ਸਪੋਰਟਸ ਡੈਸਕ : ਭਾਰਤੀ ਸ਼ੂਟਿੰਗ ਟੀਮ ਪੈਰਿਸ ਪੈਰਾਲੰਪਿਕ (Paris Paralympics) ‘ਚ ਹਿੱਸਾ ਲੈਣ ਲਈ ਪੈਰਿਸ ਰਵਾਨਾ ਹੋ ਗਈ ਹੈ। ਰਾਈਫਲ ਨਿਸ਼ਾਨੇਬਾਜ਼ ਅਵਨੀ ਲੇਖਰਾ, ਮੋਨਾ ਅਗਰਵਾਲ ਅਤੇ ਪਿਸਟਲ ਸ਼ੂਟਰ ਮਨੀਸ਼ ਨਰਵਾਲ ਸਮੇਤ 10 ਮੈਂਬਰੀ ਸ਼ੂਟਿੰਗ ਟੀਮ 30 ਅਗਸਤ ਤੋਂ ਪੈਰਿਸ ਨੇੜੇ ਚੈਟਰਾਓ ਵਿਖੇ ਹੋਣ ਵਾਲੇ ਸ਼ੂਟਿੰਗ ਮੁਕਾਬਲਿਆਂ ਵਿੱਚ ਹਿੱਸਾ ਲਵੇਗੀ। ਨਰਵਾਲ ਨੇ ਆਗਾਮੀ ਪੈਰਿਸ ਖੇਡਾਂ ‘ਚ ਭਾਰਤੀ ਨਿਸ਼ਾਨੇਬਾਜ਼ੀ ਟੀਮ ਦੇ ਟੋਕੀਓ ਪੈਰਾਲੰਪਿਕ ‘ਚ ਤਮਗਾ ਜਿੱਤਣ ਦਾ ਭਰੋਸਾ ਪ੍ਰਗਟਾਉਂਦੇ ਹੋਏ ਸ਼ਨੀਵਾਰ ਨੂੰ ਯਾਨੀ ਅੱਜ ਕਿਹਾ ਕਿ ਸਖ਼ਤ ਅਭਿਆਸ ਤੋਂ ਬਾਅਦ ਟੀਮ ਚੰਗੀ ਸਥਿਤੀ ‘ਚ ਹੈ।
ਭਾਰਤ ਨੇ ਟੋਕੀਓ ਪੈਰਾਲੰਪਿਕ ਵਿੱਚ ਦੋ ਸੋਨ, ਇੱਕ ਚਾਂਦੀ ਅਤੇ ਦੋ ਕਾਂਸੀ ਦੇ ਤਗਮੇ ਜਿੱਤੇ ਸਨ। ਟੋਕੀਓ ਵਿੱਚ 50 ਮੀਟਰ ਪਿਸਟਲ (ਐਸ.ਐਚ1) ਵਿੱਚ ਸੋਨ ਤਗ਼ਮਾ ਜਿੱਤਣ ਵਾਲੇ ਨਰਵਾਲ ਨੇ ਟੀਮ ਦੇ ਰਵਾਨਾ ਹੋਣ ਤੋਂ ਪਹਿਲਾਂ ਕਿਹਾ ਕਿ ਸਾਡੀਆਂ ਤਿਆਰੀਆਂ ਚੰਗੀਆਂ ਹਨ ਅਤੇ ਅਸੀਂ ਪੈਰਿਸ ਵਿੱਚ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕਰਨ ਦੀ ਉਮੀਦ ਕਰ ਰਹੇ ਹਾਂ। ਸਾਡਾ ਉਦੇਸ਼ ਆਪਣੇ ਪਿਛਲੇ ਪ੍ਰਦਰਸ਼ਨ ਨੂੰ ਪਿੱਛੇ ਛੱਡਣਾ ਅਤੇ ਹੋਰ ਤਮਗੇ ਲਿਆਉਣਾ ਹੈ।
ਭਾਰਤ ਨੂੰ ਅਵਨੀ ਤੋਂ ਹੈ ਉਮੀਦ
ਨਰਵਾਲ ਪੈਰਿਸ ਖੇਡਾਂ ਵਿੱਚ 10 ਮੀਟਰ ਏਅਰ ਪਿਸਟਲ ਵਿੱਚ ਹਿੱਸਾ ਲਵੇਗਾ। ਨਰਵਾਲ, ਅਵਨੀ ਅਤੇ ਮੋਨਾ ਤੋਂ ਇਲਾਵਾ ਟੀਮ ਦੇ ਹੋਰ ਮੈਂਬਰ ਅਮੀਰ ਅਹਿਮਦ ਭੱਟ, ਰੁਦਰਾਂਸ਼ ਖੰਡੇਲਵਾਲ, ਰੁਬੀਨਾ ਫਰਾਂਸਿਸ, ਸਵਰੂਪ ਉਨਹਾਲਕਰ, ਸਿਧਾਰਥ ਬਾਬੂ, ਸ਼੍ਰੀਹਰਸ਼ ਦੇਵਰਾੜੀ ਅਤੇ ਨਿਹਾਲ ਸਿੰਘ ਹਨ। ਇਨ੍ਹਾਂ ਖੇਡਾਂ ਵਿੱਚ ਭਾਰਤ ਨੂੰ ਤਗ਼ਮੇ ਦੀ ਸਭ ਤੋਂ ਵੱਧ ਉਮੀਦਾਂ ਅਵਨੀ ਤੋਂ ਹੋਣਗੀਆਂ। ਜੋ ਪਿਛਲੀਆਂ ਖੇਡਾਂ ਵਿੱਚ ਦੋ ਤਗਮੇ ਜਿੱਤਣ ਵਾਲੀ ਭਾਰਤ ਦੀ ਪਹਿਲੀ ਮਹਿਲਾ ਨਿਸ਼ਾਨੇਬਾਜ਼ ਬਣੀ। ਜੈਪੁਰ ਦੇ ਇਸ ਨਿਸ਼ਾਨੇਬਾਜ਼ ਨੇ ਟੋਕੀਓ ਪੈਰਾਲੰਪਿਕਸ ਵਿੱਚ 10 ਮੀਟਰ ਏਅਰ ਰਾਈਫਲ ਅਤੇ 50 ਮੀਟਰ ਰਾਈਫਲ ਥ੍ਰੀ ਪੋਜ਼ੀਸ਼ਨ (SH1) ਵਿੱਚ ਸੋਨ ਤਗਮੇ ਜਿੱਤੇ ਸਨ। ਭਾਰਤੀ ਪੈਰਾਲੰਪਿਕ ਕਮੇਟੀ ਨੂੰ ਇਨ੍ਹਾਂ ਖੇਡਾਂ ਤੋਂ 25 ਤੋਂ ਵੱਧ ਮੈਡਲਾਂ ਦੀ ਉਮੀਦ ਹੈ। ਭਾਰਤ ਦੇ ਸਮੁੱਚੇ ਪ੍ਰਦਰਸ਼ਨ ਵਿੱਚ ਨਿਸ਼ਾਨੇਬਾਜ਼ੀ ਦੀ ਵੱਡੀ ਭੂਮਿਕਾ ਹੋਵੇਗੀ।
