ਵੈਨਕੂਵਰ, 8 ਜੂਨ: ਵੈਨਕੂਵਰ ਦੇ ਇੱਕ ਰਹਾਇਸ਼ੀ ਇਲਾਕੇ ਵਿੱਚ ਉਸ ਵੇਲੇ ਅਜੀਬ ਸਥਿਤੀ ਪੈਦਾ ਹੋ ਗਈ ਜਦੋਂ ਇੱਕ ਘਰ ਦੇ ਵਰਾਂਡੇ (ਪੋਰਚ) ਹੇਠੋਂ ਇੱਕ ਦੁਰਲੱਭ ਅਤੇ ਵਿਦੇਸ਼ੀ ਨਸਲ ਦੀ ਬਿੱਲੀ ਮਿਲੀ। ਸ਼ੁਰੂ ਵਿੱਚ ਸਥਾਨਕ ਨਿਵਾਸੀ ਇਸ ਜਾਨਵਰ ਨੂੰ ਦੇਖ ਕੇ ਹੈਰਾਨ ਰਹਿ ਗਏ ਅਤੇ ਸੁਰੱਖਿਆ ਦੇ ਮੱਦੇਨਜ਼ਰ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ।
ਪੁਲਿਸ ਅਤੇ ਬੀ.ਸੀ. ਕਨਜ਼ਰਵੇਸ਼ਨ ਅਫਸਰਾਂ ਨੇ ਮੌਕੇ ’ਤੇ ਪਹੁੰਚ ਕੇ ਜਾਂਚ ਕੀਤੀ ਤਾਂ ਪਤਾ ਲੱਗਾ ਕਿ ਇਹ ਆਮ ਘਰੇਲੂ ਬਿੱਲੀ ਨਹੀਂ, ਸਗੋਂ ਇੱਕ ਪੂਰੀ ਤਰ੍ਹਾਂ ਵੱਡੀ ਹੋ ਚੁੱਕੀ ਅਫਰੀਕੀ ਸਰਵਲ (African Serval) ਸੀ। ਇਹ ਜੰਗਲੀ ਬਿੱਲੀ ਆਪਣੇ ਲੰਬੇ ਪੈਰਾਂ, ਵੱਡੇ ਕੰਨਾਂ ਅਤੇ ਚੀਤੇ ਵਰਗੇ ਧੱਬਿਆਂ ਲਈ ਜਾਣੀ ਜਾਂਦੀ ਹੈ ਅਤੇ ਆਮ ਬਿੱਲੀਆਂ ਨਾਲੋਂ ਕਾਫ਼ੀ ਵੱਡੀ ਹੁੰਦੀ ਹੈ।
ਇਹ ਘਟਨਾ ਪੂਰਬੀ ਵੈਨਕੂਵਰ ਦੇ ਪ੍ਰਿੰਸ ਐਲਬਰਟ ਸਟਰੀਟ ਅਤੇ ਈਸਟ 30ਵੀਂ ਐਵੇਨਿਊ ਦੇ ਨੇੜੇ ਵਾਪਰੀ। ਅਧਿਕਾਰੀਆਂ ਨੇ ਬਿੱਲੀ ਨੂੰ ਸੁਰੱਖਿਅਤ ਢੰਗ ਨਾਲ ਕਾਬੂ ਕਰਕੇ ਉਸ ਦੇ ਮਾਲਕਾਂ ਤੱਕ ਪਹੁੰਚਾਇਆ। ਪੁਲਿਸ ਨੇ ਇਸ ਮੌਕੇ ਲੋਕਾਂ ਨੂੰ ਸਲਾਹ ਵੀ ਦਿੱਤੀ ਕਿ ਜੇ ਉਨ੍ਹਾਂ ਦਾ ਕੋਈ ਪਾਲਤੂ ਜਾਨਵਰ ਗੁੰਮ ਹੋ ਜਾਵੇ ਤਾਂ ਤੁਰੰਤ ਗੁਆਂਢੀਆਂ ਅਤੇ ਸੰਬੰਧਤ ਅਧਿਕਾਰੀਆਂ ਨੂੰ ਸੂਚਿਤ ਕੀਤਾ ਜਾਵੇ।
