ਕੈਨੇਡਾ: ਕੈਨੇਡਾ ਦੇ ਨੋਵਾ ਸਕੋਸ਼ੀਆ ਸੂਬੇ ਨਾਲ ਸਬੰਧਤ 18 ਸਾਲਾ ਫੁੱਟਬਾਲ ਖਿਡਾਰੀ ਮਾਰਸੇਲਸ ਯੰਗ ਕੈਸਾਰੀਓ ਦੀ ਮੌਤ ਹੋ ਗਈ ਹੈ। ਉਹ ਅਮਰੀਕਾ ਦੀ ਮਸ਼ਹੂਰ ਯੂਨੀਵਰਸਿਟੀ ਆਫ਼ ਜਾਰਜੀਆ ਦੀ ਫੁੱਟਬਾਲ ਟੀਮ ‘ਜਾਰਜੀਆ ਬੁਲਡੌਗਜ਼’ ਨਾਲ ਜੁੜਨ ਦੀ ਤਿਆਰੀ ਕਰ ਰਿਹਾ ਸੀ। ਉਸ ਦੀ ਮੌਤ ਦੀ ਖ਼ਬਰ ਨਾਲ ਪਰਿਵਾਰ, ਦੋਸਤਾਂ, ਕੋਚਾਂ ਅਤੇ ਖੇਡ ਜਗਤ ਵਿੱਚ ਸੋਗ ਦੀ ਲਹਿਰ ਹੈ।
ਜਾਣਕਾਰੀ ਮੁਤਾਬਕ ਮਾਰਸੇਲਸ ਜਾਰਜੀਆ ਦੇ ਇੱਕ ਸਕੂਲ ਵਿੱਚ 12ਵੀਂ ਜਮਾਤ ਦਾ ਵਿਦਿਆਰਥੀ ਸੀ। ਸ਼ੁੱਕਰਵਾਰ ਨੂੰ ਮੈਡੀਕਲ ਐਮਰਜੈਂਸੀ ਤੋਂ ਬਾਅਦ ਉਸ ਦੀ ਮੌਤ ਹੋ ਗਈ। ਉਸ ਦੇ ਪਿਤਾ ਡੇਵਿਨ ਕੈਸਾਰੀਓ ਨੇ ਦੱਸਿਆ ਕਿ ਪੁੱਤਰ ਪਿਛਲੇ ਕੁਝ ਸਮੇਂ ਤੋਂ ਠੀਕ ਮਹਿਸੂਸ ਨਹੀਂ ਕਰ ਰਿਹਾ ਸੀ ਅਤੇ ਉਸ ਨੂੰ ਦਿਲ ਨਾਲ ਜੁੜੀਆਂ ਕੁਝ ਸਮੱਸਿਆਵਾਂ ਵੀ ਆ ਰਹੀਆਂ ਸਨ।
ਬਚਪਨ ਤੋਂ ਹੀ ਫੁੱਟਬਾਲ ਦਾ ਸੀ ਜਨੂੰਨ
6 ਫੁੱਟ 6 ਇੰਚ ਲੰਬੇ ਅਤੇ ਲਗਭਗ 275 ਪੌਂਡ ਭਾਰ ਵਾਲੇ ਮਾਰਸੇਲਸ ਨੇ ਮਹਿਜ਼ ਛੇ ਸਾਲ ਦੀ ਉਮਰ ਵਿੱਚ ਫੁੱਟਬਾਲ ਖੇਡਣਾ ਸ਼ੁਰੂ ਕਰ ਦਿੱਤਾ ਸੀ। ਉਸ ਨੇ ਹੈਲੀਫੈਕਸ, ਟਿੰਬਰਲੀ ਅਤੇ ਸਾਊਥ ਸ਼ੋਰ ਦੀਆਂ ਟੀਮਾਂ ਵੱਲੋਂ ਖੇਡਿਆ।
ਉਸ ਦੇ ਸਾਬਕਾ ਕੋਚਾਂ ਦਾ ਕਹਿਣਾ ਹੈ ਕਿ ਮੈਦਾਨ ਵਿੱਚ ਉਸ ਦੀ ਲੰਬਾਈ, ਤਾਕਤ ਅਤੇ ਤੇਜ਼ੀ ਪ੍ਰਭਾਵਸ਼ਾਲੀ ਸੀ, ਪਰ ਸਭ ਤੋਂ ਵੱਡੀ ਖ਼ਾਸੀਅਤ ਖੇਡ ਪ੍ਰਤੀ ਉਸ ਦਾ ਸਮਰਪਣ ਅਤੇ ਲਗਾਤਾਰ ਬਿਹਤਰ ਬਣਨ ਦੀ ਇੱਛਾ ਸੀ। ਉਹ ਡਿਫੈਂਸਿਵ ਐਂਡ ਦੀ ਪੁਜ਼ੀਸ਼ਨ ’ਤੇ ਖੇਡਦਾ ਸੀ।
