ਬੰਗਲਾਦੇਸ਼ ਕ੍ਰਿਕਟ ਟੀਮ ਨੇ ਚੁੱਕਿਆ ਵੱਡਾ ਕਦਮ, ਪਾਵਰ ਹਿਟਿੰਗ ਕੋਚ ਨੂੰ ਆਪਣੀ ਕੋਚਿੰਗ ਸਟਾਫ ’ਚ ਕੀਤਾ ਸ਼ਾਮਿਲ

Sports News: ਏ.ਸੀ.ਸੀ (ਏਸ਼ੀਅਨ ਕ੍ਰਿਕਟ ਕੌਂਸਲ) ਨੇ ਪੁਰਸ਼ ਏਸ਼ੀਆ ਕੱਪ 2025 ਦਾ ਸ਼ਡਿਊਲ ਜਾਰੀ ਕਰ ਦਿੱਤਾ ਹੈ। ਗਰੁੱਪ ਸਟੇਜ ਮੈਚ 9 ਸਤੰਬਰ ਤੋਂ ਸ਼ੁਰੂ ਹੋਣਗੇ, ਭਾਰਤ ਅਤੇ ਪਾਕਿਸਤਾਨ ਇੱਕੋ ਗਰੁੱਪ ਵਿੱਚ ਸ਼ਾਮਲ ਹਨ। ਟੂਰਨਾਮੈਂਟ ਦੀ ਤਿਆਰੀ ਕਰ ਰਹੀ ਬੰਗਲਾਦੇਸ਼ ਕ੍ਰਿਕਟ ਟੀਮ ਨੇ ਇੱਕ ਵੱਡਾ ਕਦਮ ਚੁੱਕਿਆ ਹੈ ਪਾਵਰ ਹਿਟਿੰਗ ਕੋਚ ਨੂੰ ਆਪਣੀ ਕੋਚਿੰਗ ਸਟਾਫ ਵਿੱਚ ਸ਼ਾਮਿਲ ਕੀਤਾ ਹੈ। ਕ੍ਰਿਕਬਜ਼ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਵਿਸ਼ਵ ਪ੍ਰਸਿੱਧ ਪਾਵਰ ਹਿਟਿੰਗ ਕੋਚ ਜੂਲੀਅਨ ਵੁੱਡ ਅਗਸਤ ਵਿੱਚ ਬੰਗਲਾਦੇਸ਼ ਟੀਮ ਵਿੱਚ ਸ਼ਾਮਲ ਹੋਣ ਲਈ ਪੂਰੀ ਤਰ੍ਹਾਂ ਤਿਆਰ ਹਨ।

ਏਸ਼ੀਆ ਕੱਪ 2025 ਲਈ ਬੰਗਲਾਦੇਸ਼ ਕ੍ਰਿਕਟ ਟੀਮ 6 ਅਗਸਤ ਤੋਂ ਸ਼ੇਰ-ਏ-ਬੰਗਲਾ ਸਟੇਡੀਅਮ ਵਿੱਚ ਅਭਿਆਸ ਸ਼ੁਰੂ ਕਰੇਗੀ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਜੂਲੀਅਨ ਵੁੱਡ ਇਸ ਅਭਿਆਸ ਕੈਂਪ ਤੋਂ ਪਹਿਲਾਂ ਬੰਗਲਾਦੇਸ਼ ਪਹੁੰਚਣਗੇ ਅਤੇ ਬੱਲੇਬਾਜ਼ਾਂ ਨੂੰ ਪਾਵਰ ਹਿਟਿੰਗ ਦੇ ਗੁਰ ਸਿਖਾਉਣਗੇ। ਪਾਵਰ-ਹਿਟਿੰਗ ਤਕਨੀਕਾਂ ਅਪਣਾ ਕੇ ਇੰਗਲੈਂਡ ਦੀ ਸੀਮਤ ਓਵਰਾਂ ਦੀ ਟੀਮ ਵਿੱਚ ਬਦਲਾਅ ਲਿਆਉਣ ਦਾ ਸ਼੍ਰੇਅ ਵੁੱਡ ਨੂੰ ਜਾਂਦਾ ਹੈ। ਕ੍ਰਿਕਬਜ਼ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਵੁੱਡ ਤਿੰਨ ਹਫ਼ਤਿਆਂ ਲਈ ਬੰਗਲਾਦੇਸ਼ ਕ੍ਰਿਕਟ ਟੀਮ ਦੇ ਨਾਲ ਰਹੇਗਾ ਅਤੇ ਬੱਲੇਬਾਜ਼ਾਂ ਦੇ ਸ਼ਾਟ ਦੀ ਰੇਂਜ ਨੂੰ ਬਿਹਤਰ ਬਣਾਉਣ ਦਾ ਕੰਮ ਕਰੇਗਾ।

ਬੀ.ਸੀ.ਬੀ ਦੇ ਇੱਕ ਉੱਚ ਅਧਿਕਾਰੀ ਨੇ ਕ੍ਰਿਕਬਜ਼ ਨੂੰ ਇਸਦੀ ਪੁਸ਼ਟੀ ਕੀਤੀ ਅਤੇ ਕਿਹਾ, “ਸਾਨੂੰ ਉਮੀਦ ਹੈ ਕਿ ਵੁੱਡ ਏਸ਼ੀਆ ਕੱਪ ਤੋਂ ਪਹਿਲਾਂ ਬੰਗਲਾਦੇਸ਼ ਵਿੱਚ ਸ਼ੁਰੂ ਹੋਣ ਵਾਲੇ ਅਭਿਆਸ ਕੈਂਪ ਤੋਂ ਪਹਿਲਾਂ ਪਹੁੰਚ ਜਾਵੇਗਾ।”

