ਵੈਨਕੂਵਰ, 10 ਜੂਨ 2026 — ਬ੍ਰਿਟਿਸ਼ ਕੋਲੰਬੀਆ ਦੇ ਪ੍ਰੀਮੀਅਰ ਨੇ ਅਮਰੀਕੀ ਰਾਸ਼ਟਰਪਤੀ Donald Trump ਦੇ ਉਸ ਬਿਆਨ ‘ਤੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਹੈ ਜਿਸ ਵਿੱਚ ਉਨ੍ਹਾਂ ਨੇ ਕਿਹਾ ਸੀ ਕਿ ਉਹ ਕੈਨੇਡਾ, ਅਮਰੀਕਾ ਅਤੇ ਮੈਕਸੀਕੋ ਵਿਚਾਲੇ ਹੋਏ ਵਪਾਰ ਸਮਝੌਤੇ CUSMA ਨੂੰ ਮੁੜ ਨਵਾਂ ਕਰਨ ਦੀ ਇੱਛਾ ਨਹੀਂ ਰੱਖਦੇ। ਪ੍ਰੀਮੀਅਰ ਨੇ ਇਸ ਟਿੱਪਣੀ ਨੂੰ “lame” ਦੱਸਦੇ ਹੋਏ ਇਸਨੂੰ Trump ਦੀ 1987 ਦੀ ਕਿਤਾਬ The Art of the Deal ਦੀ “ਖਰਾਬ sequel” ਕਰਾਰ ਦਿੱਤਾ।
ਪ੍ਰੀਮੀਅਰ ਨੇ ਕਿਹਾ ਕਿ ਟਰੰਪ ਦਾ ਇਹ ਰੁਖ਼ ਹੈਰਾਨ ਕਰਨ ਵਾਲਾ ਹੈ ਕਿਉਂਕਿ ਤਿੰਨਾਂ ਦੇਸ਼ਾਂ ਵਿਚਾਲੇ CUSMA ਦੀ ਸਮੀਖਿਆ ਪ੍ਰਕਿਰਿਆ ਪਹਿਲਾਂ ਹੀ ਚੱਲ ਰਹੀ ਹੈ। ਉਨ੍ਹਾਂ ਅਨੁਸਾਰ ਵਪਾਰ ਸਮਝੌਤੇ ਨੂੰ ਖਤਮ ਕਰਨ ਜਾਂ ਨਵਾਂ ਨਾ ਕਰਨ ਦੀ ਗੱਲ ਮੌਜੂਦਾ ਹਕੀਕਤਾਂ ਨਾਲ ਮੇਲ ਨਹੀਂ ਖਾਂਦੀ।
ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਦੀ ਸਮਝ ਮੁਤਾਬਕ CUSMA ਕਿਸੇ ਇਕ ਵਾਰ ਖਤਮ ਹੋਣ ਵਾਲਾ ਸਮਝੌਤਾ ਨਹੀਂ, ਸਗੋਂ ਇਸ ਵਿੱਚ ਸਮੇਂ-ਸਮੇਂ ‘ਤੇ ਸਮੀਖਿਆ ਅਤੇ ਵਾਧੇ ਦੀ ਪ੍ਰਕਿਰਿਆ ਸ਼ਾਮਲ ਹੈ। ਇਸ ਲਈ ਇਸਨੂੰ ਅਚਾਨਕ ਖਤਮ ਕਰਨ ਦੀ ਗੱਲ ਅਸਪਸ਼ਟ ਅਤੇ ਉਲਝਣ ਭਰੀ ਹੈ।
ਟਰੰਪ ਨੇ ਹਾਲ ਹੀ ਵਿੱਚ ਕਿਹਾ ਸੀ ਕਿ ਅਮਰੀਕਾ ਨੂੰ ਕੈਨੇਡਾ ਜਾਂ ਮੈਕਸੀਕੋ ਦੀਆਂ ਚੀਜ਼ਾਂ ਦੀ ਲੋੜ ਨਹੀਂ ਅਤੇ ਦੋਵੇਂ ਦੇਸ਼ਾਂ ਨੂੰ ਅਮਰੀਕਾ ‘ਤੇ ਵੱਧ ਨਿਰਭਰਤਾ ਹੈ। ਇਹ ਬਿਆਨ ਕੈਨੇਡਾ-ਅਮਰੀਕਾ ਵਪਾਰ ਸੰਬੰਧਾਂ ਵਿੱਚ ਨਵਾਂ ਤਣਾਅ ਪੈਦਾ ਕਰ ਰਹੇ ਹਨ।
ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਜੇ CUSMA ਦੇ ਭਵਿੱਖ ‘ਤੇ ਅਣਿਸ਼ਚਿਤਤਾ ਵਧਦੀ ਹੈ ਤਾਂ ਇਸਦਾ ਸਿੱਧਾ ਅਸਰ ਕੈਨੇਡਾ ਦੀ ਅਰਥਵਿਵਸਥਾ, ਖਾਸ ਕਰਕੇ ਆਟੋਮੋਬਾਈਲ, ਊਰਜਾ ਅਤੇ ਖੇਤੀਬਾੜੀ ਖੇਤਰਾਂ ‘ਤੇ ਪੈ ਸਕਦਾ ਹੈ।
ਕੈਨੇਡਾ ਸਰਕਾਰ ਵੱਲੋਂ ਕਿਹਾ ਗਿਆ ਹੈ ਕਿ ਉਹ ਸਮਝੌਤੇ ਦੀ ਸਥਿਰਤਾ ਅਤੇ 16 ਸਾਲਾਂ ਦੇ ਵਾਧੇ ਲਈ ਵਚਨਬੱਧ ਹੈ ਅਤੇ ਗੱਲਬਾਤਾਂ ਰਾਹੀਂ ਸਾਂਝੇ ਹਿਤਾਂ ਦੀ ਰੱਖਿਆ ਕੀਤੀ ਜਾਵੇਗੀ।
