ ਗ੍ਰੈਂਡਮਾਸਟਰ ਡੀ ਗੁਕੇਸ਼ ਨੇ ਸ਼ਤਰੰਜ ਦੀ ਦੁਨੀਆ ‘ਚ ਰਚਿਆ ਇਤਿਹਾਸ

ਨਵੀਂ ਦਿੱਲੀ: ਭਾਰਤੀ ਗ੍ਰੈਂਡਮਾਸਟਰ ਡੀ ਗੁਕੇਸ਼ (Indian Grandmaster D Gukesh) ਨੇ ਸਭ ਤੋਂ ਘੱਟ ਉਮਰ ‘ਚ ਵਿਸ਼ਵ ਚੈਂਪੀਅਨ (The World Champion) ਬਣ ਕੇ ਸ਼ਤਰੰਜ ਦੀ ਦੁਨੀਆ ‘ਚ ਇਤਿਹਾਸ ਰਚ ਦਿੱਤਾ ਹੈ। 12 ਦਸੰਬਰ, 2024 ਨੂੰ ਸਿੰਗਾਪੁਰ ਵਿੱਚ ਹੋਈ ਵਿਸ਼ਵ ਸ਼ਤਰੰਜ ਚੈਂਪੀਅਨਸ਼ਿਪ ਦੇ ਫਾਈਨਲ ਅਤੇ ਫ਼ੈਸਲਾਕੁੰਨ 14ਵੇਂ ਗੇਮ ਵਿੱਚ, ਗੁਕੇਸ਼ ਨੇ ਡਿੰਗ ਲਿਰੇਨ ਨੂੰ ਹਰਾ ਕੇ ਖਿਤਾਬ ਜਿੱਤਿਆ। ਇਹ ਉਪਲਬਧੀ ਹਾਸਲ ਕਰਕੇ 18 ਸਾਲਾ ਗੁਕੇਸ਼ ਨੇ ਰੂਸੀ ਸ਼ਤਰੰਜ ਮਾਸਟਰ ਗੈਰੀ ਕਾਸਪਾਰੋਵ ਨੂੰ ਪਿੱਛੇ ਛੱਡ ਦਿੱਤਾ, ਜਿਸ ਨੇ 22 ਸਾਲ ਦੀ ਉਮਰ ਵਿੱਚ 1985 ਵਿੱਚ ਵਿਸ਼ਵ ਚੈਂਪੀਅਨ ਬਣਨ ਦਾ ਰਿਕਾਰਡ ਆਪਣੇ ਨਾਂ ਕੀਤਾ ਸੀ।

ਖ਼ਿਤਾਬ ਲਈ ਸਖ਼ਤ ਮੁਕਾਬਲਾ

ਗੁਕੇਸ਼ ਅਤੇ ਡਿੰਗ ਲੀਰੇਨ 14ਵੀਂ ਗੇਮ ਵਿੱਚ 6.5-6 ਅੰਕਾਂ ਨਾਲ ਬਰਾਬਰ ਰਹੇ। ਇਸ ਗੇਮ ਵਿੱਚ ਡਿੰਗ ਲੀਰੇਨ ਸਫੇਦ ਟੁਕੜੇ ਨਾਲ ਖੇਡ ਰਹੇ ਸਨ ਅਤੇ ਖੇਡ ਡਰਾਅ ਵੱਲ ਵਧ ਰਹੀ ਸੀ। ਪਰ 53ਵੇਂ ਮੂਵ ‘ਤੇ ਡਿੰਗ ਲਿਰੇਨ ਨੇ ਵੱਡੀ ਗਲਤੀ ਕੀਤੀ, ਜਿਸ ਨਾਲ ਗੁਕੇਸ਼ ਨੂੰ ਜਿੱਤ ਦਾ ਮੌਕਾ ਮਿਲਿਆ। ਗੁਕੇਸ਼ ਨੇ ਦਬਾਅ ਬਣਾਈ ਰੱਖਿਆ ਅਤੇ ਡਿੰਗ ਨੂੰ ਗਲਤੀਆਂ ਕਰਨ ਲਈ ਮਜਬੂਰ ਕੀਤਾ। ਖਿਤਾਬ ਜਿੱਤਣ ਤੋਂ ਬਾਅਦ ਗੁਕੇਸ਼ ਨੇ ਕਿਹਾ, ‘ਇਹ ਮੇਰੀ ਜ਼ਿੰਦਗੀ ਦਾ ਸਭ ਤੋਂ ਵਧੀਆ ਦਿਨ ਹੈ।’ ਉਨ੍ਹਾਂ ਨੇ ਇਹ ਮੈਚ 7.5-6.5 ਨਾਲ ਜਿੱਤ ਕੇ ਚੈਂਪੀਅਨਸ਼ਿਪ ‘ਤੇ ਕਬਜ਼ਾ ਕਰ ਲਿਆ।