ਸਾਬਕਾ ਕੋਚ ਚਾਨੁਏਨ ਫਲਿੰਟ ਨੇ ਦੱਸਿਆ ਕਿ ਮਾਰਸੇਲਸ ਜਦੋਂ ਵੀ ਮੈਦਾਨ ਵਿੱਚ ਆਉਂਦਾ ਸੀ ਤਾਂ ਪੂਰੀ ਗੰਭੀਰਤਾ ਨਾਲ ਖੇਡਦਾ ਸੀ। ਉਸ ਨੂੰ ਫੁੱਟਬਾਲ ਨਾਲ ਬੇਹੱਦ ਪਿਆਰ ਸੀ ਅਤੇ ਉਹ ਆਪਣੀ ਖੇਡ ਨੂੰ ਨਿਖਾਰਨ ਲਈ ਹਮੇਸ਼ਾ ਮਿਹਨਤ ਕਰਦਾ ਰਹਿੰਦਾ ਸੀ।
ਸੱਟ ਤੋਂ ਬਾਅਦ ਕੀਤੀ ਸੀ ਜ਼ਬਰਦਸਤ ਵਾਪਸੀ
ਮਾਰਸੇਲਸ ਪਿਛਲੇ ਦੋ ਸਾਲਾਂ ਤੋਂ ਜਾਰਜੀਆ ਦੇ ਰਾਬਨ ਗੈਪ-ਨਾਕੂਚੀ ਸਕੂਲ ਵਿੱਚ ਪੜ੍ਹਾਈ ਅਤੇ ਫੁੱਟਬਾਲ ਦੀ ਸਿਖਲਾਈ ਲੈ ਰਿਹਾ ਸੀ। ਇਸ ਤੋਂ ਪਹਿਲਾਂ ਉਹ ਓਂਟਾਰੀਓ ਦੇ ਇੱਕ ਬੋਰਡਿੰਗ ਸਕੂਲ ਵਿੱਚ ਵੀ ਪੜ੍ਹਿਆ ਸੀ।
ਪਿਛਲੇ ਸਾਲ ਉਸ ਦੇ ਕਮਰ ਦੇ ਜੋੜ ਨਾਲ ਜੁੜੀ ਸੱਟ ਲੱਗ ਗਈ ਸੀ, ਜਿਸ ਕਾਰਨ ਉਸ ਦੀ ਸਰਜਰੀ ਕਰਵਾਉਣੀ ਪਈ ਅਤੇ ਕਰੀਬ ਛੇ ਮਹੀਨੇ ਆਰਾਮ ਕਰਨਾ ਪਿਆ। ਉਸ ਸਮੇਂ ਇਹ ਵੀ ਸਪੱਸ਼ਟ ਨਹੀਂ ਸੀ ਕਿ ਉਹ ਪਹਿਲਾਂ ਵਾਂਗ ਮੈਦਾਨ ਵਿੱਚ ਵਾਪਸੀ ਕਰ ਸਕੇਗਾ ਜਾਂ ਨਹੀਂ।
ਪਰ ਅਗਸਤ ਵਿੱਚ ਟ੍ਰੇਨਿੰਗ ਕੈਂਪ ਸ਼ੁਰੂ ਹੋਣ ’ਤੇ ਉਸ ਨੇ ਆਪਣੀ ਫਿਟਨੈੱਸ ਅਤੇ ਸਮਰੱਥਾ ਸਾਬਤ ਕਰ ਦਿੱਤੀ। ਉਸ ਦੇ ਪਿਤਾ ਨੇ ਦੱਸਿਆ ਕਿ ਪਹਿਲੇ ਕੰਡੀਸ਼ਨਿੰਗ ਟੈਸਟ ਤੋਂ ਬਾਅਦ ਪੁੱਤਰ ਨੇ ਉਨ੍ਹਾਂ ਨੂੰ ਫ਼ੋਨ ਕੀਤਾ ਸੀ। ਉਹ ਖੁਸ਼ੀ ਨਾਲ ਭਾਵੁਕ ਹੋ ਗਿਆ ਸੀ, ਕਿਉਂਕਿ ਉਸ ਨੂੰ ਯਕੀਨ ਹੋ ਗਿਆ ਸੀ ਕਿ ਉਹ ਸੱਟ ਤੋਂ ਬਾਅਦ ਪੂਰੀ ਤਰ੍ਹਾਂ ਵਾਪਸੀ ਕਰ ਸਕਦਾ ਹੈ।