ਇਹ ਘਟਨਾ ਉਸ ਸਮੇਂ ਸਾਹਮਣੇ ਆਈ ਹੈ ਜਦੋਂ ਬ੍ਰਿਟਿਸ਼ ਕੋਲੰਬੀਆ ਸਰਕਾਰ ਨੇ 1 ਮਈ 2026 ਤੋਂ ਗੈਰ-ਦੇਸੀ ਅਤੇ ਗੈਰ-ਘਰੇਲੂ ਬਿੱਲੀਆਂ ਦੀਆਂ ਕਈ ਕਿਸਮਾਂ ਨੂੰ ਨਿਯੰਤਰਿਤ ਜਾਤੀਆਂ (Controlled Alien Species) ਦੀ ਸੂਚੀ ਵਿੱਚ ਸ਼ਾਮਲ ਕੀਤਾ ਹੈ। ਨਵੇਂ ਨਿਯਮਾਂ ਅਨੁਸਾਰ ਸਰਵਲ, ਓਸੀਲਾਟ ਅਤੇ ਕੈਰਾਕਲ ਵਰਗੀਆਂ ਬਿੱਲੀਆਂ ਨੂੰ ਰੱਖਣ ਲਈ ਵਿਸ਼ੇਸ਼ ਪਰਮਿਟ ਦੀ ਲੋੜ ਹੁੰਦੀ ਹੈ।
ਸੂਬਾਈ ਸਰਕਾਰ ਦਾ ਕਹਿਣਾ ਹੈ ਕਿ ਅਜਿਹੀਆਂ ਵਿਦੇਸ਼ੀ ਬਿੱਲੀਆਂ ਲੋਕਾਂ ਦੀ ਸੁਰੱਖਿਆ, ਘਰੇਲੂ ਪਾਲਤੂ ਜਾਨਵਰਾਂ ਅਤੇ ਸਥਾਨਕ ਜੰਗਲੀ ਜੀਵਾਂ ਲਈ ਖਤਰਾ ਬਣ ਸਕਦੀਆਂ ਹਨ। ਇਹ ਬਿੱਲੀਆਂ ਸ਼ਿਕਾਰ ਕਰਨ ਵਿੱਚ ਬਹੁਤ ਮਾਹਰ ਹੁੰਦੀਆਂ ਹਨ ਅਤੇ ਪੰਛੀਆਂ, ਛੋਟੇ ਜਾਨਵਰਾਂ ਅਤੇ ਹੋਰ ਜੀਵਾਂ ਨੂੰ ਨੁਕਸਾਨ ਪਹੁੰਚਾ ਸਕਦੀਆਂ ਹਨ।
ਵੈਨਕੂਵਰ ਪੁਲਿਸ ਨੇ ਦੱਸਿਆ ਕਿ ਸਰਵਲ ਆਕਾਰ ਵਿੱਚ ਆਮ ਘਰੇਲੂ ਬਿੱਲੀ ਨਾਲੋਂ ਤਕਰੀਬਨ ਤਿੰਨ ਗੁਣਾ ਵੱਡੀ ਹੋ ਸਕਦੀ ਹੈ। ਹਾਲਾਂਕਿ ਇਸ ਘਟਨਾ ਵਿੱਚ ਕਿਸੇ ਨੂੰ ਕੋਈ ਸੱਟ ਨਹੀਂ ਲੱਗੀ, ਪਰ ਇਲਾਕੇ ਦੇ ਵਸਨੀਕਾਂ ਲਈ ਇਹ ਇੱਕ ਹੈਰਾਨੀਜਨਕ ਅਤੇ ਚਿੰਤਾਜਨਕ ਤਜਰਬਾ ਰਿਹਾ।
ਅਧਿਕਾਰੀ ਹੁਣ ਇਹ ਵੀ ਜਾਂਚ ਕਰ ਰਹੇ ਹਨ ਕਿ ਜਾਨਵਰ ਦੇ ਮਾਲਕ ਨੇ ਸਾਰੇ ਨਿਯਮਾਂ ਦੀ ਪਾਲਣਾ ਕੀਤੀ ਸੀ ਜਾਂ ਨਹੀਂ। ਇਸ ਘਟਨਾ ਨੇ ਇੱਕ ਵਾਰ ਫਿਰ ਵਿਦੇਸ਼ੀ ਜਾਨਵਰਾਂ ਨੂੰ ਪਾਲਤੂ ਵਜੋਂ ਰੱਖਣ ਸਬੰਧੀ ਸੁਰੱਖਿਆ ਅਤੇ ਨਿਯਮਾਂ ’ਤੇ ਚਰਚਾ ਛੇੜ ਦਿੱਤੀ ਹੈ।
