ਲੁਧਿਆਣਾ : ਸ਼ਹਿਰ ਵਿੱਚ ਚੱਲ ਰਹੀਆਂ ਟੂਰਿਸਟ ਬੱਸਾਂ (Tourist Bus) ਦੇ ਚਾਲਕਾਂ ਨੂੰ ਕਿਸੇ ਵੀ ਕਾਇਦੇ-ਕਾਨੂੰਨ ਦਾ ਕੋਈ ਡਰ ਨਹੀਂ ਹੈ। ਇਨ੍ਹਾਂ ਬੱਸਾਂ ਦੇ ਚਾਲਕ ਖੁੱਲ੍ਹੇਆਮ ਨਿਯਮਾਂ ਦੀਆਂ ਧੱਜੀਆਂ ਉਡਾ ਰਹੇ ਹਨ ਪਰ ਇਨ੍ਹਾਂ ਖ਼ਿਲਾਫ਼ ਕਾਰਵਾਈ ਕਰਨ ਲਈ ਜ਼ਿੰਮੇਵਾਰ ਸਰਕਾਰੀ ਵਿਭਾਗ ਗੰਭੀਰ ਨਹੀਂ ਹਨ।
ਤੁਹਾਨੂੰ ਦੱਸ ਦੇਈਏ ਕਿ ਕੋਵਿਡ ਸੰਕਟ ਦੌਰਾਨ ਜਿੱਥੇ ਪ੍ਰਵਾਸੀ ਮਜ਼ਦੂਰਾਂ ਨੂੰ ਘਰ ਭੇਜਣ ਲਈ ਪ੍ਰਸ਼ਾਸਨ ਵੱਲੋਂ ਰੇਲ ਗੱਡੀਆਂ ਦੇ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਸਨ, ਉੱਥੇ ਹੀ ਕੁਝ ਟੂਰਿਸਟ ਬੱਸਾਂ ਦੇ ਸੰਚਾਲਕਾਂ ਨੇ ਵੀ ਕਾਫੀ ਪੈਸਾ ਕਮਾਇਆ ਸੀ। ਟੂਰਿਸਟ ਬੱਸਾਂ ਦੇ ਸੰਚਾਲਕਾਂ ਨੇ ਪ੍ਰਵਾਸੀ ਮਜ਼ਦੂਰਾਂ ਨੂੰ ਉਨ੍ਹਾਂ ਦੀ ਮੰਜ਼ਿਲ ‘ਤੇ ਪਹੁੰਚਾਉਣ ਲਈ ਉਨ੍ਹਾਂ ਤੋਂ ਵੱਧ ਕਿਰਾਇਆ ਵਸੂਲਿਆ ਪਰ ਇਸ ਦੀ ਆੜ ‘ਚ ਨਿਯਮਾਂ ਦੀ ਉਲੰਘਣਾ ਕੀਤੀ ਜਾਣ ਲੱਗੀ। 50 ਸੀਟਾਂ ਵਾਲੀ ਬੱਸ ਵਿੱਚ 250 ਲੋਕ ਸਵਾਰ ਸਨ, ਜੋ ਖਤਰੇ ਤੋਂ ਖਾਲੀ ਨਹੀਂ ਸੀ। ਇਸ ਤੋਂ ਇਲਾਵਾ ਜ਼ਿਆਦਾਤਰ ਟੂਰਿਸਟ ਬੱਸ ਅਪਰੇਟਰਾਂ ਕੋਲ ਜਾਇਜ਼ ਪਰਮਿਟ ਨਹੀਂ ਹਨ ਅਤੇ ਉਹ ਰਾਜ ਸਰਕਾਰ ਨੂੰ ਟੈਕਸ ਵੀ ਨਹੀਂ ਦਿੰਦੇ ਹਨ। ਸਿਰਫ਼ ਕੁਝ ਹੀ ਬੱਸ ਆਪਰੇਟਰਾਂ ਕੋਲ ਬੀਮਾ ਹੈ।
