ਕੈਨਾਨਾਸਕਿਸ, ਅਲਬਰਟਾ, 26 ਮਈ (ਨਿਊਜ਼ ਡੈਸਕ): David Eby ਨੇ ਅਲਬਰਟਾ ਵਿੱਚ ਹੋ ਰਹੀ ਪੱਛਮੀ ਕੈਨੇਡੀਅਨ ਪ੍ਰੀਮੀਅਰਾਂ ਦੀ ਮੀਟਿੰਗ ਦੇ ਮਕਸਦ ‘ਤੇ ਸਵਾਲ ਖੜ੍ਹੇ ਕਰਦੇ ਹੋਏ ਕਿਹਾ ਹੈ ਕਿ ਜਦੋਂ ਮੀਟਿੰਗ ਦੀ ਮੇਜ਼ਬਾਨ ਪ੍ਰੀਮੀਅਰ ਖੁਦ ਅਲੱਗ ਹੋਣ ਸਬੰਧੀ ਰੈਫਰੈਂਡਮ ਦੀ ਗੱਲ ਕਰ ਰਹੀ ਹੋਵੇ, ਤਾਂ ਸਹਿਯੋਗ ਦੀ ਗੱਲ ਕਰਨਾ ਅਜੀਬ ਲੱਗਦਾ ਹੈ।
ਏਬੀ ਨੇ ਕਿਹਾ ਕਿ “ਦੇਸ਼ ਨੂੰ ਜੋੜ ਕੇ ਰੱਖਣ ਵਾਲੇ ਰਿਸ਼ਤਿਆਂ ਦੀ ਪਰਖ ਕਰਨ ਲਈ ਇਸ ਤੋਂ ਮਾੜਾ ਸਮਾਂ ਹੋ ਹੀ ਨਹੀਂ ਸਕਦਾ।” ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਅਜਿਹੀਆਂ ਚਰਚਾਵਾਂ ਉਹਨਾਂ ਲੋਕਾਂ ਨੂੰ ਹੌਸਲਾ ਦਿੰਦੀਆਂ ਹਨ ਜੋ ਕੈਨੇਡਾ ਨੂੰ ਤੋੜਨਾ ਚਾਹੁੰਦੇ ਹਨ।
ਇਹ ਬਿਆਨ ਉਸ ਸਮੇਂ ਆਇਆ ਹੈ ਜਦੋਂ Danielle Smith ਨੇ ਐਲਾਨ ਕੀਤਾ ਹੈ ਕਿ ਅਕਤੂਬਰ ਵਿੱਚ ਹੋਣ ਵਾਲੇ ਰੈਫਰੈਂਡਮ ਵਿੱਚ ਲੋਕਾਂ ਤੋਂ ਪੁੱਛਿਆ ਜਾਵੇਗਾ ਕਿ ਕੀ ਅਲਬਰਟਾ ਕੈਨੇਡਾ
ਵਿੱਚ ਰਹਿਣਾ ਚਾਹੁੰਦਾ ਹੈ ਜਾਂ ਅਲੱਗ ਹੋਣ ਲਈ ਬਾਈਡਿੰਗ ਰੈਫਰੈਂਡਮ ਦੀ ਪ੍ਰਕਿਰਿਆ ਸ਼ੁਰੂ ਕਰਨੀ ਚਾਹੁੰਦਾ ਹੈ।
ਏਬੀ ਨੇ ਇਸ ਵੋਟ ਨੂੰ “ਗੈਰ-ਜ਼ਿੰਮੇਵਾਰਾਨਾ ਕਦਮ” ਕਰਾਰ ਦਿੰਦਿਆਂ ਕਿਹਾ ਕਿ ਇਸ ਹਫ਼ਤੇ ਹੋਣ ਵਾਲੀ ਪੱਛਮੀ ਅਤੇ ਉੱਤਰੀ ਸੂਬਿਆਂ ਦੀ ਮੀਟਿੰਗ ਦਾ ਅਸਲ ਮਕਸਦ ਅੰਦਰੂਨੀ ਵਪਾਰਕ ਰੁਕਾਵਟਾਂ, ਰਾਸ਼ਟਰੀ ਸੁਰੱਖਿਆ ਅਤੇ ਆਰਥਿਕ ਕੋਰੀਡੋਰਾਂ ਬਾਰੇ ਵਿਚਾਰ ਕਰਨਾ ਸੀ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਹਾਲਾਤਾਂ ਵਿੱਚ ਇਹ ਚਰਚਾਵਾਂ ਵੀ ਅਸਹਜ ਲੱਗ ਰਹੀਆਂ ਹਨ।
ਮੀਟਿੰਗ ਵਿੱਚ ਬ੍ਰਿਟਿਸ਼ ਕੋਲੰਬੀਆ, ਅਲਬਰਟਾ, ਸਸਕਾਚਵਨ, ਮੈਨਿਟੋਬਾ, ਯੂਕੋਨ ਅਤੇ ਨਾਰਥਵੈਸਟ ਟੈਰੀਟਰੀਜ਼ ਦੇ ਪ੍ਰੀਮੀਅਰ ਸ਼ਾਮਲ ਹੋ ਰਹੇ ਹਨ, ਜਦਕਿ ਨੁਨਾਵੁਤ ਦੇ ਪ੍ਰੀਮੀਅਰ ਵਰਚੁਅਲ ਤੌਰ ‘ਤੇ ਹਿੱਸਾ ਲੈਣਗੇ।