ਜੂਲੀਅਨ ਵੁੱਡ ਨੇ ਕੀ ਕਿਹਾ

ਵੁੱਡ ਨੇ ਕਿਹਾ, “ਹਾਂ ਮੈਂ ਫਿਲ ਸਿਮੰਸ ਨਾਲ ਗੱਲ ਕਰ ਰਿਹਾ ਹਾਂ। ਮੈਂ ਅਗਸਤ ਵਿੱਚ 3 ਹਫ਼ਤਿਆਂ ਲਈ ਉੱਥੇ ਰਹਾਂਗਾ। ਪਰ ਅਜੇ ਇਸਦੀ ਪੁਸ਼ਟੀ ਨਹੀਂ ਹੋਈ ਹੈ, ਪਰ ਸੰਭਾਵਨਾ ਜ਼ਿਆਦਾ ਹੈ। ਮੈਂ ਅਗਸਤ ਵਿੱਚ ਏਸ਼ੀਆ ਕੱਪ ਤੋਂ ਪਹਿਲਾਂ ਢਾਕਾ ਵਿੱਚ ਰਹਾਂਗਾ, ਏਸ਼ੀਆ ਕੱਪ ਤੋਂ ਬਾਅਦ ਨਹੀਂ ਜਾਣਦਾ। ਇਹ ਬੀ.ਸੀ.ਬੀ ‘ਤੇ ਨਿਰਭਰ ਕਰਦਾ ਹੈ।”

ਉਨ੍ਹਾਂ ਕਿਹਾ, “ਬੰਗਲਾਦੇਸ਼ ਟੀਮ ਵਿੱਚ ਬਹੁਤ ਪ੍ਰਤਿਭਾ ਹੈ। ਅੱਜ ਦੇ ਸਮੇਂ ਵਿੱਚ, ਸੀਮਤ ਓਵਰਾਂ ਵਿੱਚ ਪਾਵਰ ਹਿਟਿੰਗ ਬਹੁਤ ਮਹੱਤਵਪੂਰਨ ਹੋ ਗਈ ਹੈ। ਮੇਰਾ ਕੰਮ ਉਨ੍ਹਾਂ ਨੂੰ ਆਪਣੀ ਤਾਕਤ ਦੀ ਵਰਤੋਂ ਕਿਵੇਂ ਕਰਨੀ ਹੈ, ਆਪਣੀ ਊਰਜਾ ਕਿਵੇਂ ਲਗਾਉਣੀ ਹੈ, ਇਸ ਬਾਰੇ ਮਹੱਤਵਪੂਰਨ ਗੱਲ ਦੱਸਣਾ ਹੈ। ਮੈਂ ਇਸ ਦੀ ਬੇਸਬਰੀ ਨਾਲ ਉਡੀਕ ਕਰ ਰਿਹਾ ਹਾਂ, ਉਹ ਲੰਬੇ ਸਮੇਂ ਤੋਂ ਇਸ ਬਾਰੇ ਗੱਲ ਕਰ ਰਹੇ ਹਨ ਪਰ ਹੁਣ ਇਹ ਹੋ ਰਿਹਾ ਹੈ ਅਤੇ ਮੈਂ ਇਸ ਤੋਂ ਖੁਸ਼ ਹਾਂ।”

ਏਸ਼ੀਆ ਕੱਪ ਦੇ ਗਰੁੱਪ ਏ ਵਿੱਚ ਭਾਰਤ ਅਤੇ ਪਾਕਿਸਤਾਨ

ਏਸ਼ੀਆ ਕੱਪ ਦੇ ਗਰੁੱਪ ਏ ਵਿੱਚ ਭਾਰਤੀ ਟੀਮ ਅਤੇ ਪਾਕਿਸਤਾਨ ਟੀਮ ਦੇ ਨਾਲ, ਯੂ.ਏ.ਈ ਅਤੇ ਓਮਾਨ ਹਨ। ਬੰਗਲਾਦੇਸ਼ ਦੀ ਟੀਮ ਗਰੁੱਪ ਬੀ ਵਿੱਚ ਹੈ, ਉਨ੍ਹਾਂ ਦੇ ਨਾਲ ਸ਼੍ਰੀਲੰਕਾ, ਅਫਗਾਨਿਸਤਾਨ ਅਤੇ ਹਾਂਗਕਾਂਗ ਹਨ। ਪਹਿਲਾ ਮੈਚ 9 ਸਤੰਬਰ ਨੂੰ ਅਫਗਾਨਿਸਤਾਨ ਅਤੇ ਹਾਂਗਕਾਂਗ ਵਿਚਕਾਰ ਹੈ। ਯੂਏਈ ਵਿੱਚ ਹੋਣ ਵਾਲੇ ਏਸ਼ੀਆ ਕੱਪ ਵਿੱਚ ਟੀਮ ਇੰਡੀਆ ਦਾ ਪਹਿਲਾ ਮੈਚ 10 ਸਤੰਬਰ ਨੂੰ ਯੂ.ਏ.ਈ ਨਾਲ ਹੈ। ਭਾਰਤ ਬਨਾਮ ਪਾਕਿਸਤਾਨ ਮੈਚ 14 ਸਤੰਬਰ ਨੂੰ ਹੈ।