ਸਿੰਗਾਪੁਰ: ਸਿੰਗਾਪੁਰ ਤੋਂ ਜਾਨਵਰਾਂ ਨਾਲ ਬੇਰਹਿਮੀ ਦੀ ਇੱਕ ਬੇਹੱਦ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਇੱਕ ਔਰਤ ਅਤੇ ਉਸ ਦੇ ਸਾਬਕਾ ਪਤੀ ਨੇ 71 ਬਿੱਲੀਆਂ ਨੂੰ ਕਰੀਬ ਦੋ ਸਾਲ ਤੱਕ ਇੱਕ ਗੰਦੇ ਫਲੈਟ ਵਿੱਚ ਲਾਵਾਰਿਸ ਛੱਡ ਦਿੱਤਾ। ਖਾਣ-ਪੀਣ ਅਤੇ ਦੇਖਭਾਲ ਦੀ ਘਾਟ ਕਾਰਨ 9 ਬਿੱਲੀਆਂ ਦੀ ਮੌਤ ਹੋ ਗਈ, ਜਦਕਿ ਕਈ ਬਿੱਲੀਆਂ ਦੀ ਹਾਲਤ ਬੇਹੱਦ ਖ਼ਰਾਬ ਹੋ ਗਈ ਸੀ। ਇਸ ਮਾਮਲੇ ਵਿੱਚ ਅਦਾਲਤ ਨੇ ਔਰਤ ਨੂੰ 16 ਹਫ਼ਤਿਆਂ ਦੀ ਜੇਲ੍ਹ ਦੀ ਸਜ਼ਾ ਸੁਣਾਈ ਹੈ।
ਅਦਾਲਤ ਨੇ 33 ਸਾਲਾ ਔਰਤ ਨੂਰੁਲ ਨਾਦੀਆ ਨੂਰ ਮੁਹੰਮਦ ਨੂੰ ਜਾਨਵਰਾਂ ਨੂੰ ਬੇਲੋੜੀ ਤਕਲੀਫ਼ ਪਹੁੰਚਾਉਣ ਅਤੇ ਤਸੀਹੇ ਦੇਣ ਨਾਲ ਸਬੰਧਤ 24 ਦੋਸ਼ਾਂ ਵਿੱਚ ਦੋਸ਼ੀ ਕਰਾਰ ਦਿੱਤਾ। ਜੇਲ੍ਹ ਦੀ ਸਜ਼ਾ ਤੋਂ ਇਲਾਵਾ ਉਸ ‘ਤੇ ਅਗਲੇ 12 ਮਹੀਨਿਆਂ ਤੱਕ ਕਿਸੇ ਵੀ ਪਾਲਤੂ ਜਾਨਵਰ ਨੂੰ ਰੱਖਣ ਦੀ ਪਾਬੰਦੀ ਵੀ ਲਗਾਈ ਗਈ ਹੈ। ਉਸ ਦੇ 37 ਸਾਲਾ ਸਾਬਕਾ ਪਤੀ ਮੁਹੰਮਦ ਖ਼ੈਰੁਲ ਨਈਮ ਜੈਨੋਲ ਨੂੰ ਵੀ ਇਸੇ ਮਾਮਲੇ ਵਿੱਚ 16 ਹਫ਼ਤਿਆਂ ਦੀ ਕੈਦ ਸੁਣਾਈ ਜਾ ਚੁੱਕੀ ਹੈ।
ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਦੋਵਾਂ ਨੇ 2018 ਵਿੱਚ ਬੁਕਿਤ ਪੰਜਾਂਗ ਇਲਾਕੇ ਵਿੱਚ ਇੱਕ ਫਲੈਟ ਖਰੀਦਿਆ ਸੀ। ਸਾਲ 2019 ਵਿੱਚ ਉਨ੍ਹਾਂ ਨੇ ਬਿੱਲੀਆਂ ਪਾਲਣੀਆਂ ਸ਼ੁਰੂ ਕੀਤੀਆਂ। ਨਸਬੰਦੀ ਨਾ ਕਰਵਾਉਣ ਕਾਰਨ ਇਨ੍ਹਾਂ ਦੀ ਗਿਣਤੀ ਵਧਦੀ ਗਈ ਅਤੇ ਕੁਝ ਸਮੇਂ ਬਾਅਦ ਫਲੈਟ ਵਿੱਚ 71 ਬਿੱਲੀਆਂ ਹੋ ਗਈਆਂ।
