ਵਿਕਟੋਰੀਆ, 29 ਮਈ (ਨਿਊਜ਼ ਡੈਸਕ):ਕੈਨੇਡਾ ਦੀ ਸੁਪਰੀਮ ਕੋਰਟ ਵੱਲੋਂ ਨਿਊ ਬ੍ਰੰਸਵਿਕ ਦੇ ਇੱਕ ਮਹੱਤਵਪੂਰਨ ਆਦਿਵਾਸੀ ਟਾਈਟਲ ਮਾਮਲੇ ਦੀ ਅਪੀਲ ਸੁਣਨ ਤੋਂ ਇਨਕਾਰ ਕਰਨ ਤੋਂ ਬਾਅਦ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਚੱਲ ਰਹੇ ਕਾਉਇਚਨ ਟ੍ਰਾਈਬਜ਼ ਜ਼ਮੀਨੀ ਹੱਕ ਕੇਸ ‘ਤੇ ਵੀ ਇਸ ਦੇ ਪ੍ਰਭਾਵ ਨੂੰ ਲੈ ਕੇ ਚਰਚਾ ਤੇਜ਼ ਹੋ ਗਈ ਹੈ। ਨਿਊ ਬ੍ਰੰਸਵਿਕ ਦੇ ਇਸ ਮਾਮਲੇ ਵਿੱਚ ਅਪੀਲੀ ਅਦਾਲਤ ਨੇ ਵੋਲਾਸਟੋਕੀ ਨੇਸ਼ਨ ਦੀ ਬਜਾਏ ਲੱਕੜ ਕੰਪਨੀਆਂ ਦੇ ਹੱਕ ਵਿੱਚ ਫੈਸਲਾ ਦਿੱਤਾ ਸੀ। ਅਦਾਲਤ ਨੇ ਕਿਹਾ ਸੀ ਕਿ ਨਿੱਜੀ ਮਲਕੀਅਤ ਵਾਲੀ ਜ਼ਮੀਨ ‘ਤੇ ਆਦਿਵਾਸੀ ਟਾਈਟਲ ਦੀ ਘੋਸ਼ਣਾ ਨਹੀਂ ਕੀਤੀ ਜਾ ਸਕਦੀ। ਹਾਲਾਂਕਿ ਫਰਸਟ ਨੇਸ਼ਨ ਭਾਈਚਾਰੇ ਅਜਿਹੀ ਜ਼ਮੀਨ ਲਈ ਮੁਆਵਜ਼ੇ ਦੀ ਮੰਗ ਕਰ ਸਕਦੇ ਹਨ।
ਅਦਾਲਤੀ ਫੈਸਲੇ ਵਿੱਚ ਕਿਹਾ ਗਿਆ ਕਿ ਇਹ ਰਵੱਈਆ ਆਦਿਵਾਸੀ ਅਤੇ ਗੈਰ-ਆਦਿਵਾਸੀ ਕੈਨੇਡੀਅਨਾਂ ਵਿਚਕਾਰ ਸ਼ਾਂਤੀਪੂਰਨ ਅਤੇ ਸਤਿਕਾਰਯੋਗ ਸਮਝੌਤੇ ਵੱਲ ਸਪੱਸ਼ਟ ਰਾਹ ਖੋਲ੍ਹ ਸਕਦਾ ਹੈ। ਦੂਜੇ ਪਾਸੇ ਬੀ.ਸੀ. ਦੇ ਕਾਉਇਚਨ ਟ੍ਰਾਈਬਜ਼ ਮਾਮਲੇ ਵਿੱਚ ਬੀ.ਸੀ. ਸੁਪਰੀਮ ਕੋਰਟ ਦੀ ਜਸਟਿਸ ਬਾਰਬਰਾ ਯੰਗ ਨੇ ਫੈਸਲਾ ਦਿੱਤਾ ਸੀ ਕਿ ਰਿਚਮੰਡ ਖੇਤਰ ਦੀ ਕੁਝ ਜ਼ਮੀਨ ‘ਤੇ ਆਦਿਵਾਸੀ ਟਾਈਟਲ ਅਤੇ ਨਿੱਜੀ ਮਲਕੀਅਤ ਇਕੱਠੇ ਮੌਜੂਦ ਰਹਿ ਸਕਦੇ ਹਨ। ਅਦਾਲਤ ਨੇ ਆਦਿਵਾਸੀ ਹੱਕਾਂ ਨੂੰ “ਪਹਿਲਾ ਅਤੇ ਸੀਨੀਅਰ ਹੱਕ” ਕਰਾਰ ਦਿੱਤਾ ਸੀ।