ਉੱਤਰ ਪ੍ਰਦੇਸ਼ : ਉੱਤਰ ਪ੍ਰਦੇਸ਼ ਦੇ 18 ਸ਼ਹਿਰਾਂ ਵਿੱਚ ਜਨਤਕ ਆਵਾਜਾਈ ਦੀ ਸਹੂਲਤ ਵਧਾਉਣ ਲਈ ਯੋਗੀ ਸਰਕਾਰ 1,725 ਏ.ਸੀ. ਇਲੈਕਟ੍ਰਿਕ ਬੱਸਾਂ ਚਲਵਾਏਗੀ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਦੀ ਪ੍ਰਧਾਨਗੀ ਹੇਠ ਅੱਜ ਯਾਨੀ ਸ਼ੁੱਕਰਵਾਰ ਨੂੰ ਹੋਈ ਕੈਬਨਿਟ ਮੀਟਿੰਗ ਵਿੱਚ ਇਸ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ। ਲਖਨਊ, ਕਾਨਪੁਰ, ਵਾਰਾਣਸੀ, ਪ੍ਰਯਾਗਰਾਜ, ਅਯੁੱਧਿਆ, ਗੋਰਖਪੁਰ ਅਤੇ ਆਗਰਾ ਸਮੇਤ 18 ਸ਼ਹਿਰਾਂ ਵਿੱਚ ਇਹ ਬੱਸਾਂ ਚਲਾਈਆਂ ਜਾਣਗੀਆਂ।
ਨੋਇਡਾ ਦੇ ਨਾਲ ਜੇਵਰ ਨੂੰ ਵੀ ਇਸ ਯੋਜਨਾ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਸਰਕਾਰ ਨੇ ਬੱਸਾਂ ਦੇ ਸੰਚਾਲਨ ਲਈ ਗ੍ਰੌਸ ਕਾਸਟ ਕੰਟਰੈਕਟ (GCC) ਮਾਡਲ ਅਪਣਾਉਣ ਦਾ ਫ਼ੈਸਲਾ ਕੀਤਾ ਹੈ। ਇਸ ਤਹਿਤ ਬੱਸਾਂ ਦੀ ਖਰੀਦ ਨਿੱਜੀ ਆਪਰੇਟਰ ਕਰਨਗੇ, ਜਦਕਿ ਯਾਤਰੀਆਂ ਦਾ ਕਿਰਾਇਆ ਸੂਬਾ ਸਰਕਾਰ ਤੈਅ ਕਰੇਗੀ।
ਕੈਬਨਿਟ ਦੇ ਫ਼ੈਸਲੇ ਦੇ ਅਨੁਸਾਰ, ਕੁੱਲ 1,725 ਏਸੀ ਇਲੈਕਟ੍ਰਿਕ ਬੱਸਾਂ ਦਾ ਪ੍ਰਾਈਵੇਟ ਆਪਰੇਟਰਾਂ ਦੁਆਰਾ ਚਲਾਈਆਂ ਜਾਣਗੀਆਂ। ਇਸ ਲਈ ਵਪਾਰਕ ਸੰਚਾਲਨ ਸ਼ੁਰੂ ਹੋਣ ਦੀ ਮਿਤੀ ਤੋਂ 12 ਸਾਲ ਦਾ ਇਕਰਾਰਨਾਮਾ ਹੋਵੇਗਾ। ਨਿੱਜੀ ਸੇਵਾ ਪ੍ਰਦਾਤਾਵਾਂ ਨੂੰ ਉਤਸ਼ਾਹਿਤ ਕਰਨ ਲਈ ਬੱਸਾਂ ਦੀ ਖਰੀਦ ‘ਤੇ ਸਰਕਾਰੀ ਸਬਸਿਡੀ ਵੀ ਦਿੱਤੀ ਜਾਵੇਗੀ।
ਹਰੇਕ ਬੱਸ ‘ਤੇ 35 ਤੋਂ 40 ਲੱਖ ਰੁਪਏ ਦੀ ਸਬਸਿਡੀ
ਯੋਜਨਾ ਤਹਿਤ 12 ਮੀਟਰ ਲੰਬੀ ਹਰੇਕ ਇਲੈਕਟ੍ਰਿਕ ਬੱਸ ‘ਤੇ 40 ਲੱਖ ਰੁਪਏ ਅਤੇ 9 ਮੀਟਰ ਲੰਬੀ ਬੱਸ ‘ਤੇ 35 ਲੱਖ ਰੁਪਏ ਦੀ ਸਬਸਿਡੀ ਦਿੱਤੀ ਜਾਵੇਗੀ। ਪ੍ਰਾਈਵੇਟ ਆਪਰੇਟਰਾਂ ਨੂੰ ਪਹਿਲਾਂ ਤੋਂ ਨਿਰਧਾਰਤ ਪ੍ਰਦਰਸ਼ਨ ਮਾਪਦੰਡਾਂ ਦੇ ਆਧਾਰ ‘ਤੇ ਸੰਚਾਲਨ ਅਤੇ ਰੱਖ-ਰਖਾਅ ਦੀ ਫੀਸ ਦਾ ਭੁਗਤਾਨ ਕੀਤਾ ਜਾਵੇਗਾ। ਸਰਕਾਰ ਨੇ ਬੱਸਾਂ ਦੇ ਸੰਚਾਲਨ ਦੇ ਨਾਲ-ਨਾਲ ਵਿੱਤੀ ਪ੍ਰਬੰਧ ਵੀ ਤੈਅ ਕਰ ਦਿੱਤੇ ਹਨ।
