ਵੈਨਕੂਵਰ ((ਰਵੀ ਕਾਂਤ ਸ਼ਰਮਾ): ਸਾਬਕਾ ਕੰਸਰਵੇਟਿਵ ਐਮਪੀ Kerry-Lynne Findlay ਨੂੰ BC Conservative Party ਦੀ ਨਵੀਂ ਆਗੂ ਚੁਣ ਲਿਆ ਗਿਆ ਹੈ। ਅੱਜ ਸ਼ਾਮ ਐਲਾਨੇ ਗਏ ਲੀਡਰਸ਼ਿਪ ਚੋਣ ਨਤੀਜਿਆਂ ਵਿੱਚ ਉਨ੍ਹਾਂ ਨੇ ਆਪਣੀ ਨਜ਼ਦੀਕੀ ਵਿਰੋਧੀ ਉਮੀਦਵਾਰ ਕੈਰੋਲਿਨ ਇਲੀਅਟ ਨੂੰ ਕਰੀਬ ਮੁਕਾਬਲੇ ਵਿੱਚ ਹਰਾ ਦਿੱਤਾ।
ਚੋਣ ਨਤੀਜਿਆਂ ਅਨੁਸਾਰ ਫਿੰਡਲੇ ਨੇ 51 ਫੀਸਦੀ ਵੋਟਾਂ ਹਾਸਲ ਕੀਤੀਆਂ ਜਦਕਿ ਇਲੀਅਟ ਨੂੰ 49 ਫੀਸਦੀ ਵੋਟਾਂ ਮਿਲੀਆਂ। ਹੋਰ ਉਮੀਦਵਾਰਾਂ ਵਿੱਚ ਕੈਪੀਲਾਨੋ ਯੂਨੀਵਰਸਿਟੀ ਦੇ ਚਾਂਸਲਰ ਯੂਰੀ ਫੁਲਮਰ, ਕੈਮਲੂਪਸ ਸੈਂਟਰ ਦੇ ਵਿਧਾਇਕ ਪੀਟਰ ਮਿਲੋਬਾਰ ਅਤੇ ਸਾਬਕਾ ਬੀ.ਸੀ. ਲਿਬਰਲ ਮੰਤਰੀ ਇਆਨ ਬਲੈਕ ਵੀ ਸ਼ਾਮਲ ਸਨ, ਜੋ ਆਖਰੀ ਰਾਊਂਡਾਂ ਵਿੱਚ ਪਿੱਛੇ ਰਹਿ ਗਏ।
ਪਾਰਟੀ ਨਿਯਮਾਂ ਅਨੁਸਾਰ ਤਰਜੀਹੀ ਵੋਟਿੰਗ ਪ੍ਰਣਾਲੀ ਰਾਹੀਂ ਚੋਣ ਕਰਵਾਈ ਗਈ। ਜੇਕਰ ਕਿਸੇ ਉਮੀਦਵਾਰ ਨੂੰ ਪਹਿਲੇ ਦੌਰ ਵਿੱਚ 50 ਫੀਸਦੀ ਤੋਂ ਵੱਧ ਵੋਟਾਂ ਨਾ ਮਿਲਣ, ਤਾਂ ਸਭ ਤੋਂ ਘੱਟ ਵੋਟਾਂ ਵਾਲੇ ਉਮੀਦਵਾਰ ਨੂੰ ਬਾਹਰ ਕਰਕੇ ਉਸ ਦੀਆਂ ਦੂਜੀ ਪਸੰਦ ਦੀਆਂ ਵੋਟਾਂ ਦੁਬਾਰਾ ਵੰਡੀਆਂ ਜਾਂਦੀਆਂ ਹਨ। ਇਸ ਪ੍ਰਕਿਰਿਆ ਵਿੱਚ ਪੀਟਰ ਮਿਲੋਬਾਰ ਸਭ ਤੋਂ ਪਹਿਲਾਂ ਬਾਹਰ ਹੋਏ, ਫਿਰ ਯੂਰੀ ਫੁਲਮਰ ਅਤੇ ਆਖ਼ਿਰ ਵਿੱਚ ਇਆਨ ਬਲੈਕ ਮੁਕਾਬਲੇ ਤੋਂ ਹਟ ਗਏ।
ਵੈਨਕੂਵਰ ਦੇ ਰੌਕੀ ਮਾਊਂਟੇਨੀਅਰ ਸਟੇਸ਼ਨ ਵਿੱਚ ਨਤੀਜੇ ਐਲਾਨੇ ਜਾਣ ਮਗਰੋਂ ਫਿੰਡਲੇ ਨੇ ਸਮਰਥਕਾਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਬ੍ਰਿਟਿਸ਼ ਕੋਲੰਬੀਆ ਸਾਡਾ ਘਰ ਹੈ ਅਤੇ ਲੋਕਾਂ ਦੇ ਅਧਿਕਾਰਾਂ ਦੀ ਰੱਖਿਆ ਲਈ ਉਹ ਕੰਮ ਕਰਨਗੇ।
ਸਾਬਕਾ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਦੀ ਸਰਕਾਰ ਵਿੱਚ ਮੰਤਰੀ ਰਹਿ ਚੁੱਕੀ Kerry-Lynne Findlay ਹੁਣ ਪਾਰਟੀ ਦੀ ਅਗਵਾਈ ਸੰਭਾਲਣਗੇ। ਉਨ੍ਹਾਂ ਨੂੰ ਬੀਸੀ ਵਿਧਾਨ ਸਭਾ ਵਿੱਚ ਬੈਠਣ ਲਈ ਉਪ-ਚੋਣ ਲੜਨੀ ਪੈ ਸਕਦੀ ਹੈ। ਰਾਜਨੀਤਿਕ ਗਲਿਆਰਿਆਂ ਵਿੱਚ ਇਹ ਵੀ ਚਰਚਾ ਹੈ ਕਿ ਉਨ੍ਹਾਂ ਦੇ ਪਤੀ, ਸਾਊਥ ਸਰੀ ਤੋਂ ਐਮਐਲਏ, ਸੰਭਵ ਹੈ ਉਨ੍ਹਾਂ ਲਈ ਸੀਟ ਖਾਲੀ ਕਰ ਸਕਦੇ ਹਨ।
ਉਨ੍ਹਾਂ ਨੇ 2011 ਤੋਂ 2025 ਤੱਕ ਵਾਈਟ ਰੌਕ–ਸਾਊਥ ਸਰੀ ਦੀ ਨੁਮਾਇੰਦਗੀ ਕਰਦਿਆਂ ਫੈਡਰਲ ਰਾਜਨੀਤੀ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ ਅਤੇ ਕਈ ਮਹੱਤਵਪੂਰਨ ਸਰਕਾਰੀ ਅਹੁਦਿਆਂ ‘ਤੇ ਸੇਵਾ ਕੀਤੀ ਹੈ।