ਜਸਟਿਸ ਯੰਗ ਨੇ ਇਹ ਨਹੀਂ ਕਿਹਾ ਸੀ ਕਿ ਜ਼ਮੀਨ ਵਾਪਸ ਸੌਂਪੀ ਜਾਵੇ, ਸਗੋਂ ਸੂਬਾ ਸਰਕਾਰ ਨੂੰ “ਨੇਕ ਨੀਅਤ” ਨਾਲ ਗੱਲਬਾਤ ਰਾਹੀਂ ਮਸਲੇ ਦਾ ਹੱਲ ਲੱਭਣ ਲਈ ਕਿਹਾ ਸੀ।
ਬੀ.ਸੀ. ਦੀ ਅਟਾਰਨੀ ਜਨਰਲ ਨਿੱਕੀ ਸ਼ਰਮਾ ਨੇ ਕਿਹਾ ਕਿ ਦੋਨਾਂ ਕੇਸਾਂ ਵਿੱਚ ਕਈ ਕਾਨੂੰਨੀ ਮਸਲੇ ਇੱਕੋ ਜਿਹੇ ਹਨ ਅਤੇ ਨਿਊ ਬ੍ਰੰਸਵਿਕ ਦੇ ਫੈਸਲੇ ਨਾਲ ਬੀ.ਸੀ. ਦੀ ਅਪੀਲ ਨੂੰ ਮਦਦ ਮਿਲ ਸਕਦੀ ਹੈ। ਉਨ੍ਹਾਂ ਕਿਹਾ, “ਮੈਨੂੰ ਲੱਗਦਾ ਹੈ ਕਿ ਇਹ ਫੈਸਲਾ ਬੀ.ਸੀ. ਵਿੱਚ ਸਾਡੀ ਅਪੀਲ ਲਈ ਇੱਕ ਸਪੱਸ਼ਟ ਰਾਹ ਦਿਖਾਉਂਦਾ ਹੈ ਅਤੇ ਅਸੀਂ ਕਾਨੂੰਨੀ ਵਿਕਲਪਾਂ ‘ਤੇ ਅੱਗੇ ਵੀ ਕੰਮ ਕਰ ਰਹੇ ਹਾਂ।”ਹਾਲਾਂਕਿ ਬੀ.ਸੀ. ਗ੍ਰੀਨ ਪਾਰਟੀ ਦੇ ਵਿਧਾਇਕ ਅਤੇ ਵਕੀਲ ਰਹੇ ਰੌਬ ਬੌਟਰੈੱਲ ਨੇ ਕਿਹਾ ਕਿ ਦੋਨਾਂ ਮਾਮਲਿਆਂ ਦੇ ਤੱਥ ਵੱਖਰੇ ਹਨ, ਇਸ ਲਈ ਇਹ ਕਹਿਣਾ ਜਲਦੀ ਹੋਵੇਗਾ ਕਿ ਨਿਊ ਬ੍ਰੰਸਵਿਕ ਦਾ ਫੈਸਲਾ ਬੀ.ਸੀ. ‘ਤੇ ਵੀ ਠੀਕ ਉਸੇ ਤਰ੍ਹਾਂ ਲਾਗੂ ਹੋਵੇਗਾ। ਇਸੇ ਦੌਰਾਨ ਬੀ.ਸੀ. ਦੇ ਹਾਊਸ ਲੀਡਰ ਮਾਈਕ ਫਾਰਨਵਰਥ ਨੇ ਕਿਹਾ ਕਿ ਸਰਕਾਰ ਹਮੇਸ਼ਾਂ ਤੋਂ ਨਿੱਜੀ ਮਲਕੀਅਤ ਦੇ ਹੱਕਾਂ ਦੀ ਰੱਖਿਆ ਦੇ ਹੱਕ ਵਿੱਚ ਰਹੀ ਹੈ ਅਤੇ ਸੁਪਰੀਮ ਕੋਰਟ ਦਾ ਤਾਜ਼ਾ ਫੈਸਲਾ ਇਸ ਗੱਲ ਨੂੰ ਹੋਰ ਮਜ਼ਬੂਤ ਕਰਦਾ ਹੈ।
