Home Sports News ਪਾਕਿਸਤਾਨ ਕ੍ਰਿਕਟ ਟੀਮ ’ਚ ਨਵੀਂ ਸ਼ੁਰੂਆਤ, ਕਈ ਦਿੱਗਜ ਖਿਡਾਰੀਆਂ ਦੀ ਛੁੱਟੀ

ਪਾਕਿਸਤਾਨ ਕ੍ਰਿਕਟ ਟੀਮ ’ਚ ਨਵੀਂ ਸ਼ੁਰੂਆਤ, ਕਈ ਦਿੱਗਜ ਖਿਡਾਰੀਆਂ ਦੀ ਛੁੱਟੀ

0

Sports News : ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਨੇ ਨਵੇਂ ਸੈਂਟਰਲ ਕੰਟਰੈਕਟ ਦਾ ਐਲਾਨ ਕਰਦਿਆਂ ਟੀਮ ਵਿੱਚ ਵੱਡਾ ਫੇਰਬਦਲ ਕੀਤਾ ਹੈ। ਇਸ ਨਵੀਂ ਸੂਚੀ ਵਿੱਚ ਮੁਹੰਮਦ ਰਿਜ਼ਵਾਨ ਅਤੇ ਇਮਾਮ-ਉਲ-ਹੱਕ ਸਮੇਤ ਕਈ ਤਜਰਬੇਕਾਰ ਖਿਡਾਰੀਆਂ ਨੂੰ ਜਗ੍ਹਾ ਨਹੀਂ ਦਿੱਤੀ ਗਈ। ਇਨ੍ਹਾਂ ਦੋਵਾਂ ਨੂੰ ਇੰਗਲੈਂਡ ਦੌਰੇ ਦੌਰਾਨ ਡ੍ਰੈਸਿੰਗ ਰੂਮ ਦੀਆਂ ਜਾਣਕਾਰੀਆਂ ਲੀਕ ਕਰਨ ਦੇ ਦੋਸ਼ਾਂ ਤੋਂ ਬਾਅਦ ਦੌਰੇ ਦੇ ਵਿਚਕਾਰ ਹੀ ਟੀਮ ਤੋਂ ਬਾਹਰ ਕਰ ਦਿੱਤਾ ਗਿਆ ਸੀ।

ਰਿਪੋਰਟਾਂ ਮੁਤਾਬਕ, ਹੁਣ PCB ਨੇ ਦੋਵਾਂ ਨੂੰ ਸੈਂਟਰਲ ਕੰਟਰੈਕਟ ਸੂਚੀ ਤੋਂ ਵੀ ਬਾਹਰ ਕਰ ਦਿੱਤਾ ਹੈ। ਇਨ੍ਹਾਂ ਤੋਂ ਇਲਾਵਾ ਸਾਬਕਾ ਟੈਸਟ ਕਪਤਾਨ ਸ਼ਾਨ ਮਸੂਦ ਅਤੇ ਓਪਨਰ ਸਾਈਮ ਅਯੂਬ ਨੂੰ ਵੀ ਨਵੇਂ ਕੰਟਰੈਕਟ ਵਿੱਚ ਜਗ੍ਹਾ ਨਹੀਂ ਮਿਲੀ। ਅਬਦੁੱਲਾ ਸ਼ਫੀਕ, ਵਸੀਮ ਜੂਨੀਅਰ, ਮੁਹੰਮਦ ਹੈਰਿਸ ਅਤੇ ਖੁਰਮ ਸ਼ਹਿਜ਼ਾਦ ਵੀ ਇਸ ਸੂਚੀ ਤੋਂ ਬਾਹਰ ਹਨ।

ਨੌਜਵਾਨ ਖਿਡਾਰੀਆਂ ਨੂੰ ਮੌਕਾ ਦੇਣ ਦੀ ਤਿਆਰੀ

ਰਿਪੋਰਟਾਂ ਅਨੁਸਾਰ, ਪਾਕਿਸਤਾਨ ਦੇ ਨਵੇਂ ਟੈਸਟ ਕੋਚ ਮਾਈਕ ਹੇਸਨ ਟੀਮ ਵਿੱਚ ਨੌਜਵਾਨ ਖਿਡਾਰੀਆਂ ਨੂੰ ਵਧੇਰੇ ਮੌਕੇ ਦੇਣਾ ਚਾਹੁੰਦੇ ਹਨ। ਇਸ ਦੇ ਨਾਲ ਹੀ ਟੀਮ ਨੂੰ ਨਵੇਂ ਸਿਰੇ ਤੋਂ ਤਿਆਰ ਕਰਨ ਦੀ ਯੋਜਨਾ ਬਣਾਈ ਜਾ ਰਹੀ ਹੈ। ਇਸੇ ਰਣਨੀਤੀ ਤਹਿਤ PCB ਨੇ ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਵਾਰ ਸੈਂਟਰਲ ਕੰਟਰੈਕਟ ਦੇ ਮਾਡਲ ਵਿੱਚ ਵੱਡੀਆਂ ਤਬਦੀਲੀਆਂ ਕੀਤੀਆਂ ਹਨ।

