ਦੇਵਭੂਮੀ ਦਵਾਰਕਾ : ਗੁਜਰਾਤ (Gujarat) ਦੇ ਸਮੁੰਦਰੀ ਤੱਟ ਤੋਂ ਇੱਕ ਵਾਰ ਫਿਰ ਲਾਵਾਰਿਸ ਹਾਲਤ ਵਿੱਚ ਨਸ਼ੀਲਾ (Drugs) ਪਦਾਰਥ ਬਰਾਮਦ ਹੋਇਆ ਹੈ। ਦੇਵਭੂਮੀ ਦਵਾਰਕਾ ਜ਼ਿਲ੍ਹੇ ਦੇ ਸਮੁੰਦਰੀ ਤੱਟ ਤੋਂ 16 ਕਰੋੜ ਰੁਪਏ ਦੀ 32 ਕਿਲੋਗ੍ਰਾਮ ਹਸ਼ੀਸ਼ ਬਰਾਮਦ ਕੀਤੀ ਗਈ ਹੈ। ਦੇਵਭੂਮੀ ਦਵਾਰਕਾ ਦੇ ਐਸ.ਪੀ ਨਿਤੀਸ਼ ਪਾਂਡੇ ਦੇ ਅਨੁਸਾਰ, ਦੋ ਰਾਤਾਂ ਪਹਿਲਾਂ ਤੱਟ ‘ਤੇ ਗਸ਼ਤ ਦੌਰਾਨ, ਸਥਾਨਕ ਪੁਲਿਸ ਅਤੇ ਐਸ.ਓ.ਜੀ ਨੇ ਵਰਵਾਲਾ ਨੇੜੇ 30 ਪੈਕਟਾਂ ਨਾਲ ਭਰੇ ਤਿੰਨ ਪਲਾਸਟਿਕ ਦੇ ਬੈਗ ਬਰਾਮਦ ਕੀਤੇ ਸਨ। ਬਰਾਮਦ ਸਮੱਗਰੀ ਦੀ ਜਾਂਚ ਕਰਨ ਲਈ ਐਫ.ਐਸ.ਐਲ ਅਧਿਕਾਰੀਆਂ ਨੂੰ ਬੁਲਾਇਆ ਗਿਆ ਅਤੇ ਉਨ੍ਹਾਂ ਨੇ ਪਾਇਆ ਕਿ ਇਨ੍ਹਾਂ ਪੈਕਟਾਂ ਵਿੱਚ 32 ਕਿਲੋਗ੍ਰਾਮ ਹਸ਼ੀਸ਼ ਸੀ, ਜਿਸ ਦੀ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਕੀਮਤ 16 ਕਰੋੜ ਹੈ।
ਦਵਾਰਕਾ ਪੁਲਿਸ ਨੇ ਐਨ.ਡੀ.ਪੀ.ਐਸ ਐਕਟ ਤਹਿਤ ਕੇਸ ਦਰਜ ਕਰ ਲਿਆ ਹੈ। ਅਧਿਕਾਰੀ ਅਨੁਸਾਰ ਪਹਿਲੀ ਨਜ਼ਰੇ ਨਸ਼ੇ ਦੇ ਸਮੁੰਦਰ ਤੋਂ ਕਿਨਾਰੇ ਤੱਕ ਆਉਣ ਦੀ ਸੰਭਾਵਨਾ ਹੈ। ਫਿਲਹਾਲ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਘਟਨਾ ਬਾਰੇ ਗ੍ਰਹਿ ਰਾਜ ਮੰਤਰੀ ਹਰਸ਼ ਸੰਘਵੀ ਨੇ ਟਵੀਟ ਕੀਤਾ ਕਿ ਗੁਜਰਾਤ ਪੁਲਿਸ ਨਸ਼ਿਆਂ ਨੂੰ ਫੜ ਕੇ ਨੌਜਵਾਨਾਂ ਦੀ ਜਾਨ ਬਚਾਉਣ ਲਈ ਵਚਨਬੱਧ ਹੈ! ਗੁਜਰਾਤ ਪੁਲਿਸ ਨੇ ਜਾਣਕਾਰੀ ਦੇ ਆਧਾਰ ‘ਤੇ ਦਵਾਰਕਾ ਦੇ ਪਿੰਡ ਵਰਵਾਲਾ ਦੇ ਬੀਚ ਤੋਂ 16 ਕਰੋੜ ਰੁਪਏ ਦੀ ਕੀਮਤ ਦੇ 30 ਪੈਕਟਾਂ ‘ਚ 32 ਕਿਲੋਗ੍ਰਾਮ ਹਸ਼ੀਸ਼ ਬਰਾਮਦ ਕੀਤੀ ਹੈ ਅਤੇ ਇਸ ਨਾਲ ਸਬੰਧਤ ਦੋਸ਼ੀਆਂ ਨੂੰ ਫੜਨ ਲਈ ਕੋਸ਼ਿਸ਼ਾਂ ਤੇਜ਼ ਕਰ ਦਿੱਤੀਆਂ ਹਨ। ਗੁਜਰਾਤ ਨੂੰ ਨਸ਼ਾ ਮੁਕਤ ਬਣਾਉਣ ਲਈ ਦਵਾਰਕਾ ਪੁਲਿਸ ਦਾ ਕੰਮ ਸ਼ਲਾਘਾਯੋਗ ਹੈ।
