ਸੋਨੀਪਤ: ਹਰਿਆਣਾ ਦੇ ਸੋਨੀਪਤ ਜ਼ਿਲ੍ਹੇ (Sonepat District) ‘ਚ ਪ੍ਰਸ਼ਾਸਨ ਵੱਲੋਂ ਵੱਡੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਐਸ.ਡੀ.ਐਮ. ਅਦਾਲਤ ਨੇ ਜ਼ਿਲ੍ਹੇ ਦੇ ਸਲੀਮਪੁਰ ਟਰਾਲੀ ਪਿੰਡ ਵਿੱਚ ਨਾਜਾਇਜ਼ ਕਬਜ਼ੇ (Illegal Encroachment) ਹਟਾਉਣ ਲਈ ਕਾਰਵਾਈ ਦੇ ਆਦੇਸ਼ ਦਿੱਤੇ ਹਨ। ਇਹ ਜਾਣਕਾਰੀ ਮਿਲਣ ‘ਤੇ ਪੂਰੇ ਪਿੰਡ ‘ਚ ਹਫੜਾ-ਦਫੜੀ ਮਚ ਗਈ। 7 ਫਰਵਰੀ ਨੂੰ ਪਿੰਡ ਦੇ 177 ਘਰਾਂ ‘ਤੇ ਬੁਲਡੋਜ਼ਰ ਦੀ ਕਾਰਵਾਈ ਕੀਤੀ ਜਾਵੇਗੀ। ਇਸ ਤੋਂ ਪਹਿਲਾਂ ਸਾਰੇ ਘਰਾਂ ਦੇ ਬਾਹਰ ਨੋਟਿਸ ਚਿਪਕਾਏ ਜਾ ਚੁੱਕੇ ਹਨ।
ਦਰਅਸਲ, ਸਲੀਮਪੁਰ ਪਿੰਡ ਪਹਿਲਾਂ ਜੁਆ-2 ਦੀ ਪੰਚਾਇਤ ਦੇ ਅਧੀਨ ਆਉਂਦਾ ਸੀ। ਸਮੇਂ ਦੇ ਨਾਲ, ਹੌਲੀ ਹੌਲੀ ਪਿੰਡ ਦੇ ਲੋਕ ਪੰਚਾਇਤੀ ਜ਼ਮੀਨ ‘ਤੇ ਵਸ ਗਏ ਅਤੇ ਆਪਣੇ ਪੱਕੇ ਮਕਾਨ ਬਣਾ ਲਏ। ਇਸ ਦੇ ਵਿਰੋਧ ਵਿੱਚ ਸਾਬਕਾ ਸਰਪੰਚ ਰਘਬੀਰ ਨੇ ਵੀ ਸ਼ਿਕਾਇਤ ਕੀਤੀ ਸੀ ਕਿ ਪੂਰਾ ਪਿੰਡ ਨਾਜਾਇਜ਼ ਜ਼ਮੀਨ ‘ਤੇ ਵਸਿਆ ਹੋਇਆ ਹੈ।
ਤਹਿਸੀਲਦਾਰ ਸੋਨੀਪਤ ਦੇ ਦਫ਼ਤਰ ਵੱਲੋਂ ਜਾਰੀ ਆਦੇਸ਼ ਅਨੁਸਾਰ ਇਹ ਕਾਰਵਾਈ ਐਚ.ਸੀ.ਐਸ. ਸਬ-ਡਵੀਜ਼ਨਲ ਅਫਸਰ ਅਤੇ ਸਹਾਇਕ ਕੁਲੈਕਟਰ ਫਸਟ ਕਲਾਸ ਸੋਨੀਪਤ ਅਮਿਤ ਕੁਮਾਰ ਦੀ ਅਦਾਲਤ ਦੇ ਆਦੇਸ਼ ‘ਤੇ ਕੀਤੀ ਜਾਵੇਗੀ। ਇਸ ਮਾਮਲੇ ‘ਚ ਐਮ.ਡੀ.ਐਮ. ਦੇ ਆਦੇਸ਼ ਤੋਂ ਬਾਅਦ ਪਿੰਡ ਦੇ ਸਰਪੰਚ ਅਤੇ ਚੌਕੀਦਾਰ ਨੂੰ ਨੋਟਿਸ ਭੇਜ ਕੇ ਜਾਣਕਾਰੀ ਦਿੱਤੀ ਗਈ ਹੈ। ਇਹ ਕੇਸ ਰਘਬੀਰ ਪੁੱਤਰ ਦਿਲਬਾਗ ਸਿੰਘ ਆਦਿ ਬਨਾਮ ਅਨੂਵਾਨ ਵਿਚਕਾਰ ਚੱਲ ਰਿਹਾ ਹੈ।
7 ਫਰਵਰੀ ਨੂੰ ਪਿੰਡ ਵਿੱਚ ਨਾਜਾਇਜ਼ ਮਕਾਨਾਂ ਵਿਰੁੱਧ ਕਾਰਵਾਈ ਕੀਤੀ ਜਾਵੇਗੀ। ਇਸ ਲਈ ਤਹਿਸੀਲਦਾਰ ਨੇ ਪਿੰਡ ਸਲੀਮਪੁਰ ਟਰੋਲੀ ਦੇ ਪਟਵਾਰੀ ਨੂੰ ਨਿੱਜੀ ਤੌਰ ‘ਤੇ ਮੌਕੇ ‘ਤੇ ਪਹੁੰਚ ਕੇ ਦੋਵਾਂ ਧਿਰਾਂ ਨੂੰ ਸੂਚਿਤ ਕਰਨ ਦੇ ਆਦੇਸ਼ ਦਿੱਤੇ ਹਨ। ਇਹ ਵੀ ਕਿਹਾ ਗਿਆ ਹੈ ਕਿ ਅਦਾਲਤ ਦੇ ਆਦੇਸ਼ ਦੀ ਪਾਲਣਾ ਨੂੰ ਵੀ ਯਕੀਨੀ ਬਣਾਇਆ ਜਾਵੇ। ਇਸ ਕਾਰਵਾਈ ਤੋਂ ਪਹਿਲਾਂ ਪਿੰਡ ਦੇ ਲੋਕਾਂ ‘ਚ ਤਣਾਅ ਹੈ, ਕਿਉਂਕਿ ਜ਼ਿਆਦਾਤਰ ਲੋਕਾਂ ਦੇ ਘਰ ‘ਤੇ ਪ੍ਰਸ਼ਾਸਨ ਦੀ ਤਲਵਾਰ ਲਟਕ ਰਹੀ ਹੈ। ਪ੍ਰਸ਼ਾਸਨ ਵੱਲੋਂ ਕਿਹਾ ਗਿਆ ਹੈ ਕਿ ਕਿਸੇ ਨਾਲ ਵੀ ਭੇਦਭਾਵ ਨਹੀਂ ਕੀਤਾ ਜਾਵੇਗਾ। ਅਦਾਲਤ ਦੇ ਆਦੇਸ਼ ਅਨੁਸਾਰ ਕਾਰਵਾਈ ਕੀਤੀ ਜਾਵੇਗੀ।
