ਵੈਨਕੂਵਰ, 28 ਜੂਨ: ਬ੍ਰਿਟਿਸ਼ ਕੋਲੰਬੀਆ ਵਿੱਚ ਵੈਨਕੂਵਰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਕਰੀਬ 18 ਕਿਲੋਮੀਟਰ ਦੱਖਣ-ਪੱਛਮ ਸਮੁੰਦਰੀ ਖੇਤਰ ਵਿੱਚ ਵਾਪਰੀ ਇੱਕ ਵੱਡੀ ਸਮੁੰਦਰੀ ਐਮਰਜੈਂਸੀ ਦੌਰਾਨ ਚਾਰ ਲੋਕਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ, ਜਦਕਿ ਛੇ ਹੋਰ ਲੋਕ ਅਜੇ ਵੀ ਲਾਪਤਾ ਹਨ। ਉਨ੍ਹਾਂ ਦੀ ਭਾਲ ਲਈ ਵੱਡੇ ਪੱਧਰ ‘ਤੇ ਬਚਾਅ ਮੁਹਿੰਮ ਜਾਰੀ ਹੈ।
ਅਧਿਕਾਰੀਆਂ ਅਨੁਸਾਰ, Joint Rescue Coordination Centre (JRCC) ਨੂੰ ਦੁਪਹਿਰ ਤੋਂ ਪਹਿਲਾਂ ਇੱਕ ਨਾਗਰਿਕ ਜਹਾਜ਼ ਵੱਲੋਂ ਸੂਚਨਾ ਮਿਲੀ ਕਿ ਸਮੁੰਦਰ ਵਿੱਚ ਕਈ ਲੋਕ ਲਾਈਫ ਜੈਕਟਾਂ ਤੋਂ ਬਿਨਾਂ ਪਾਣੀ ਵਿੱਚ ਤੈਰ ਰਹੇ ਹਨ। ਸੂਚਨਾ ਮਿਲਦੇ ਹੀ ਤੁਰੰਤ ਬਚਾਅ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ।
ਰਾਹਤ ਕਾਰਜਾਂ ਲਈ ਕੈਨੇਡੀਅਨ ਕੋਸਟ ਗਾਰਡ, ਰਾਇਲ ਕੈਨੇਡੀਅਨ ਮਰੀਨ ਸਰਚ ਐਂਡ ਰੈਸਕਿਊ (RCMSAR), ਹੈਲੀਕਾਪਟਰ, ਸਰਚ ਐਂਡ ਰੈਸਕਿਊ ਜਹਾਜ਼, ਹੋਵਰਕ੍ਰਾਫਟ ਅਤੇ ਲਾਈਫਬੋਟ ਤਾਇਨਾਤ ਕੀਤੇ ਗਏ। ਦੁਪਹਿਰ ਕਰੀਬ 3 ਵਜੇ ਚਾਰ ਲੋਕਾਂ ਨੂੰ ਸੁਰੱਖਿਅਤ ਬਚਾ ਕੇ ਸੀ ਆਈਲੈਂਡ ਕੋਸਟ ਗਾਰਡ ਸਟੇਸ਼ਨ ਲਿਆਂਦਾ ਗਿਆ, ਜਿੱਥੇ ਉਨ੍ਹਾਂ ਨੂੰ ਐਮਰਜੈਂਸੀ ਮੈਡੀਕਲ ਟੀਮਾਂ ਦੇ ਹਵਾਲੇ ਕਰ ਦਿੱਤਾ ਗਿਆ।
ਬਚਾਅ ਅਧਿਕਾਰੀਆਂ ਨੇ ਦੱਸਿਆ ਕਿ ਛੇ ਹੋਰ ਲੋਕਾਂ ਦੀ ਭਾਲ ਲਗਾਤਾਰ ਜਾਰੀ ਹੈ। ਖੋਜ ਮੁਹਿੰਮ ਵਿੱਚ ਹਵਾਈ ਅਤੇ ਸਮੁੰਦਰੀ ਸਾਧਨਾਂ ਦੀ ਮਦਦ ਲਈ ਜਾ ਰਹੀ ਹੈ, ਪਰ ਅਜੇ ਤੱਕ ਉਨ੍ਹਾਂ ਦਾ ਕੋਈ ਪਤਾ ਨਹੀਂ ਲੱਗ ਸਕਿਆ। ਅਧਿਕਾਰੀਆਂ ਨੇ ਆਸ ਜਤਾਈ ਹੈ ਕਿ ਖੋਜ ਕਾਰਵਾਈ ਜਾਰੀ ਰਹਿਣ ਨਾਲ ਹੋਰ ਲੋਕਾਂ ਨੂੰ ਵੀ ਲੱਭਿਆ ਜਾ ਸਕੇਗਾ।
ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੋਇਆ ਕਿ ਇਹ ਲੋਕ ਪਾਣੀ ਵਿੱਚ ਕਿਵੇਂ ਪਹੁੰਚੇ। ਘਟਨਾ ਦੇ ਕਾਰਨਾਂ ਦੀ ਜਾਂਚ ਜਾਰੀ ਹੈ ਅਤੇ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਹੋਰ ਜਾਣਕਾਰੀ ਮਿਲਣ ‘ਤੇ ਜਨਤਕ ਕੀਤੀ ਜਾਵੇਗੀ।