ਖਿਡਾਰੀਆਂ ਨੂੰ ਫਾਰਮੈਟ ਮੁਤਾਬਕ ਮਿਲੇ ਕੰਟਰੈਕਟ

ਨਵੇਂ ਮਾਡਲ ਤਹਿਤ ਬਾਬਰ ਆਜ਼ਮ ਅਤੇ ਸਲਮਾਨ ਅਲੀ ਆਗਾ ਨੂੰ ਸਿਰਫ਼ ਟੈਸਟ ਅਤੇ ਵਨਡੇ ਫਾਰਮੈਟ ਲਈ ਕੰਟਰੈਕਟ ਦਿੱਤਾ ਗਿਆ ਹੈ। ਜਦਕਿ ਅਜ਼ਾਨ ਅਵੈਸ, ਮੁਹੰਮਦ ਅੱਬਾਸ, ਸਾਜਿਦ ਖ਼ਾਨ ਅਤੇ ਸਾਊਦ ਸ਼ਕੀਲ ਨੂੰ ਸਿਰਫ਼ ਟੈਸਟ ਕ੍ਰਿਕਟ ਲਈ ਚੁਣਿਆ ਗਿਆ ਹੈ।

ਇਸੇ ਤਰ੍ਹਾਂ ਅਬਰਾਰ ਅਹਿਮਦ, ਅਰਾਫਾਤ ਮਿਨਹਾਸ, ਫਖ਼ਰ ਜ਼ਮਾਂ, ਫਹੀਮ ਅਸ਼ਰਫ਼, ਹਾਰਿਸ ਰਊਫ਼ ਅਤੇ ਸ਼ਾਹੀਨ ਸ਼ਾਹ ਅਫ਼ਰੀਦੀ ਨੂੰ ਵਨਡੇ ਅਤੇ ਟੀ-20 ਫਾਰਮੈਟ ਦੇ ਕੰਟਰੈਕਟ ਦਿੱਤੇ ਗਏ ਹਨ। ਇਸ ਤੋਂ ਇਲਾਵਾ ਅੰਡਰ-19 ਟੀਮ ਦੇ ਕਈ ਉੱਭਰਦੇ ਖਿਡਾਰੀਆਂ ਨੂੰ ਡਿਵੈਲਪਮੈਂਟ ਕੰਟਰੈਕਟ ਸੂਚੀ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।

ਜੁਲਾਈ 2026 ਤੋਂ ਲਾਗੂ ਹੋਣਗੇ ਨਵੇਂ ਕੰਟਰੈਕਟ

ਪਾਕਿਸਤਾਨੀ ਕ੍ਰਿਕਟਰਾਂ ਨੂੰ ਇਸ ਸਾਲ ਜੂਨ ਤੋਂ ਨਵੇਂ ਸੈਂਟਰਲ ਕੰਟਰੈਕਟ ਦੀ ਉਡੀਕ ਸੀ। ਹੁਣ ਜਾਰੀ ਕੀਤੀ ਗਈ ਸੂਚੀ ਮੁਤਾਬਕ ਇਹ ਕੰਟਰੈਕਟ ਜੁਲਾਈ 2026 ਤੋਂ ਲਾਗੂ ਹੋਣਗੇ ਅਤੇ ਜੂਨ 2027 ਤੱਕ ਜਾਰੀ ਰਹਿਣਗੇ।

ਜ਼ਿਕਰਯੋਗ ਹੈ ਕਿ ਪਾਕਿਸਤਾਨੀ ਟੀਮ ਨੇ ਹਾਲ ਹੀ ਵਿੱਚ ਸ਼੍ਰੀਲੰਕਾ ਨੂੰ ਦੋ ਮੈਚਾਂ ਦੀ ਟੈਸਟ ਸੀਰੀਜ਼ ਵਿੱਚ 1-0 ਨਾਲ ਹਰਾਇਆ ਹੈ। ਇਸ ਜਿੱਤ ਨਾਲ ਪਾਕਿਸਤਾਨ ਨੇ ਦੋ ਸਾਲਾਂ ਬਾਅਦ ਆਪਣੀ ਪਹਿਲੀ ਟੈਸਟ ਸੀਰੀਜ਼ ਜਿੱਤ ਦਰਜ ਕੀਤੀ ਹੈ।

NO COMMENTS

LEAVE A REPLY

Please enter your comment!
Please enter your name here

Exit mobile version