ਭਾਵੁਕ ਹੋਇਆ ਗੁਕੇਸ਼

ਗੁਕੇਸ਼ ਜਦੋਂ ਇਹ ਜਾਣਨ ਤੋਂ ਬਾਅਦ ਪਾਣੀ ਪੀਣ ਗਏ ਕਿ ਡਿੰਗ ਨੇ ਗਲਤੀ ਕੀਤੀ,ਤਾਂ ਉਹ ਆਪਣੀਆਂ ਭਾਵਨਾਵਾਂ ‘ਤੇ ਕਾਬੂ ਨਹੀਂ ਕਰ ਪਾਏ ਅਤੇ ਖੁਸੀ ਦੇ ਹੰਝੂ ਉਨ੍ਹਾਂ ਦੀ ਅੱਖਾਂ ‘ਚੋਂ ਵਹਿਣ ਲੱਗੇ । ਫਿਰ ਜਲਦੀ ਹੀ ਡਿੰਗ ਨੇ ਅਸਤੀਫ਼ਾ ਦੇ ਦਿੱਤਾ ਅਤੇ ਚੈਂਪੀਅਨਸ਼ਿਪ ਦਾ ਤਾਜ ਗੁਕੇਸ਼ ਨੂੰ ਸੌਂਪ ਦਿੱਤਾ।

ਗੁਕੇਸ਼ ਦੀ ਸ਼ਾਨਦਾਰ ਯਾਤਰਾ

ਗੁਕੇਸ਼ ਇਸ ਮੈਚ ਦੀ ਸ਼ੁਰੂਆਤ ‘ਚ ਥੋੜ੍ਹਾ ਪਿੱਛੇ ਸੀ ਅਤੇ ਪਹਿਲੀ ਗੇਮ ‘ਚ ਉਸ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਪਰ ਉਸ ਨੇ ਤੀਜੀ ਗੇਮ ‘ਚ ਸ਼ਾਨਦਾਰ ਵਾਪਸੀ ਕੀਤੀ। ਇਸ ਤੋਂ ਬਾਅਦ ਦੋਵਾਂ ਵਿਚਾਲੇ ਸੱਤ ਡਰਾਅ ਰਹੇ। ਗੁਕੇਸ਼ ਨੇ 11ਵੀਂ ਗੇਮ ‘ਚ ਡਿੰਗ ਨੂੰ ਹਰਾਇਆ ਜਦਕਿ 12ਵੀਂ ਗੇਮ ‘ਚ ਡਿੰਗ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਮੈਚ ਡਰਾਅ ਕਰ ਲਿਆ। 13ਵੀਂ ਗੇਮ ‘ਚ ਦਬਾਅ ਬਣਾਉਣ ਤੋਂ ਬਾਅਦ ਵੀ ਗੁਕੇਸ਼ ਨੇ ਡਰਾਅ ਕਰ ਕੇ ਫਾਈਨਲ ਗੇਮ ‘ਚ ਸ਼ਾਨਦਾਰ ਜਿੱਤ ਹਾਸਲ ਕੀਤੀ।

ਇਹ ਸਾਲ ਡੀ ਗੁਕੇਸ਼ ਲਈ ਸੁਪਨਾ ਸਾਬਤ ਹੋਇਆ ਹੈ। ਉਸ ਨੇ ਕੈਂਡੀਡੇਟਸ ਟੂਰਨਾਮੈਂਟ ਜਿੱਤ ਕੇ ਵਿਸ਼ਵ ਚੈਂਪੀਅਨ ਬਣਨ ਵੱਲ ਪਹਿਲਾ ਕਦਮ ਪੁੱਟਿਆ ਅਤੇ ਇਸ ਸਾਲ ਸ਼ਤਰੰਜ ਓਲੰਪੀਆਡ ਵਿੱਚ ਭਾਰਤ ਨੂੰ ਇਤਿਹਾਸਕ ਸੋਨ ਤਮਗਾ ਦਿਵਾਇਆ। ਗੁਕੇਸ਼ ਦੀ ਇਹ ਪ੍ਰਾਪਤੀ ਭਾਰਤੀ ਸ਼ਤਰੰਜ ਲਈ ਇੱਕ ਨਵੀਂ ਉਚਾਈ ਹੈ ਅਤੇ ਉਹ ਹੁਣ ਵਿਸ਼ਵ ਸ਼ਤਰੰਜ ਚੈਂਪੀਅਨਸ਼ਿਪ ਦਾ ਸਭ ਤੋਂ ਘੱਟ ਉਮਰ ਦਾ ਅਤੇ ਵਿਲੱਖਣ ਚੈਂਪੀਅਨ ਬਣ ਗਿਆ ਹੈ।