ਨਵੀਂ ਦਿੱਲੀ: ਉੱਤਰਕਾਸ਼ੀ ‘ਚ ਅੱਜ ਸਵੇਰੇ ਕਰੀਬ 9.29 ਵਜੇ ਭੂਚਾਲ ਦੇ ਹਲਕੇ ਝਟਕੇ ਮਹਿਸੂਸ ਕੀਤੇ ਗਏ। ਇਹ ਭੂਚਾਲ (The Earthquake) ਛੇ ਦਿਨਾਂ ਵਿੱਚ ਨੌਵਾਂ ਭੂਚਾਲ ਸੀ, ਜਿਸ ਕਾਰਨ ਲੋਕ ਡਰ ਅਤੇ ਚਿੰਤਾ ਵਿੱਚ ਸਨ। ਅੱਜ ਸਵੇਰੇ ਭੂਚਾਲ ਦੀ ਤੀਬਰਤਾ 2.07 ਮਾਪੀ ਗਈ। ਹਾਲਾਂਕਿ ਇਸ ਭੂਚਾਲ ਨਾਲ ਕਿਸੇ ਤਰ੍ਹਾਂ ਦੇ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਹੈ।
6 ਦਿਨਾਂ ‘ਚ 9ਵੀਂ ਵਾਰ ਭੂਚਾਲ ਨਾਲ ਕੰਬੀ ਧਰਤੀ
ਇਸ ਤੋਂ ਇਲਾਵਾ ਬੀਤੀ ਸ਼ਾਮ 7.31 ਵਜੇ ਉੱਤਰਕਾਸ਼ੀ ਜ਼ਿਲ੍ਹਾ ਹੈੱਡਕੁਆਰਟਰ ਅਤੇ ਆਸ ਪਾਸ ਦੇ ਇਲਾਕਿਆਂ ‘ਚ ਵੀ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਜ਼ਿਲ੍ਹਾ ਆਫ਼ਤ ਕੰਟਰੋਲ ਰੂਮ ਨੇ ਦੱਸਿਆ ਕਿ ਬੀਤੇ ਦਿਨ ਆਏ ਭੂਚਾਲ ਦੀ ਤੀਬਰਤਾ ਰਿਕਟਰ ਪੈਮਾਨੇ ‘ਤੇ 2.7 ਮਾਪੀ ਗਈ। ਭੂਚਾਲ ਦਾ ਕੇਂਦਰ ਤਹਿਸੀਲ ਬਾਰਕੋਟ ਦੇ ਸਰੂਤਾਲ ਝੀਲ, ਫੁਚ-ਕੰਡੀ ਅਤੇ ਯਮੁਨੋਤਰੀ ਰੇਂਜ ਜੰਗਲ ਖੇਤਰ ਵਿੱਚ ਸੀ।
ਲਗਾਤਾਰ ਆਏ ਭੂਚਾਲ ਕਾਰਨ ਲੋਕ ‘ਚ ਦਹਿਸ਼ਤ
ਇਸ ਤੋਂ ਪਹਿਲਾਂ 24 ਅਤੇ 25 ਜਨਵਰੀ ਨੂੰ ਉੱਤਰਕਾਸ਼ੀ ‘ਚ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ ਸਨ। ਇਨ੍ਹਾਂ ਝਟਕਿਆਂ ਕਾਰਨ ਵਰੁਣਵਤ ਪਹਾੜ ਦੇ ਜ਼ਮੀਨ ਖਿਸਕਣ ਵਾਲੇ ਖੇਤਰ ਤੋਂ ਮਲਬਾ ਅਤੇ ਪੱਥਰ ਡਿੱਗਣ ਦੀਆਂ ਘਟਨਾਵਾਂ ਵਾਪਰੀਆਂ। ਰਿਕਟਰ ਪੈਮਾਨੇ ‘ਤੇ ਇਨ੍ਹਾਂ ਝਟਕਿਆਂ ਦੀ ਤੀਬਰਤਾ ਕ੍ਰਮਵਾਰ 3 ਅਤੇ 2 ਮਾਪੀ ਗਈ। ਲਗਾਤਾਰ ਆਏ ਭੂਚਾਲ ਦੇ ਝਟਕਿਆਂ ਕਾਰਨ ਸਥਾਨਕ ਲੋਕ ਦਹਿਸ਼ਤ ‘ਚ ਹਨ ਅਤੇ ਉਨ੍ਹਾਂ ਨੇ ਸੁਰੱਖਿਅਤ ਥਾਵਾਂ ‘ਤੇ ਜਾਣਾ ਸ਼ੁਰੂ ਕਰ ਦਿੱਤਾ ਹੈ।
