ਨਵੀਂ ਦਿੱਲੀ: ਰਾਸ਼ਟਰੀ ਰਾਜਧਾਨੀ (The national capital) ‘ਚ ਇਸ ਮਹੀਨੇ ਹੁਣ ਤੱਕ ਕੋਈ ਬਾਰਿਸ਼ ਨਹੀਂ ਹੋਈ ਹੈ, ਜੋ ਕਿ ਪਿਛਲੇ ਸਾਲਾਂ ਦੇ ਮੁਕਾਬਲੇ ਇਕ ਅਸਾਧਾਰਨ ਵਰਤਾਰਾ ਹੈ। ਇਹ ਜਾਣਕਾਰੀ ਭਾਰਤੀ ਮੌਸਮ ਵਿਭਾਗ (IMD) ਦੇ ਅੰਕੜਿਆਂ ਤੋਂ ਮਿਲੀ ਹੈ।
ਆਈਐਮਡੀ ਦੇ ਅੰਕੜਿਆਂ ਦੇ ਅਨੁਸਾਰ, ਪਿਛਲੇ ਸੱਤ ਸਾਲਾਂ ਤੋਂ , ਦਿੱਲੀ ਵਿੱਚ ਜਨਵਰੀ ਮਹੀਨੇ ਇੱਕ ਤੋਂ ਛੇ ਦਿਨ ਮੀਂਹ ਦਾ ਰੁਝਾਨ ਦੇਖਿਆ ਗਿਆ ਸੀ ਅਤੇ ਇਸ ਸਮੇਂ ਦੌਰਾਨ ਸਫਦਰਜੰਗ ਆਬਜ਼ਰਵੇਟਰੀ ਵਿੱਚ ਜਨਵਰੀ ਮਹੀਨੇ ਆਮ ਬਾਰਿਸ਼ ਦਾ ਪੱਧਰ 8.1 ਮਿਲੀਮੀਟਰ ਰਿਹਾ ਸੀ । ਰਾਸ਼ਟਰੀ ਰਾਜਧਾਨੀ ‘ਚ ਇਸ ਮਹੀਨੇ ਹੁਣ ਤੱਕ ਕੋਈ ਬਾਰਿਸ਼ ਨਹੀਂ ਹੋਈ ਹੈ ਅਤੇ ਮਹੀਨਾ ਖਤਮ ਹੋਣ ‘ਚ ਸਿਰਫ 7 ਦਿਨ ਬਾਕੀ ਹਨ।
ਆਈਐਮਡੀ ਦੇ ਅੰਕੜਿਆਂ ਅਨੁਸਾਰ, ਪਿਛਲੇ ਸਾਲ ਜਨਵਰੀ ਮਹੀਨੇ ਦਿੱਲੀ ਵਿੱਚ 20.4 ਮਿਲੀਮੀਟਰ ਬਾਰਿਸ਼ ਹੋਈ ਸੀ, ਜੋ ਕਿ 19.1 ਮਿਲੀਮੀਟਰ ਦੇ ਆਮ ਨਾਲੋਂ ਵੱਧ ਸੀ। 2022 ਵਿੱਚ ਜਨਵਰੀ ਮਹੀਨੇ ਸ਼ਹਿਰ ਵਿੱਚ 88.2 ਮਿਲੀਮੀਟਰ ਵਰਖਾ ਦਰਜ ਕੀਤੀ ਗਈ ਸੀ, ਜੋ ਕਿ 21.7 ਮਿਲੀਮੀਟਰ ਦੇ ਆਮ ਨਾਲੋਂ ਬਹੁਤ ਜ਼ਿਆਦਾ ਸੀ।
ਇਸ ਤੋਂ ਪਹਿਲਾਂ 2016 ‘ਚ ਜਨਵਰੀ ‘ਚ ਘੱਟ ਬਾਰਿਸ਼ ਹੋਈ ਸੀ। ਆਈਐਮਡੀ ਦੇ ਅੰਕੜਿਆਂ ਦੇ ਅਨੁਸਾਰ, ਇਸ ਵਾਰ ਜਨਵਰੀ ਮਹੀਨੇ ਦਿੱਲੀ ਵਿੱਚ ਪੰਜ ਠੰਡੇ ਦਿਨ ਰਹੇ ਅਤੇ ਪੰਜ ਦਿਨਾਂ ਤੱਕ ਸੀਤ ਲਹਿਰ ਦੀ ਸਥਿਤੀ ਬਣੀ ਰਹੀ, ਜੋ ਪਿਛਲੇ 13 ਸਾਲਾਂ ਵਿੱਚ ਸਭ ਤੋਂ ਵੱਧ ਹੈ।
ਮੌਸਮ ਵਿਭਾਗ ਨੇ ਕਿਹਾ ਕਿ ਰਾਸ਼ਟਰੀ ਰਾਜਧਾਨੀ ‘ਚ ਅੱਜ ਘੱਟੋ-ਘੱਟ ਤਾਪਮਾਨ 6.9 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਹੈ । ਵਿਭਾਗ ਮੁਤਾਬਕ ਸਵੇਰੇ ਅਤੇ ਰਾਤ ਨੂੰ ਸੰਘਣੀ ਧੁੰਦ ਛਾਈ ਰਹੀ। ਦਿੱਲੀ ਵਿੱਚ 15 ਜਨਵਰੀ ਨੂੰ ਘੱਟੋ-ਘੱਟ ਤਾਪਮਾਨ 3.3 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਹੈ, ਜੋ ਇਸ ਸੀਜ਼ਨ ਦਾ ਸਭ ਤੋਂ ਘੱਟ ਤਾਪਮਾਨ ਹੈ।