ਅਪ੍ਰੈਲ 2022 ਵਿੱਚ ਦੋਵੇਂ ਆਪਣੀਆਂ ਬਿੱਲੀਆਂ ਨੂੰ ਫਲੈਟ ਵਿੱਚ ਹੀ ਛੱਡ ਕੇ ਆਪਣੇ ਮਾਪਿਆਂ ਦੇ ਘਰ ਰਹਿਣ ਚਲੇ ਗਏ। ਬਿਜਲੀ ਅਤੇ ਪਾਣੀ ਦੇ ਬਿੱਲਾਂ ਦਾ ਭੁਗਤਾਨ ਨਾ ਹੋਣ ਕਾਰਨ ਫਲੈਟ ਦੀਆਂ ਇਹ ਸਹੂਲਤਾਂ ਵੀ ਬੰਦ ਕਰ ਦਿੱਤੀਆਂ ਗਈਆਂ। ਸ਼ੁਰੂਆਤ ਵਿੱਚ ਸਾਬਕਾ ਪਤੀ ਕਦੇ-ਕਦਾਈਂ ਬਾਹਰੋਂ ਖਾਣਾ ਰੱਖ ਜਾਂਦਾ ਸੀ, ਪਰ ਬਾਅਦ ਵਿੱਚ ਉਸ ਨੇ ਫਲੈਟ ਵਿੱਚ ਜਾਣਾ ਵੀ ਬੰਦ ਕਰ ਦਿੱਤਾ।
ਇਸ ਮਾਮਲੇ ਦਾ ਖ਼ੁਲਾਸਾ 20 ਫਰਵਰੀ 2024 ਨੂੰ ਹੋਇਆ, ਜਦੋਂ ਇੱਕ ਗੁਆਂਢੀ ਨੇ ਏਅਰ ਕੰਡੀਸ਼ਨਰ ਦੇ ਛੱਜੇ ‘ਤੇ ਬਹੁਤ ਕਮਜ਼ੋਰ ਹਾਲਤ ਵਿੱਚ ਫਸੀ ਇੱਕ ਬਿੱਲੀ ਨੂੰ ਦੇਖਿਆ ਅਤੇ ਅਧਿਕਾਰੀਆਂ ਨੂੰ ਸੂਚਨਾ ਦਿੱਤੀ। ਜਦੋਂ ਅਧਿਕਾਰੀਆਂ ਨੇ ਫਲੈਟ ਦਾ ਦਰਵਾਜ਼ਾ ਖੋਲ੍ਹਿਆ ਤਾਂ ਅੰਦਰ ਦਾ ਨਜ਼ਾਰਾ ਦੇਖ ਕੇ ਹਰ ਕੋਈ ਹੈਰਾਨ ਰਹਿ ਗਿਆ। ਪੂਰੇ ਘਰ ਵਿੱਚ ਗੰਦਗੀ, ਮਲ-ਮੂਤਰ ਅਤੇ ਅਮੋਨੀਆ ਦੀ ਤੇਜ਼ ਬਦਬੂ ਫੈਲੀ ਹੋਈ ਸੀ।
ਜਾਂਚ ਟੀਮ ਨੂੰ ਫਲੈਟ ਵਿੱਚੋਂ 61 ਜ਼ਿੰਦਾ ਬਿੱਲੀਆਂ ਤੋਂ ਇਲਾਵਾ ਤਿੰਨ ਬਿੱਲੀਆਂ ਦੀਆਂ ਲਾਸ਼ਾਂ, ਛੇ ਖੋਪੜੀਆਂ ਅਤੇ ਹੱਡੀਆਂ ਨਾਲ ਭਰਿਆ ਇੱਕ ਬੈਗ ਮਿਲਿਆ। ਬਚਾਈਆਂ ਗਈਆਂ ਬਿੱਲੀਆਂ ਵਿੱਚੋਂ 44 ਦੀ ਹਾਲਤ ਬਹੁਤ ਕਮਜ਼ੋਰ ਸੀ, ਜਦਕਿ 9 ਬਿੱਲੀਆਂ ਦੀ ਹਾਲਤ ਇੰਨੀ ਗੰਭੀਰ ਸੀ ਕਿ ਉਹ ਮੌਤ ਦੇ ਕੰਢੇ ‘ਤੇ ਸਨ।
ਅਦਾਲਤ ਦੇ ਜ਼ਿਲ੍ਹਾ ਜੱਜ ਕੇਨੇਥ ਚਿਨ ਨੇ ਇਸ ਮਾਮਲੇ ਨੂੰ ਜਾਨਵਰਾਂ ਨੂੰ ਹੱਦ ਤੋਂ ਵੱਧ ਇਕੱਠਾ ਕਰਨ ਅਤੇ ਉਨ੍ਹਾਂ ਦੀ ਦੇਖਭਾਲ ਨਾ ਕਰਨ ਦੇ ਸਭ ਤੋਂ ਗੰਭੀਰ ਮਾਮਲਿਆਂ ਵਿੱਚੋਂ ਇੱਕ ਕਰਾਰ ਦਿੱਤਾ। ਇਸ ਘਟਨਾ ਨੇ ਜਾਨਵਰਾਂ ਦੀ ਸੁਰੱਖਿਆ ਅਤੇ ਉਨ੍ਹਾਂ ਨਾਲ ਕੀਤੇ ਜਾਂਦੇ ਸਲੂਕ ‘ਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