ਇਸ ਦੌਰਾਨ ਏਬੀ ਨੇ ਮਜ਼ਾਕੀਆ ਅੰਦਾਜ਼ ਵਿੱਚ ਦੱਸਿਆ ਕਿ ਉਨ੍ਹਾਂ ਨੂੰ ਡੈਨੀਅਲ ਸਮਿਥ ਵੱਲੋਂ ਭੇਟ ਕੀਤੇ ਗਏ
ਗੂੜ੍ਹੇ ਭੂਰੇ ਕਾਊਬਾਏ ਬੂਟ ਬਹੁਤ ਪਸੰਦ ਆਏ ਹਨ, ਪਰ ਨਾਲ ਹੀ ਉਨ੍ਹਾਂ ਨੇ ਕਿਹਾ ਕਿ ਰਾਜਨੀਤਿਕ ਅਸਹਿਮਤੀਆਂ ਦੇ ਬਾਵਜੂਦ ਦੇਸ਼ ਨੂੰ ਇਕੱਠਾ ਰੱਖਣਾ ਸਭ ਤੋਂ ਵੱਡੀ ਤਰਜੀਹ ਹੋਣੀ ਚਾਹੀਦੀ ਹੈ।
ਦੂਜੇ ਪਾਸੇ ਸਮਿਥ ਨੇ ਦੋਸ਼ ਲਗਾਇਆ ਕਿ ਫੈਡਰਲ ਸਰਕਾਰ ਅਤੇ ਬੀ.ਸੀ. ਦੀਆਂ ਪਿਛਲੀਆਂ ਅਤੇ ਮੌਜੂਦਾ ਸਰਕਾਰਾਂ ਨੇ ਅਲਬਰਟਾ ਦੇ ਤੇਲ ਉਦਯੋਗ ਦੇ ਵਿਕਾਸ ਵਿੱਚ ਰੁਕਾਵਟਾਂ ਪੈਦਾ ਕੀਤੀਆਂ ਹਨ। ਉਨ੍ਹਾਂ ਕਿਹਾ ਕਿ ਵੈਸਟ ਕੋਸਟ ਦੇ ਬੰਦਰਗਾਹ ਸਿਰਫ਼ ਬੀ.ਸੀ. ਦੇ ਨਹੀਂ, ਸਗੋਂ ਪੂਰੇ ਕੈਨੇਡਾ ਦੇ ਹਨ।
ਇਸੇ ਦੌਰਾਨ ਅਲਬਰਟਾ ਸਰਕਾਰ ਜੁਲਾਈ ਤੱਕ ਬੀ.ਸੀ. ਰਾਹੀਂ ਨਵੀਂ ਵੈਸਟ ਕੋਸਟ ਆਇਲ ਪਾਈਪਲਾਈਨ ਦਾ ਪ੍ਰਸਤਾਵ ਪੇਸ਼ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਏਬੀ ਨੇ ਦੁਹਰਾਇਆ ਕਿ ਬੀ.ਸੀ. ਦੇ ਸਮੁੰਦਰੀ ਤਟ ‘ਤੇ ਲਾਗੂ ਆਇਲ ਟੈਂਕਰ ਪਾਬੰਦੀ ਨਾਲ ਕੋਈ ਸਮਝੌਤਾ ਨਹੀਂ ਕੀਤਾ ਜਾਵੇਗਾ।
ਉਨ੍ਹਾਂ ਇਹ ਵੀ ਕਿਹਾ ਕਿ ਪ੍ਰਧਾਨ ਮੰਤਰੀ Mark Carney ਨੂੰ ਬੀ.ਸੀ. ਦੇ ਪ੍ਰੋਜੈਕਟਾਂ ਨੂੰ ਵੀ ਉਹੀ ਤਰਜੀਹ ਦੇਣੀ ਚਾਹੀਦੀ ਹੈ ਜੋ ਅਲਬਰਟਾ ਨੂੰ ਦਿੱਤੀ ਜਾ ਰਹੀ ਹੈ।
ਉੱਥੇ ਹੀ Scott Moe ਨੇ ਕਿਹਾ ਕਿ ਉਨ੍ਹਾਂ ਦੇ ਵਿਚਾਰ ਅਨੁਸਾਰ ਸਮਿਥ ਕੋਲ ਸੂਬਾਈ ਕਾਨੂੰਨ ਦੇ ਤਹਿਤ ਇਹ ਵੋਟ ਐਲਾਨ ਕਰਨ ਤੋਂ ਇਲਾਵਾ ਹੋਰ ਕੋਈ ਚੋਣ ਨਹੀਂ ਸੀ। ਹਾਲਾਂਕਿ ਉਨ੍ਹਾਂ ਕਿਹਾ ਕਿ ਸਸਕਾਚਵਨ ਦੇ ਪ੍ਰੀਮੀਅਰ ਵਜੋਂ ਉਹ ਅਲਬਰਟਾ ਦੇ ਲੋਕਾਂ ਦੇ ਫ਼ੈਸਲੇ ‘ਤੇ ਟਿੱਪਣੀ ਨਹੀਂ ਕਰਨਗੇ।
