ਓਨਟਾਰੀਓ ਦੀ ਡਰਹਮ ਰੀਜਨਲ ਪੁਲਿਸ ਨੇ ਇੱਕ ਵੱਡੀ ਜਾਂਚ ਮੁਹਿੰਮ ‘Project Jetsetter’ ਦੇ ਨਤੀਜਿਆਂ ਦਾ ਐਲਾਨ ਕਰਦਿਆਂ ਦੱਸਿਆ ਹੈ ਕਿ ਅੰਤਰਰਾਸ਼ਟਰੀ ਸੰਗਠਿਤ ਅਪਰਾਧਿਕ ਗਿਰੋਹਾਂ ਖ਼ਿਲਾਫ਼ ਕੀਤੀ ਗਈ ਕਾਰਵਾਈ ਦੌਰਾਨ 46 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਜਦਕਿ 164 ਹੋਰ ਸ਼ੱਕੀ ਅਜੇ ਵੀ ਪੁਲਿਸ ਨੂੰ ਲੋੜੀਂਦੇ ਹਨ।
ਪੁਲਿਸ ਅਨੁਸਾਰ ਇਹ ਲੰਬੀ ਜਾਂਚ 2019 ਤੋਂ ਚੱਲ ਰਹੀ ਸੀ ਅਤੇ ਇਸ ਦੌਰਾਨ ਗ੍ਰੇਟਰ ਟੋਰਾਂਟੋ ਏਰੀਆ (GTA) ਵਿੱਚ ਵਾਪਰੀਆਂ 200 ਤੋਂ ਵੱਧ ਅਪਰਾਧਿਕ ਘਟਨਾਵਾਂ ਨੂੰ ਸੰਗਠਿਤ ਅਪਰਾਧਿਕ ਨੈੱਟਵਰਕਾਂ ਨਾਲ ਜੋੜਿਆ ਗਿਆ ਹੈ। ਜਾਂਚ ਦੌਰਾਨ 1,440 ਤੋਂ ਵੱਧ ਦੋਸ਼ ਲਗਾਏ ਗਏ ਅਤੇ ਸਿਰਫ਼ ਡਰਹਮ ਰੀਜਨ ਵਿੱਚ ਹੀ ਪੀੜਤਾਂ ਨੂੰ 2.6 ਮਿਲੀਅਨ ਡਾਲਰ ਤੋਂ ਵੱਧ ਦਾ ਨੁਕਸਾਨ ਹੋਣ ਦੀ ਪੁਸ਼ਟੀ ਹੋਈ ਹੈ।
ਪੁਲਿਸ ਨੇ ਦੱਸਿਆ ਕਿ ਇਸ ਨੈੱਟਵਰਕ ਨਾਲ ਜੁੜੇ ਲੋਕ ਕੈਨੇਡਾ ਵਿੱਚ ਆ ਕੇ ਉੱਚ ਮੁਨਾਫ਼ੇ ਵਾਲੇ ਅਪਰਾਧਾਂ ਨੂੰ ਅੰਜਾਮ ਦਿੰਦੇ ਸਨ। ਇਨ੍ਹਾਂ ਵਿੱਚ ਵੱਡੇ ਪੱਧਰ ਦੀਆਂ ਰਿਟੇਲ ਚੋਰੀਆਂ, ਵਾਹਨ ਖਰੀਦਦਾਰੀ ਘੁਟਾਲੇ, ਵਾਹਨ ਫਾਇਨੈਂਸਿੰਗ ਧੋਖਾਧੜੀ, ਬੀਮਾ ਕਲੇਮ ਲਈ ਜਾਅਲੀ ਟੱਕਰਾਂ, ਗਹਿਣੇ ਚੋਰੀ ਕਰਨ ਲਈ ਧਿਆਨ ਭਟਕਾਉਣ ਵਾਲੀਆਂ ਵਾਰਦਾਤਾਂ ਅਤੇ ਵਾਹਨਾਂ ਤੇ ਹੋਰ ਕੀਮਤੀ ਸ
ਮਾਨ ਦੀ ਚੋਰੀ ਕਰਕੇ ਨਿਰਯਾਤ ਕਰਨਾ ਸ਼ਾਮਲ ਹੈ।
ਜਾਂਚ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਖਾਸ ਤੌਰ ‘ਤੇ ਗਹਿਣੇ ਚੋਰੀ ਕਰਨ ਵਾਲੀਆਂ ਵਾਰਦਾਤਾਂ ਵਿੱਚ ਵਾਧਾ ਦੇਖਿਆ ਗਿਆ ਹੈ। ਇਨ੍ਹਾਂ ਮਾਮਲਿਆਂ ਵਿੱਚ ਅਕਸਰ ਬਜ਼ੁਰਗਾਂ ਨੂੰ ਨਿਸ਼ਾਨਾ ਬਣਾਇਆ ਜਾਂਦਾ ਸੀ ਅਤੇ ਸ਼ੱਕੀ ਵਿਅਕਤੀ ਮਦਦ, ਤੋਹਫ਼ੇ ਜਾਂ ਗੱਲਬਾਤ ਦੇ ਬਹਾਨੇ ਨਾਲ ਕੀਮਤੀ ਗਹਿਣੇ ਚੋਰੀ ਕਰ ਲੈਂਦੇ ਸਨ।
ਡਰਹਮ ਪੁਲਿਸ ਮੁਤਾਬਕ ‘Project Jetsetter’ ਤਹਿਤ ਨੌਂ ਤੋਂ ਵੱਧ ਵੱਖ-ਵੱਖ ਜਾਂਚਾਂ ਕੀਤੀਆਂ ਗਈਆਂ ਅਤੇ 5,000 ਤੋਂ ਵੱਧ ਜਾਂਚ ਘੰਟੇ ਲਗਾਏ ਗਏ। ਪੁਲਿਸ ਨੇ ਇਸ ਕਿਸਮ ਦੇ ਅਪਰਾਧ ਨੂੰ “ਕ੍ਰਿਮਿਨਲ ਟੂਰਿਜ਼ਮ” ਕਰਾਰ ਦਿੰਦਿਆਂ ਕਿਹਾ ਕਿ ਇਹ ਸਰਹੱਦਾਂ ਤੋਂ ਪਰੇ ਫੈਲਿਆ ਇੱਕ ਨਵਾਂ ਸੰਗਠਿਤ ਅਪਰਾਧਿਕ ਰੁਝਾਨ ਹੈ ਜੋ ਕੈਨੇਡੀਅਨਾਂ ਦੀ ਰੋਜ਼ਮਰ੍ਹਾ ਜ਼ਿੰਦਗੀ ਨੂੰ ਪ੍ਰਭਾਵਿਤ ਕਰ ਰਿਹਾ ਹੈ।
ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਕਿਸੇ ਵੀ ਸ਼ੱਕੀ ਗਤੀਵਿਧੀ ਦੀ ਤੁਰੰਤ ਸੂਚਨਾ ਦਿੱਤੀ ਜਾਵੇ। ਜਾਂਚ ਅਜੇ ਵੀ ਜਾਰੀ ਹੈ ਅਤੇ ਬਾਕੀ ਫਰਾਰ ਸ਼ੱਕੀਆਂ ਦੀ ਭਾਲ ਲਈ ਕਾਰਵਾਈ ਕੀਤੀ ਜਾ ਰਹੀ ਹੈ।
