ਓਟਵਾ, 25 ਮਈ ((ਨਿਊਜ਼ ਡੈਸਕ):- ਪ੍ਰਧਾਨ ਮੰਤਰੀ Mark Carney ਦੀ ਅਗਵਾਈ ਹੇਠ ਫੈਡਰਲ ਲਿਬਰਲ ਸਰਕਾਰ ਦੇ ਕਲਾਈਮਟ ਕਾਕਸ ਦੀ ਇੱਕ ਅਹਿਮ ਮੀਟਿੰਗ ਸੋਮਵਾਰ ਸ਼ਾਮ ਨੂੰ ਹੋਣ ਜਾ ਰਹੀ ਹੈ। ਇਹ ਮੀਟਿੰਗ ਉਸ ਸਮੇਂ ਹੋ ਰਹੀ ਹੈ ਜਦੋਂ ਕੁਝ ਲਿਬਰਲ ਸੰਸਦ ਮੈਂਬਰ ਸਰਕਾਰ ‘ਤੇ ਵਾਤਾਵਰਣ ਨਾਲ ਜੁੜੇ ਵਾਅਦਿਆਂ ਤੋਂ ਪਿੱਛੇ ਹਟਣ ਦੇ ਦੋਸ਼ ਲਗਾ ਰਹੇ ਹਨ।
ਸੂਤਰਾਂ ਦੇ ਅਨੁਸਾਰ Canadian Climate Institute ਦੇ ਪ੍ਰਧਾਨ ਰਿੱਕ ਸਮਿੱਥ ਵੀ ਮੀਟਿੰਗ ਵਿੱਚ ਸ਼ਾਮਲ ਹੋਣਗੇ ਅਤੇ ਸੰਸਦ ਮੈਂਬਰਾਂ ਨਾਲ ਮੌਜੂਦਾ ਕਲਾਈਮਟ ਨੀਤੀਆਂ ‘ਤੇ ਵਿਚਾਰ-ਵਟਾਂਦਰਾ ਕਰਨਗੇ।
ਰਿਪੋਰਟਾਂ ਮੁਤਾਬਕ ਇੱਕ ਦਰਜਨ ਤੋਂ ਵੱਧ ਲਿਬਰਲ ਐਮਪੀਜ਼ ਨੇ ਪਿਛਲੇ ਮਹੀਨੇ ਪ੍ਰਧਾਨ ਮੰਤਰੀ ਕਾਰਨੀ ਨੂੰ ਚਿੱਠੀ ਲਿਖ ਕੇ ਚਿੰਤਾ ਜਤਾਈ ਸੀ ਕਿ ਅਲਬਰਟਾ ਨਾਲ ਪਾਈਪਲਾਈਨ ਸਮਝੌਤੇ ਨੂੰ ਅੱਗੇ ਵਧਾਉਂਦਿਆਂ ਸਰਕਾਰ ਵਾਤਾਵਰਣ ਸੁਰੱਖਿਆ ਨਾਲ ਸੰਬੰਧਿਤ ਨੀਤੀਆਂ ਨੂੰ ਕਮਜ਼ੋਰ ਕਰ ਰਹੀ ਹੈ।
ਇਸ ਮਾਮਲੇ ‘ਤੇ ਪ੍ਰਤੀਕਿਰਿਆ ਦਿੰਦਿਆਂ Mark Carney ਨੇ ਕਿਹਾ ਕਿ “ਇੱਕ ਸਿਹਤਮੰਦ ਕਾਕਸ ਵਿੱਚ ਵੱਖ-ਵੱਖ ਵਿਚਾਰ ਹੋਣਾ ਆਮ ਗੱਲ ਹੈ।” ਉਨ੍ਹਾਂ ਕਿਹਾ ਕਿ 160 ਮੈਂਬਰਾਂ ਵਾਲੇ ਕਾਕਸ ਵਿੱਚ ਜ਼ਿਆਦਾਤਰ ਮੈਂਬਰ ਸਰਕਾਰ ਦੀ ਅਲਬਰਟਾ ਡੀਲ ਦੇ ਹੱਕ ਵਿੱਚ ਹਨ।
ਕਾਰਨੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸਰਕਾਰ ਨੂੰ ਦੇਸ਼ ਦੇ ਵੱਡੇ ਹਿਤਾਂ ਨੂੰ ਧਿਆਨ ਵਿੱਚ ਰੱਖ ਕੇ ਫੈਸਲੇ ਕਰਨੇ ਪੈਂਦੇ ਹਨ, ਜਿਨ੍ਹਾਂ ਵਿੱਚ ਅਲਬਰਟਾ, British Columbia ਅਤੇ ਇੰਡੀਜੀਨਸ ਭਾਈਚਾਰਿਆਂ ਦੇ ਹਿਤ ਵੀ ਸ਼ਾਮਲ ਹਨ।
ਉਨ੍ਹਾਂ ਨੇ ਸਰਕਾਰ ਦੀ ਨਵੀਂ ਬਿਜਲੀ ਰਣਨੀਤੀ ਦਾ ਵੀ ਜ਼ਿਕਰ ਕੀਤਾ, ਜਿਸ ਤਹਿਤ ਕੈਨੇਡਾ ਦੀ ਬਿਜਲੀ ਸਮਰੱਥਾ ਨੂੰ ਦੁੱਗਣਾ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ। ਕਾਰਨੀ ਦੇ ਅਨੁਸਾਰ ਸਰਕਾਰ ਇਕੱਠੇ ਹੀ ਕਲਾਈਮਟ ਐਕਸ਼ਨ, ਆਰਥਿਕ ਵਿਕਾਸ ਅਤੇ ਲੋਕਾਂ ਲਈ ਖਰਚੇ ਘਟਾਉਣ ਦੀ ਦਿਸ਼ਾ ਵਿੱਚ ਕੰਮ ਕਰ ਰਹੀ ਹੈ।