ਜਾਰਜੀਆ ਯੂਨੀਵਰਸਿਟੀ ’ਚ ਪੜ੍ਹਾਈ ਦਾ ਸੀ ਸੁਪਨਾ
ਮਾਰਸੇਲਸ ਨੂੰ ਮਿਸ਼ੀਗਨ ਸਟੇਟ ਅਤੇ ਜਾਰਜੀਆ ਟੈਕ ਵਰਗੀਆਂ ਯੂਨੀਵਰਸਿਟੀਆਂ ਵੱਲੋਂ ਵੀ ਦਿਲਚਸਪੀ ਮਿਲੀ ਸੀ, ਪਰ ਉਸ ਨੇ ਯੂਨੀਵਰਸਿਟੀ ਆਫ਼ ਜਾਰਜੀਆ ਦੀ ਚੋਣ ਕੀਤੀ ਸੀ। ਉਹ ਅਗਲੇ ਸਾਲ ਜਨਵਰੀ ਤੋਂ ਉੱਥੇ ਪੜ੍ਹਾਈ ਸ਼ੁਰੂ ਕਰਨ ਵਾਲਾ ਸੀ ਅਤੇ ਫੁੱਟਬਾਲ ਟੀਮ ਨਾਲ ਜੁੜਨਾ ਸੀ।
ਉਸ ਦੇ ਪਿਤਾ ਮੁਤਾਬਕ ਮਾਰਸੇਲਸ ਫੁੱਟਬਾਲ ਦੇ ਨਾਲ-ਨਾਲ ਕ੍ਰਿਮਿਨੋਲੋਜੀ ਦੀ ਪੜ੍ਹਾਈ ਵੀ ਕਰਨਾ ਚਾਹੁੰਦਾ ਸੀ। ਮੈਦਾਨ ਤੋਂ ਬਾਹਰ ਉਹ ਸ਼ਾਂਤ ਸੁਭਾਅ ਦਾ ਸੀ ਅਤੇ ਧਾਰਮਿਕ ਵਿਸ਼ਵਾਸ ਉਸ ਦੀ ਜ਼ਿੰਦਗੀ ਵਿੱਚ ਅਹਿਮ ਸਥਾਨ ਰੱਖਦਾ ਸੀ।
ਉਸ ਦੇ ਕੋਚਾਂ ਅਤੇ ਪਰਿਵਾਰਕ ਦੋਸਤਾਂ ਨੇ ਉਸ ਨੂੰ ਖੁਸ਼ਮਿਜ਼ਾਜ਼, ਨਿਮਰ ਅਤੇ ਮਦਦਗਾਰ ਇਨਸਾਨ ਵਜੋਂ ਯਾਦ ਕੀਤਾ। ਉਹ ਆਪਣੀ ਕਾਮਯਾਬੀ ਦੇ ਬਾਵਜੂਦ ਆਪਣੇ ਪੁਰਾਣੇ ਕੋਚਾਂ ਅਤੇ ਉਨ੍ਹਾਂ ਲੋਕਾਂ ਨੂੰ ਨਹੀਂ ਭੁੱਲਿਆ, ਜਿਨ੍ਹਾਂ ਨੇ ਉਸ ਨੂੰ ਅੱਗੇ ਵਧਣ ਵਿੱਚ ਮਦਦ ਕੀਤੀ ਸੀ।
ਮਾਰਸੇਲਸ ਦੇ ਪਿਤਾ ਨੇ ਕਿਹਾ ਕਿ ਪਰਿਵਾਰ ਇਸ ਦੁੱਖ ਦੀ ਘੜੀ ਵਿੱਚ ਪੂਰੀ ਤਰ੍ਹਾਂ ਟੁੱਟ ਚੁੱਕਾ ਹੈ, ਪਰ ਉਨ੍ਹਾਂ ਨੂੰ ਆਪਣੇ ਪੁੱਤਰ ਦੀਆਂ ਪ੍ਰਾਪਤੀਆਂ ’ਤੇ ਮਾਣ ਹੈ। ਉਨ੍ਹਾਂ ਉਮੀਦ ਜਤਾਈ ਕਿ ਉਸ ਦੀ ਜ਼ਿੰਦਗੀ ਹੋਰਨਾਂ ਨੌਜਵਾਨ ਖਿਡਾਰੀਆਂ ਲਈ ਪ੍ਰੇਰਣਾ ਬਣੇਗੀ ਅਤੇ ਉਹ ਵੀ ਮਿਹਨਤ ਤੇ ਲਗਨ ਨਾਲ ਆਪਣੇ ਸੁਪਨੇ ਪੂਰੇ ਕਰਨ ਦੀ ਕੋਸ਼ਿਸ਼ ਕਰਨਗੇ।