ਪੂਰੀ ਜ਼ਿੰਮੇਵਾਰੀ ਆਪਰੇਟਰ ਦੀ ਹੋਵੇਗੀ
ਗ੍ਰੌਸ ਕਾਸਟ ਕੰਟਰੈਕਟ ਮਾਡਲ ਤਹਿਤ ਬੱਸਾਂ ਦੀ ਖਰੀਦ, ਚਾਰਜਿੰਗ ਲਈ ਲੋੜੀਂਦੇ ਉਪਕਰਨਾਂ ਦਾ ਪ੍ਰਬੰਧ, ਡਰਾਈਵਰਾਂ ਅਤੇ ਤਕਨੀਕੀ ਕਰਮਚਾਰੀਆਂ ਦੀ ਤਾਇਨਾਤੀ ਪ੍ਰਾਈਵੇਟ ਆਪਰੇਟਰ ਕਰਨਗੇ। ਬੱਸਾਂ ਦਾ ਨਿਯਮਤ ਸੰਚਾਲਨ ਅਤੇ ਰੱਖ-ਰਖਾਅ ਵੀ ਉਨ੍ਹਾਂ ਦੀ ਹੀ ਜ਼ਿੰਮੇਵਾਰੀ ਹੋਵੇਗੀ। ਯਾਤਰੀਆਂ ਤੋਂ ਲਿਆ ਜਾਣ ਵਾਲਾ ਕਿਰਾਇਆ ਸੂਬਾ ਸਰਕਾਰ ਤੈਅ ਕਰੇਗੀ।
ਡਿਪੂ ਬਣਾਉਣ ਲਈ ਮੁਫ਼ਤ ਮਿਲੇਗੀ ਜ਼ਮੀਨ
ਇਲੈਕਟ੍ਰਿਕ ਬੱਸਾਂ ਦੇ ਸੰਚਾਲਨ ਲਈ ਡਿਪੂ ਬਣਾਉਣ ਵਾਸਤੇ ਲੋੜ ਅਨੁਸਾਰ ਸਬੰਧਤ ਨਗਰ ਨਿਗਮ ਅਤੇ ਨੋਇਡਾ ਅਥਾਰਟੀ ਮੁਫ਼ਤ ਜ਼ਮੀਨ ਮੁਹੱਈਆ ਕਰਵਾਉਣਗੇ। ਸ਼ਹਿਰੀ ਆਵਾਜਾਈ ਨਿਰਦੇਸ਼ਾਲਾ ਸਿਟੀ ਬੱਸ ਸੇਵਾਵਾਂ ਨਾਲ ਸਬੰਧਤ ਯੋਜਨਾਵਾਂ ਨੂੰ ਲਾਗੂ ਕਰਨ ਅਤੇ ਉਨ੍ਹਾਂ ਦੀ ਨਿਗਰਾਨੀ ਦਾ ਕੰਮ ਕਰਦਾ ਹੈ।
15 ਨਗਰ ਨਿਗਮਾਂ ਵਿੱਚ ਚੱਲ ਰਹੀਆਂ ਹਨ 743 ਇਲੈਕਟ੍ਰਿਕ ਬੱਸਾਂ
ਉੱਤਰ ਪ੍ਰਦੇਸ਼ ਵਿੱਚ ਇਸ ਸਮੇਂ 15 ਨਗਰ ਨਿਗਮਾਂ ਵਿੱਚ 743 ਇਲੈਕਟ੍ਰਿਕ ਬੱਸਾਂ ਚਲਾਈਆਂ ਜਾ ਰਹੀਆਂ ਹਨ। ਇਨ੍ਹਾਂ ਵਿੱਚੋਂ 700 ਬੱਸਾਂ ਗ੍ਰੌਸ ਕਾਸਟ ਕੰਟਰੈਕਟ ਮਾਡਲ ਤਹਿਤ ਚੱਲ ਰਹੀਆਂ ਹਨ। ਹੁਣ ਸਰਕਾਰ ਨੇ ਸ਼ਹਿਰੀ ਆਵਾਜਾਈ ਸੇਵਾਵਾਂ ਦਾ ਵਿਸਥਾਰ ਕਰਦਿਆਂ 18 ਸ਼ਹਿਰਾਂ ਵਿੱਚ 1,725 ਏਸੀ ਇਲੈਕਟ੍ਰਿਕ ਬੱਸਾਂ ਚਲਾਉਣ ਦਾ ਫ਼ੈਸਲਾ ਕੀਤਾ ਹੈ।
ਇਨ੍ਹਾਂ 18 ਸ਼ਹਿਰਾਂ ਵਿੱਚ ਚੱਲਣਗੀਆਂ ਇਲੈਕਟ੍ਰਿਕ ਬੱਸਾਂ
ਆਗਰਾ, ਅਲੀਗੜ੍ਹ, ਅਯੁੱਧਿਆ, ਬਰੇਲੀ, ਫ਼ਿਰੋਜ਼ਾਬਾਦ, ਗਾਜ਼ੀਆਬਾਦ, ਗੋਰਖਪੁਰ, ਝਾਂਸੀ, ਕਾਨਪੁਰ, ਲਖਨਊ, ਮਥੁਰਾ-ਵ੍ਰਿੰਦਾਵਨ, ਮੇਰਠ, ਮੁਰਾਦਾਬਾਦ, ਪ੍ਰਯਾਗਰਾਜ, ਸ਼ਾਹਜਹਾਂਪੁਰ, ਸਹਾਰਨਪੁਰ, ਵਾਰਾਣਸੀ ਅਤੇ ਨੋਇਡਾ (ਜੇਵਰ ਸਮੇਤ) ਵਿੱਚ ਇਲੈਕਟ੍ਰਿਕ ਬੱਸਾਂ ਚਲਾਈਆਂ ਜਾਣਗੀਆਂ।
