ਓਟਵਾ, 29 ਮਈ (ਪੋਸਟ ਬਿਊਰੋ):ਕੈਨੇਡਾ ਦੀ ਅਰਥਵਿਵਸਥਾ 2026 ਦੀ ਪਹਿਲੀ ਤਿਮਾਹੀ ਦੌਰਾਨ ਵੀ ਦਬਾਅ ਹੇਠ ਰਹੀ ਹੈ। ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਾਰੀ ਤਾਜ਼ਾ ਅੰਕੜਿਆਂ ਅਨੁਸਾਰ ਦੇਸ਼ ਦੇ ਕੁੱਲ ਘਰੇਲੂ ਉਤਪਾਦ (ਜੀਡੀਪੀ) ਵਿੱਚ ਲਗਾਤਾਰ ਦੂਜੀ ਤਿਮਾਹੀ ਗਿਰਾਵਟ ਦਰਜ ਕੀਤੀ ਗਈ ਹੈ, ਜਿਸ ਕਾਰਨ ਕੈਨੇਡਾ ਅਧਿਕਾਰਕ ਤੌਰ ‘ਤੇ “ਟੈਕਨੀਕਲ ਮੰਦਵਾੜੇ” ਵਿੱਚ ਦਾਖਲ ਹੋ ਗਿਆ ਹੈ।
ਰਿਪੋਰਟ ਮੁਤਾਬਕ 2026 ਦੀ ਪਹਿਲੀ ਤਿਮਾਹੀ ਦੌਰਾਨ ਆਰਥਿਕ ਵਾਧਾ ਲਗਭਗ ਠੱਪ ਰਿਹਾ, ਜਦਕਿ ਸਾਲਾਨਾ ਅਧਾਰ ‘ਤੇ ਜੀਡੀਪੀ ਵਿੱਚ 0.1 ਫੀਸਦੀ ਦੀ ਕਮੀ ਦਰਜ ਕੀਤੀ ਗਈ। ਇਸ ਤੋਂ ਪਹਿਲਾਂ 2025 ਦੀ ਆਖਰੀ ਤਿਮਾਹੀ ਵਿੱਚ ਵੀ ਅਰਥਚਾਰੇ ਵਿੱਚ ਇੱਕ ਫੀਸਦੀ ਦੀ ਗਿਰਾਵਟ ਆਈ ਸੀ।
ਅਰਥਵਿਵਸਥਾ ਦੀ ਇਸ ਸੁਸਤੀ ਦੇ ਮੁੱਖ ਕਾਰਨਾਂ ਵਿੱਚ ਨਿਰਮਾਣ ਖੇਤਰ ਦੀ ਕਮਜ਼ੋਰੀ, ਕਾਰੋਬਾਰੀ ਨਿਵੇਸ਼ ਵਿੱਚ ਕਮੀ ਅਤੇ ਹਾਊਸਿੰਗ ਮਾਰਕੀਟ ਦੀ ਮੰਦੀ ਨੂੰ ਜ਼ਿੰਮੇਵਾਰ ਮੰਨਿਆ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਖਣਨ, ਤੇਲ ਅਤੇ ਗੈਸ ਖੇਤਰ ਦੀ ਘੱਟ ਕਾਰਗੁਜ਼ਾਰੀ ਨੇ ਵੀ ਮਾਰਚ ਮਹੀਨੇ ਦੇ ਆਰਥਿਕ ਅੰਕੜਿਆਂ ‘ਤੇ ਨਕਾਰਾਤਮਕ ਪ੍ਰਭਾਵ ਪਾਇਆ।
ਹਾਲਾਂਕਿ ਅਪ੍ਰੈਲ ਮਹੀਨੇ ਲਈ ਜਾਰੀ ਸ਼ੁਰੂਆਤੀ ਅੰਦਾਜ਼ਿਆਂ ਵਿੱਚ ਕੁਝ ਸੁਧਾਰ ਦੇ ਸੰਕੇਤ ਮਿਲੇ ਹਨ। ਖਣਨ ਅਤੇ ਤੇਲ-ਗੈਸ ਖੇਤਰ ਵਿੱਚ ਵਾਧੇ ਕਾਰਨ ਜੀਡੀਪੀ ਵਿੱਚ 0.4 ਫੀਸਦੀ ਤੱਕ ਦਾ ਉਛਾਲ ਆ ਸਕਦਾ ਹੈ।
ਅਰਥਸ਼ਾਸਤਰੀਆਂ ਦਾ ਕਹਿਣਾ ਹੈ ਕਿ ਜੇਕਰ ਆਉਣ ਵਾਲੇ ਮਹੀਨਿਆਂ ਵਿੱਚ ਵੀ ਆਰਥਿਕ ਸਰਗਰਮੀਆਂ ਵਿੱਚ ਤੇਜ਼ੀ ਨਹੀਂ ਆਉਂਦੀ ਤਾਂ Bank of Canada ਵੱਲੋਂ ਵਿਆਜ ਦਰਾਂ ਵਿੱਚ ਕਟੌਤੀ ਕਰਨ ਦੀ ਸੰਭਾਵਨਾ ਵਧ ਸਕਦੀ ਹੈ, ਤਾਂ ਜੋ ਅਰਥਚਾਰੇ ਨੂੰ ਮੁੜ ਗਤੀ ਦਿੱਤੀ ਜਾ ਸਕੇ।