ਕੁਝ ਹਫ਼ਤੇ ਪਹਿਲਾਂ ਪੁਲਿਸ ਵਿਭਾਗ ਵੱਲੋਂ ਅਜਿਹੀ ਹੀ ਇੱਕ ਬੱਸ ਰੋਕੀ ਗਈ ਸੀ ਜਿਸ ਵਿੱਚ 252 ਵਿਅਕਤੀਆਂ ਨੂੰ ਭੇਡਾਂ-ਬੱਕਰੀਆਂ ਵਾਂਗ ਲੱਦਿਆ ਹੋਇਆ ਸੀ। ਟੂਰਿਸਟ ਬੱਸਾਂ ਵਿੱਚ ਸਵਾਰੀਆਂ ਲੱਦ ਕੇ ਦੂਜੇ ਰਾਜਾਂ ਵਿੱਚ ਭੇਜਣ ਦਾ ਕੰਮ ਸ਼ਰੇਆਮ ਨਾਜਾਇਜ਼ ਬੱਸ ਸਟੈਂਡਾਂ ਵਿੱਚ ਕੀਤਾ ਜਾ ਰਿਹਾ ਹੈ। ਸ਼ਾਮ ਨਗਰ, ਬੀ.ਆਰ.ਐਸ.ਨਗਰ, ਗਿਆਸਪੁਰਾ, ਤਾਜਪੁਰ ਰੋਡ, ਮੋਤੀ ਨਗਰ, ਚੰਡੀਗੜ੍ਹ ਰੋਡ, ਜੀ.ਟੀ.ਰੋਡ ਦੇ ਆਲੇ-ਦੁਆਲੇ ਦੇ ਕਈ ਇਲਾਕਿਆਂ ਵਿੱਚ ਅਜਿਹੇ ਨਜਾਇਜ਼ ਬੱਸ ਸਟੈਂਡ ਪਨਪ ਰਹੇ ਹਨ। ਸ਼ਹਿਰ ਦੇ ਕਈ ਸਫੈਦਪੋਸ਼ ਲੋਕਾਂ ਦਾ ਆਸ਼ੀਰਵਾਦ ਵੀ ਅਜਿਹੇ ਬੱਸ ਚਾਲਕਾਂ ‘ਤੇ ਹੈ, ਜਿਸ ਕਾਰਨ ਸਰਕਾਰੀ ਵਿਭਾਗ ਕੋਈ ਕਾਰਵਾਈ ਨਹੀਂ ਕਰਦੇ। ਅਜਿਹੇ ਬੱਸ ਚਾਲਕਾਂ ਦਾ ਮਨੋਬਲ ਦਿਨੋ-ਦਿਨ ਵਧਦਾ ਜਾ ਰਿਹਾ ਹੈ।
ਇਨ੍ਹਾਂ ਓਵਰਲੋਡ ਬੱਸਾਂ ਵਿੱਚ ਸਫ਼ਰ ਕਰਨਾ ਖ਼ਤਰੇ ਤੋਂ ਖਾਲੀ ਨਹੀਂ ਹੈ। ਜੇਕਰ ਕੋਈ ਹਾਦਸਾ ਵਾਪਰਦਾ ਹੈ ਤਾਂ ਜਾਨੀ ਨੁਕਸਾਨ ਦਾ ਖਤਰਾ ਵੱਧ ਜਾਂਦਾ ਹੈ ਅਤੇ ਅਜਿਹੇ ਵਿੱਚ ਬੀਮਾ ਕੰਪਨੀ ਕਲੇਮ ਦੇਣ ਤੋਂ ਵੀ ਗੁਰੇਜ਼ ਕਰਦੀ ਹੈ ਪਰ ਇਸ ਦੇ ਬਾਵਜੂਦ ਅਜਿਹੇ ਟੂਰਿਸਟ ਬੱਸ ਚਾਲਕਾਂ ਨੂੰ ਰੋਕਣ ਵਾਲਾ ਕੋਈ ਨਹੀਂ ਹੈ। ਇਸ ਸਬੰਧੀ ਏ.ਸੀ.ਪੀ ਟਰੈਫਿਕ ਚਰਨਜੀਵ ਲਾਂਬਾ ਦਾ ਕਹਿਣਾ ਹੈ ਕਿ ਵਿਭਾਗ ਅਜਿਹੀਆਂ ਟੂਰਿਸਟ ਬੱਸਾਂ ਖ਼ਿਲਾਫ਼ ਕਾਰਵਾਈ ਕਰਦਾ ਰਹਿੰਦਾ ਹੈ। ਜੇਕਰ ਦੁਬਾਰਾ ਅਜਿਹੀ ਕੋਈ ਸ਼ਿਕਾਇਤ ਆਉਂਦੀ ਹੈ ਤਾਂ ਜ਼ਰੂਰ ਕਾਰਵਾਈ ਕੀਤੀ ਜਾਵੇਗੀ।
